ମହାରାଷ୍ଟ୍ର: ଆତଙ୍କବାଦୀ ବିରୁଦ୍ଧରେ ଭାରତର ଆଉ ଏକ ବଡ଼ ସଫଳତା। ୨ କୁଖ୍ୟାତ ଆତଙ୍କବାଦୀଙ୍କୁ ଗିରଫ କରିଛି ଏନଆଇଏ। ମୁମ୍ବାଇ ବିମାନବନ୍ଦରରୁ ଆତଙ୍କବାଦୀ ଅବଦୁଲ୍ଲା ଫୈଜ୍ ଶେଖ୍ ଓରଫ ଡାଏପରୱାଲା ଏବଂ ତଲହା ଖାନାଙ୍କୁ ଗିରଫ କରି ଛାନଭିନ ଆରମ୍ଭ କରିଛି କେନ୍ଦ୍ରୀୟ ତଦନ୍ତକାରୀ ସଂସ୍ଥା । ଆତଙ୍କୀ ଲିଙ୍କରେ ଜାମ୍ମୁ-କାଶ୍ମୀରର ଗାନ୍ଦରବଲ ଅଞ୍ଚଳରେ ଚଢାଉ ଜାରି ରହିଛି ।

ସୂଚନା ଅନୁସାରେ ଉଭୟ ଅଭିଯୁକ୍ତ ଇଣ୍ଡୋନେସିଆର ରାଜଧାନୀ ଜାକର୍ତ୍ତାରେ ଲୁଚି ରହିଥିଲେ ଏବଂ ଭାରତ ଫେରିବାକୁ ଚେଷ୍ଟା କରୁଥିବା ବେଳେ ମୁମ୍ବାଇ ଅନ୍ତର୍ଜାତୀୟ ବିମାନବନ୍ଦର  (T2) ରେ ଇମିଗ୍ରେସନ ବ୍ୟୁରୋ ସେମାନଙ୍କୁ ଅଟକାଇଥିଲେ। ଏହା ପରେ NIA ଟିମ୍ ତାଙ୍କୁ ହେପାଜତକୁ ନେଇ ଗିରଫ କରିଥିଲା। ସେ ଗତ ଦୁଇ ବର୍ଷ ଧରି ପଳାତକ ଥିଲେ ଏବଂ ମୁମ୍ବାଇର  NIA ସ୍ୱତନ୍ତ୍ର କୋର୍ଟ ତାଙ୍କ ବିରୁଦ୍ଧରେ ଜାମିନ ବିହୀନ ୱାରେଣ୍ଟ ଜାରି କରିଥିଲେ। ଏଜେନ୍ସି ଉଭୟଙ୍କ ଉପରେ ୩ ଲକ୍ଷ ଟଙ୍କାର ପୁରସ୍କାର ଘୋଷଣା ମଧ୍ୟ କରିଥିଲା। ୨୦୨୩ ପୁଣେ ଆଇଇଡି ମାମଲାର ଏମାନେ ମୁଖ୍ୟ ଅଭିଯୁକ୍ତ । 

ଏନଆଇଏ ସୂତ୍ର ଅନୁଯାୟୀ, ଏହି ଉଭୟ ଅଭିଯୁକ୍ତ ଆଇଏସଆଇଏସର ପୁଣେ ସ୍ଲିପର ମଡ୍ୟୁଲ ସହିତ ଜଡିତ ଥିଲେ। ଅନ୍ୟ 8 ଜଣ ସଦସ୍ୟଙ୍କୁ ପୂର୍ବରୁ ଗିରଫ କରାଯାଇଛି। ସେମାନଙ୍କର ଲକ୍ଷ୍ୟ ଥିଲା ଭାରତରେ ଅଶାନ୍ତି ଏବଂ ସାମ୍ପ୍ରଦାୟିକ ଉତ୍ତେଜନା ପ୍ରସାର କରି ସରକାରଙ୍କ ବିରୁଦ୍ଧରେ ଯୁଦ୍ଧ କରିବା। ଏହା ଭାରତରେ ଇସଲାମିକ ଶାସନ ପ୍ରତିଷ୍ଠା ପାଇଁ ISISର ଷଡ଼ଯନ୍ତ୍ରର ଏକ ଅଂଶ ଥିଲା।

ଅବଦୁଲ୍ଲା ଫୈଜ ଶେଖ ପୁଣେର କୋଣ୍ଡୱା ଅଞ୍ଚଳରେ ଏକ ଘର ଭଡା ନେଇଥିଲେ। ଏହି ଘରେ ଆଇଇଡି ତିଆରି କରାଯାଇଥିଲା। ୨୦୨୨-୨୩ ବର୍ଷ ମଧ୍ୟରେ, ସେ ବୋମା ତିଆରି ଉପରେ ଏକ ତାଲିମ କର୍ମଶାଳା ଆୟୋଜନ କରିଥିଲେ। ଦୁହେଁ ଏକ ନିୟନ୍ତ୍ରିତ ବିସ୍ଫୋରଣ କରି IED ପରୀକ୍ଷା ମଧ୍ୟ କରିଥିଲେ। ଏହି ମାମଲାରେ, UAPA, ବିସ୍ଫୋରକ ପଦାର୍ଥ ଆଇନ, ଅସ୍ତ୍ରଶସ୍ତ୍ର ଆଇନ ଏବଂ IPC ଧାରା ଅନୁଯାୟୀ ଚାର୍ଜସିଟ୍ ଦାଖଲ କରାଯାଇଛି। ଭାରତରେ ISISର ଆତଙ୍କବାଦୀ କାର୍ଯ୍ୟକଳାପକୁ ସମ୍ପୂର୍ଣ୍ଣ ଭାବରେ ପର୍ଦ୍ଦାଫାସ କରିବା ପାଇଁ ଏହି ମାମଲାର ତଦନ୍ତ ଏବେ ବି ଜାରି ରହିଛି।