ମୁୁମ୍ବାଇ: ପାଖାପାଖି ୫ ଦଶନ୍ଧି ଧରି ଫିଲ୍ମ ଜଗତରେ ରାଜ କରୁଥିବା ସୁପର ଷ୍ଟାର ଅଭିନେତା ରଜନୀକାନ୍ତଙ୍କୁ ଅବା କିଏ ନ ଜାଣେ । ତାଙ୍କ ଫିଲ୍ମକୁ ନେଇ ପ୍ରଶଂସକଙ୍କ ମଧ୍ୟରେ ନାହିଁ ନ ଥିବା ଉତ୍ସାହ ଦେଖିବାକୁ ମିଳିଥାଏ । ଏହାର ଝଲକ ଆପଣ ନିକଟରେ ରିଲିଜ ଭେଟ୍ଟୟନ ଫିଲ୍ମର ସଫଳତାରୁ ଅନୁମାନ କରି ପାରିବେ ।

ଏହା ମଧ୍ୟରେ ରଜନୀକାନ୍ତଙ୍କ ଆଗାମୀ ଫିଲ୍ମକୁ ନେଇ ଆସିଛି ବଡ ଖବର । ଏଥିରେ କୁହାଯାଇଛି ଯେ, ବଲିଉଡ ସୁପରଷ୍ଟାର ଅମିର ଖାନ ୩ ଦଶନ୍ଧି ପରେ ରଜନୀକାନ୍ତଙ୍କ ସହିତ ଏକାଠି କାମ କରିବାକୁ ଯାଉଛନ୍ତି । ଚର୍ଚ୍ଚା ଚାଲିଛି ଯେ, ରଜନୀକାନ୍ତଙ୍କ ଆଗାମୀ ଫିଲ୍ମ କୁଲି ପାଇଁ ଅଭିନେତା ଅମିର ଖାନଙ୍କ ସହ ଯୋଗାଯୋଗ କରାଯାଉଛି । ମାଷ୍ଟର ପରି ମାଷ୍ଟରପିସ ଫିଲ୍ମ ନିର୍ମାଣ କରିଥିବା ନିର୍ଦ୍ଦେଶକ ଲୋକେଶ କନକରାଜ ଏହି ଫିଲ୍ମ ପାଇଁ ପ୍ରସ୍ତୁତି ଜୋରଦାର ଚଳାଇଛନ୍ତି । ଡେକାନ ହେରାଲଡର ଖବର ଅନୁଯାୟୀ ରଜନୀକାନ୍ତଙ୍କ ଫିଲ୍ମ କୁଲିରେ କାମ କରିବା ପାଇଁ ଅମିର ଖାନ ରାଜି ହୋଇଛନ୍ତି ।

ଏହି ଆକ୍ସନ ଥ୍ରୀଲର ଫିଲ୍ମରେ ନିଜର କେମିଓ ରୋଲ୍ ପାଇଁ ବଲିଉଡର ମିଷ୍ଟର ପରଫେକ୍ଟନିଷ୍ଟ ଅମିର ଖାନ କିଛି ସମୟ ପରେ ଏହି ଫିଲ୍ମର ସୁଟିଂ ଆରମ୍ଭ କରି ଦେବେ । ତାଙ୍କର ଏହି କେମିଓ ରୋଲ୍ ବହୁତ ଛୋଟ ରହିଥିବା କୁହାଯାଉଛି । କିନ୍ତୁ ଏଥିରେ ଦୁଇ ଗୁଣ ଧମାକା ରହିଛି । ଫିଲ୍ମ ସହ ଜଡିତ ଜନୈକ ବ୍ୟକ୍ତି ଏହି ସୂଚନା ଦେଇଛନ୍ତି । 

ଯଦି ଏମିତି ହୁଏ ତେବେ ସିନେପ୍ରେମୀଙ୍କ ପାଇଁ ଏହା ବଡ ସରପ୍ରାଇଜ ହେବ । ଲୋକେଶ କନକରାଜଙ୍କ କୁଲି ଫିଲ୍ମରେ ରଜନୀକାନ୍ତଙ୍କ ବ୍ୟତୀତ ନାଗାର୍ଜୁନ, ଶ୍ରୁତି ହସନ ଓ ସତ୍ୟରାଜ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିବେ । 

ରଜନୀକାନ୍ତଙ୍କ ମଲଟିଷ୍ଟାରର ଏହି ଫିଲ୍ମ କୁଲି ଆଗାମୀ ବର୍ଷ ବଡ ପରଦାକୁ ଆସିବ । ଏହାର ଟିଜର ଓ ପୋଷ୍ଟର ସାମ୍ନାକୁ ଆସି ସାରିଛି । ଉଲ୍ଲେଖନୀୟ ଏହି ଫିଲ୍ମ ଜରିଆରେ ୩୦ ବର୍ଷ ପରେ ଅମିର ଖାନ ଓ ରଜନୀକାନ୍ତଙ୍କ ଯୋଡି ବଡ ପରଦାରେ ଏକାଠି ନଜର ଆସିବେ । ଏହା ପୂର୍ବରୁ ଦୁଇ ଅଭିନେତା ୧୯୯୫ରେ ହିନ୍ଦୀ ଫିଲ୍ମ ଆତଙ୍କ ହି ଆତଙ୍କରେ ଏକାଠି ଅଭିନୟ କରିଥିଲେ ।