ନୂଆଦିଲ୍ଲୀ: ହରିୟାଣା ବିଧାନସଭା ନିର୍ବାଚନରେ ପରାଜୟ ପରେ ମହାରାଷ୍ଟ୍ର, ଝାଡ଼ଖଣ୍ଡ ଏବଂ ଦିଲ୍ଲୀ ବିଧାନସଭା ନିର୍ବାଚନର ପରବର୍ତ୍ତୀ ପର୍ଯ୍ୟାୟ ପୂର୍ବରୁ କଂଗ୍ରେସ ନିଜର ନିର୍ବାଚନୀ ରଣନୀତି ଉପରେ ପୁନର୍ବିଚାର କରିବାକୁ ମଙ୍ଗଳବାର 'ଇଣ୍ଡିଆ' ମେଣ୍ଟର ସହଯୋଗୀ ଦଳମାନଙ୍କଠାରୁ କିଛି ପରାମର୍ଶ ପାଇଛି।

ଆମ୍ ଆଦମୀ ପାର୍ଟିର ଆବାହକ ଅରବିନ୍ଦ କେଜ୍ରିଓ୍ଵାଲ କହିଛନ୍ତି ଯେ ନିର୍ବାଚନ ଫଳାଫଳର ସବୁଠାରୁ ବଡ଼ ଶିକ୍ଷା ହେଉଛି ଯେ କେହି କେବେ ବି ଅତ୍ୟଧିକ ଆତ୍ମବିଶ୍ୱାସ କରିବା ଉଚିତ୍ ନୁହେଁ। ଆପ୍ କାଉନସିଲରମାନଙ୍କୁ ସମ୍ବୋଧିତ କରି କେଜ୍ରିୱାଲ କହିଛନ୍ତି, ଦେଖନ୍ତୁ ହରିୟାଣାରେ ନିର୍ବାଚନର ଫଳାଫଳ କ'ଣ। ସବୁଠାରୁ ବଡ ଶିକ୍ଷା ହେଉଛି ନିର୍ବାଚନରେ କେହି ଅତ୍ୟଧିକ ଆତ୍ମବିଶ୍ୱାସ ରଖନ୍ତୁ ନାହିଁ । ନିର୍ବାଚନକୁ ହାଲୁକା ଭାବେ ନେବା ଉଚିତ ନୁହେଁ। ପ୍ରତ୍ୟେକ ନିର୍ବାଚନ ଓ ପ୍ରତ୍ୟେକ ଆସନ କଷ୍ଟକର। ହରିୟାଣାରେ ଆସନ ବୁଝାମଣାକୁ ନେଇ ମତଭେଦ ଯୋଗୁଁ ଆପ୍ କଂଗ୍ରେସ ସହ ନିର୍ବାଚନ ପୂର୍ବରୁ ମେଣ୍ଟ କରିବାରେ ବିଫଳ ହୋଇଥିଲା।

ଶିବସେନା ନେତ୍ରୀ ପ୍ରିୟଙ୍କା ଚତୁର୍ବେଦୀ କହିଛନ୍ତି ଯେ ଆସନ୍ତା ମାସରେ ହେବାକୁ ଥିବା ମହାରାଷ୍ଟ୍ରରେ ହରିୟାଣା ନିର୍ବାଚନ ଫଳାଫଳର କୌଣସି ପ୍ରଭାବ ପଡ଼ିବ ନାହିଁ। ତେବେ ହରିୟାଣାରେ ବିଜେପି ବିରୋଧରେ ସିଧାସଳଖ ଲଢ଼େଇରେ ଆଶାଠାରୁ କମ୍ ପ୍ରଦର୍ଶନ କରିପାରୁଥିବାରୁ କଂଗ୍ରେସ ନିଜର ନିର୍ବାଚନରଣନୀତି ଉପରେ ପୁନର୍ବିଚାର କରିବାକୁ ସେ ଜୋର ଦେଇଛନ୍ତି।

ସିପିଆଇ ସାଧାରଣ ସମ୍ପାଦକ ଡି ରାଜା କହିଛନ୍ତି ଯେ ହରିୟାଣା ନିର୍ବାଚନ ଫଳାଫଳ ଉପରେ କଂଗ୍ରେସ ଗମ୍ଭୀରତାର ସହ ଆତ୍ମସମୀକ୍ଷା କରିବା ଉଚିତ ଏବଂ ମହାରାଷ୍ଟ୍ର ଏବଂ ଝାଡ଼ଖଣ୍ଡରେ ଆଗାମୀ ନିର୍ବାଚନରେ ବିରୋଧୀ ମେଣ୍ଟ 'ଇଣ୍ଡିଆ'ର ସମସ୍ତ ସହଯୋଗୀଙ୍କୁ ଏକାଠି କରିବା ଉଚିତ୍।

ମହାରାଷ୍ଟ୍ରରେ ଆସନ ବୁଝାମଣା ପାଇଁ କଂଗ୍ରେସ ଶିବସେନା (ୟୁବିଟି) ଏବଂ ଶରଦ ପାୱାରଙ୍କ ନେତୃତ୍ୱାଧୀନ ଏନସିପି (ଶରଦ ଚନ୍ଦ୍ର ପାୱାର) ସହ କଥାବାର୍ତ୍ତା କରୁଛି। ନିର୍ବାଚନରେ ପରାଜୟ ପରେ କଂଗ୍ରେସ ମଙ୍ଗଳବାର ମହାରାଷ୍ଟ୍ରରେ ନିଜର ସହଯୋଗୀ ଦଳଗୁଡ଼ିକୁ ମେଣ୍ଟ ଧର୍ମ ମନେ ପକାଇ ଦେଇଛି ଏବଂ ଲୋକସଭା ନିର୍ବାଚନରେ ରାଜ୍ୟରେ ଏକକ ବୃହତ୍ତମ ଦଳ ଭାବେ ଉଭା ହୋଇଛି ବୋଲି କହିଛି। 

ଅଧିକ ପଢ଼ନ୍ତୁ: ତୃଣମୂଳସ୍ତରରେ କାମ କଲେ, କର୍ମୀଙ୍କ ଫିଡବ୍ୟାକ୍ ନେଲେ