ପୁଣି ଇତିହାସ ଅଧ୍ୟାପକଙ୍କ ପାଇଁ ବଢ଼ିଲା ଅଡୁଆ। ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି । ଆଜି ବିଭିନ୍ନ ସଙ୍ଗଠନର କର୍ମକର୍ତ୍ତାମାନେ ବଲାଙ୍ଗିର ଏସ୍‌ପିଙ୍କୁ ଭେଟି ଇତିହାସ ଅଧ୍ୟାପକଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଅନୁରୋଧ କରିଛନ୍ତି। ସ୍ୱାଧୀନତା ଦିବସ ପାଳନ ବେଳେ ବୋଲବମ୍‌ ନାରା ଦେଇ ଏବେ ଅଡୁଆରେ ପଡ଼ିଛନ୍ତି ଇତିହାସ ଅଧ୍ୟାପକ।

  ମିଳିଥିବା ସୂଚନାନୁଯାୟୀ, ସ୍ୱାଧୀନତା ଦିବସ ପାଳନ ସମୟରେ ବଲାଙ୍ଗିର ଜିଲ୍ଲା ବେଲପଡା ବ୍ଲକ୍‌ ଧୂମାଭଟା କଲେଜରେ ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଥିଲା । ଯେଉଁଥିରେ ଜାତୀୟ ପତାକା ଉତ୍ତୋଳନ ବେଳେ ଇତିହାସ ବିଭାଗର ଅଧ୍ୟାପକ ଅରୁଣ ବୁଡ଼େକ ବୋଲ ବମ୍‌ର ନାରା ଦେଇଥିଲେ। ଏହାଛଡ଼ା ଗଣେଶ ଫାଦର ପାର କରେଗା ଓ ପାର୍ବତୀ ହଜବ୍ୟାଣ୍ଡ ପାର କରେଗାର ନାରା ମଧ୍ୟ ଦେଇଥିଲେ ଇତିଆସ ଅଧ୍ୟାପକ। ଯାହାର ଭିଡ଼ିଓ ଭାଇରଲ ହୋଇଥିଲା। ଭିଡ଼ିଓଟି ଭାଇରଲ ହେବା ପରେ ବିଭିନ୍ନ ମହଲରେ ଉତ୍ତେଜନା ପ୍ରକାଶ ପାଇଛି। ସ୍ୱାଧୀନତା ଦିବସରେ ଏପରି ନାରା ଦିଆଯାଇ ଭାରତ ମାତା, ଜାତୀୟ ପତାକା ଓ ହିନ୍ଦୁ ଦେବାଦେବୀଙ୍କୁ ଅପମାନିତ କରାଯାଇଛି ବୋଲି କୋଶଳ ମୁକ୍ତି ମୋର୍ଚ୍ଚା ଏବଂ ବଜରଙ୍ଗ ଦଳ କହିଥିଲା। ତେଣୁ ସମ୍ପୃକ୍ତ ଅଧ୍ୟାପକଙ୍କ ବିରୋଧରେ କାର୍ଯ୍ୟାନୁଷ୍ଠାନ କରାଯାଉ ବୋଲି ଦାବି ହୋଇଥିଲା। ଏନେଇ ବିଭିନ୍ନ ଥାନାରେ ଲିଖିତ ଅଭିଯୋଗ ହୋଇଥିଲା। ହେଲେ ପୁଲିସ୍‌ କୌଣସି କାର୍ଯ୍ୟନୁଷ୍ଠାନ ଗ୍ରହଣ କରିନଥିଲା। ପୁଲିସ୍‌ର ଏପରି ନିରବତା ପ୍ରତିବାଦରେ ଆଜି ବିଭିନ୍ନ ସଂଗଠନ ଏସପିଙ୍କ ଦ୍ୱାରସ୍ଥ ହୋଇଥିଲେ।  ଦାବି ପୂରଣ ନହେଲେ ଆଗକୁ ବ୍ୟାପକ ଆନ୍ଦୋଳନ କରିବାକୁ ଚେତାବନୀ ଦିଆଯାଇଛି। ଏନେଇ କଲେଜ କର୍ତ୍ତୃପକ୍ଷ କିମ୍ୱା ପୁଲିସର ପ୍ରତିକ୍ରିୟା ମିଳିପାରି ନାହିଁ।