ବିଗ ବସ୍ ଫେମ ତଥା ତାଜିକିସ୍ତାନର ଗାୟକ ଅବ୍ଦୁ ରୋଜିକ ବହୁ ଜଲ୍ଲଦୀ ବିବାହ ବନ୍ଧନରେ ବାନ୍ଧି ହେବାକୁ ଯାଉଛନ୍ତି । ସୋସିଆଲ ମିଡିଆରେ ନିଜ ୱେଡିଂ ରିଙ୍ଗ୍ ସହ ଏକ ଭିଡିଓ ସେୟାର କରି ଏହି ସୂଚନା ଦେଇଛନ୍ତି । ଏଥିସହ ସେ ବିବାହ ତାରିଖ ମଧ୍ୟ ପ୍ରକାଶ କରିଛନ୍ତି । ଚଳିତ ବର୍ଷ ଜୁଲାଇ ମାସ ୭ ତାରିଖରେ ଏହି ତାରକାଙ୍କ ପଡିବ ହାତଗଣ୍ଠି ।

ନିଜ ଇନଷ୍ଟାଗ୍ରାମରେ ଅବ୍ଦୁ ରୋଜିକ ଏହି ଭିଡିଓ ସେୟାର କରିଛନ୍ତି । ଏଥିରେ ସେ କହିଛନ୍ତି, ''ସାଥୀଗଣ, ଆପଣ ଜାଣନ୍ତି ମୋର ବୟସ ୨୦ ବର୍ଷ । ମୁଁ ମଧ୍ୟ ଭଲପାଇବା ନେଇ ସ୍ୱପ୍ନ ଦେଖିଥିଲି । ମୁଁ ଚାହୁଁଥିଲି ମୋ ଜୀବନରେ ଏମିତି କେହି ଆସୁ ଯିଏ ମୋତେ ସମ୍ମାନ କରିବ ଏବଂ ମୋତ ଭଲପାଇବ । ଶେଷରେ ମୋତେ ଏମିତି କେହି ଜଣେ ମିଳିଯାଇଛନ୍ତି । ଯାହାକୁ ନେଇ ମୁଁ ବହୁତ ଉତ୍ସାହିତ ଏବଂ ଏହାକୁ କିପରି କହିବି ଜାଣିପାରୁ ନାହିଁ ।'' ତା' ପରେ ସେ ୱେଡିଂ ରିଙ୍ଗ ଦେଖାଇଛନ୍ତି । ସେପଟେ ଏହି ଭିଡିଓ ସେୟାର କରି ସେ କ୍ୟାପସନରେ ଲେଖିଛନ୍ତି, ମୁଁ ମୋ ଜୀବନରେ କେବେ ଭାବି ନଥିଲି ଯେ ମୋତେ କେହି ପ୍ରେମ କରୁଥିବା ବ୍ୟକ୍ତି ମିଳିବେ । କିନ୍ତୁ ମୁଁ ତାଙ୍କୁ ପାଇ ବହୁତ ଭାଗ୍ୟବାନ । ଜୁଲାଇ ୭ ତାରିଖ ମନେ ରଖ । ମୁଁ ଏହା ଘୋଷଣା କରି ବେଶ ଖୁସି ଅଛି ।

ସୂଚନା ଅନୁସାରେ, ଅବ୍ଦୁ ରୋଜିକଙ୍କ ଗର୍ଲଫ୍ରେଣ୍ଡ ଭାରତର ନୁହଁନ୍ତି ବରଂ ସେ ୟୁଏଇ ଶରଜାହ ସହରର ୧୯ ବର୍ଷୀୟ ଯୁବତୀଙ୍କୁ ନିଜ ଜୀବନସାଥୀ କରିବାକୁ ଯାଉଛନ୍ତି । ଖବର ଅନୁଯାୟୀ, ଯୁବତୀଙ୍କ ନାମ ଆମିରା ଅଟେ । ଏହା ବ୍ୟତୀତ ଏପର୍ଯ୍ୟନ୍ତ ତାଙ୍କ ବିଷୟରେ କୌଣସି ସୂଚନା ଉପଲବ୍ଧ ନାହିଁ । ସେପଟେ ଅବ୍ଦୁ ରୋଜିକଙ୍କ ମ୍ୟାନେଜମେଣ୍ଟ କମ୍ପାନୀ ଆଇଏଫସିଏମ ମଧ୍ୟ ଏହି ଖବରକୁ ନିଶ୍ଚିତ କରି କହିଛି ଯେ ଏହା ଏକ ପ୍ରେମ ବିବାହ ଏବଂ ଏହି ଦମ୍ପତିଙ୍କ ନିକଟରେ ନିର୍ବନ୍ଧ ହୋଇଥିଲା ।

ଅଧିକା ପଢନ୍ତୁ:ଆଡୁଆରେ କରୀନା କପୁର ଖାନ୍