ୱାଶିଂଟନ: ଆମେରିକା-ଇରାନ ମଧ୍ୟରେ ଚାଲିଥିବା ବିବାଦର ଅନ୍ତ ପାଇଁ ଆଲୋଚନା ଶେଷ ପର୍ଯ୍ୟାୟରେ ପହଞ୍ଚିଛି। ରିପୋର୍ଟ ଅନୁସାରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ହର୍ମୁଜ୍ ପ୍ରଣାଳୀ ସମ୍ପର୍କରେ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି। ଆମେରିକା ରାଷ୍ଟ୍ରପତି ମଧ୍ୟପ୍ରାଚ୍ୟରେ ବାଣିଜ୍ୟିକ ଜାହାଜଗୁଡ଼ିକୁ ସୁରକ୍ଷା ଦେଉଥିବା ନୌସେନା ଅପରେସନ୍ 'ପ୍ରୋଜେକ୍ଟ ଫ୍ରିଡମ୍'କୁ ଅସ୍ଥାୟୀ ଭାବରେ ସ୍ଥଗିତ ରଖିବା ଘୋଷଣା କରିଛନ୍ତି। ସେ ଏହା ମଧ୍ୟ କହିଛନ୍ତି ଯେ ଇରାନ ବନ୍ଦରଗୁଡ଼ିକର ଆମେରିକାର ଅବରୋଧ ଜାରି ରହିବ।

ସୋସିଆଲ ମିଡିଆ ପ୍ଲାଟଫର୍ମ 'ସତ୍ୟ'ରେ ଏକ ପୋଷ୍ଟରେ ଟ୍ରମ୍ପ୍ ଲେଖିଛନ୍ତି, ‘ଏକ ଚୁକ୍ତି ସମ୍ପର୍କରେ ଇରାନ ପ୍ରତିନିଧିଙ୍କ ସହ ଆଲୋଚନା ଚାଲିଛି। ଟ୍ରମ୍ପ୍ ଦାବି କରିଛନ୍ତି ଯେ ସେ ଇରାନ ସହିତ ଚୁକ୍ତିନାମାକୁ ଚୂଡ଼ାନ୍ତ କରିବା ପାଇଁ ଏକ ପ୍ରୋଜେକ୍ଟ 'ପ୍ରୋଜେକ୍ଟ ଫ୍ରିଡମ୍'କୁ ଅସ୍ଥାୟୀ ଭାବରେ ସ୍ଥଗିତ ରଖିଛନ୍ତି।

ସେ କହିଛନ୍ତି, ପାକିସ୍ତାନ ଏବଂ ଅନ୍ୟାନ୍ୟ ଦେଶର ଅନୁରୋଧରେ ଇରାନ ବିରୁଦ୍ଧରେ ଅଭିଯାନ ସମୟରେ ହାସଲ ହୋଇଥିବା ବିସ୍ମୟକର ସାମରିକ ସଫଳତା ଏବଂ ଶାନ୍ତି ଚୁକ୍ତି ସମ୍ପର୍କରେ ଇରାନ ପ୍ରତିନିଧିମାନଙ୍କ ସହିତ ଭଲ ଆଲୋଚନା ଆଧାରରେ  ଆମେ ପାରସ୍ପରିକ ଭାବରେ ସହମତ ହୋଇଛୁ ଯେ ଅବରୋଧ ପୂର୍ଣ୍ଣ ବଳରେ ରହିବ। କିନ୍ତୁ ଏକ ଚୁକ୍ତି ଚୂଡ଼ାନ୍ତ ହୋଇପାରିବ କି ନାହିଁ ତାହା ଦେଖିବା ପାଇଁ ପ୍ରୋଜେକ୍ଟ ଫ୍ରିଡମକୁ ଅସ୍ଥାୟୀ ଭାବରେ ସ୍ଥଗିତ ରଖାଯିବ। 

ଇରାନ ସହିତ ବଢ଼ୁଥିବା ଉତ୍ତେଜନା ମଧ୍ୟରେ ହର୍ମୁଜ ପ୍ରଣାଳୀ ଦେଇ ନିରାପଦ ଏବଂ ସୁରକ୍ଷିତ ବାଣିଜ୍ୟ ପୁନଃ ଆରମ୍ଭ କରିବା ପାଇଁ ଟ୍ରମ୍ପ ପ୍ରଶାସନ ‘ପ୍ରୋଜେକ୍ଟ ଫ୍ରିଡମ’ ଆରମ୍ଭ କରିଥିଲା, ଯାହା ଏକ ସାମରିକ ଅଭିଯାନ। ଏହି ଅଭିଯାନର ଲକ୍ଷ୍ୟ ହେଉଛି ଷ୍ଟ୍ରେଟ୍ ଦେଇ ଆନ୍ତର୍ଜାତୀୟ ବାଣିଜ୍ୟ ଜାହାଜର ସୁରକ୍ଷିତ ପଥ ସୁନିଶ୍ଚିତ କରିବା। ଆମେରିକା ଅଭିଯୋଗ କରିଛି ଯେ ଇରାନ ଗତ କିଛି ସପ୍ତାହରେ ଜାହାଜ ଉପରେ ବାରମ୍ବାର ଆକ୍ରମଣ କରିଛି। ହରମୁଜ୍ ପ୍ରଣାଳୀ ଏକ ଗୁରୁତ୍ୱପୂର୍ଣ୍ଣ ମାର୍ଗ। କାରଣ ବିଶ୍ୱର ପ୍ରାୟ ୨୦ ପ୍ରତିଶତ ତୈଳ ଏହା ଦେଇ ଗତି କରେ। ତେଣୁ ଏହାର ସୁରକ୍ଷା ସମଗ୍ର ବିଶ୍ୱ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଆମେରିକା ଏହି ମିଶନ ପାଇଁ ଏକ ବଡ଼ ସାମରିକ ବାହିନୀ ନିୟୋଜିତ କରିଛି, ଯେଉଁଥିରେ ୧୫,୦୦୦ରୁ ଅଧିକ ସୈନ୍ୟ, ଗାଇଡେଡ୍-ମିସାଇଲ୍ ବିଧ୍ୱଂସକ ଜାହାଜ, ହେଲିକପ୍ଟର ଏବଂ ୧୦୦ରୁ ଅଧିକ ବିମାନ ଅନ୍ତର୍ଭୁକ୍ତ।

ଅଧିକ ପଢ଼ନ୍ତୁ: ବିବାହ ଉତ୍ସବରୁ ଫେରୁଥିବା ଅର୍କେଷ୍ଟ୍ରା ଦଳକୁ ଚାପି ଦେଲା ଟ୍ରକ୍