ଯାଜପୁର: ଜଣେ ନାବାଳିକାଙ୍କୁ ଏସିଡ୍ ପିଙ୍ଗି ହତ୍ୟା ଉଦ୍ୟମ ମାମଲାର ଶୁକ୍ରବାର ରାୟ ପ୍ରକାଶ ପାଇଛି। ଯାଜପୁର ଅତିରିକ୍ତ ଜିଲା ଦୌରା ଜଜ୍ ବିଶେଶ୍ଵର ବିଶ୍ବପ୍ରକାଶ ରାୟ ୧୧ଜଣ ସାକ୍ଷୀଙ୍କ ସାକ୍ଷ୍ୟକୁ ଭିତ୍ତିକରି ଅଭିଯୁକ୍ତ ସୌମ୍ୟରଞ୍ଜନ ସାମଲ ଓରଫ୍ ପୁଅ ସାର୍ ଓ ବିଟ୍ ଓରଫ୍ ପ୍ରଶାନ୍ତ ରାୟଙ୍କୁ ଆଜୀବନ କାରାଦଣ୍ଡାଦେଶ ଦେଇଛନ୍ତି। ଏଥିସହିତ ୧ଲକ୍ଷ ଟଙ୍କା ଜରିମାନା କରିଛନ୍ତି। ଜରିମାନା ଅନାଦାୟେ ଅଧିକ ୨ ବର୍ଷ ଜେଲ ଦଣ୍ଡାଦେଶ ଦେଇଛନ୍ତି।

ସୂଚନା ଅନୁଯାୟୀ ୨୦୧୪ ମସିହା ଜୁନ ୬ରେ ବିଞ୍ଝାରପୁର ଥାନା ଅଞ୍ଚଳର ଜଣେ ୧୪ବର୍ଷୀୟା ନାବାଳିକା ନଳକୂପ ନିକଟରେ ଗାଧୋଉଥିବାବେଳେ ଅଭିଯୁକ୍ତ ସୌମ୍ୟରଞ୍ଜନ ଓରଫ ପୁଅ ସାର୍‌ ଲୁଚି କରି ଦେଖୁଥିବା ନାବାଳିକାଜଣକ ଜାଣି ପାରି ଏ ସମ୍ପର୍କରେ ନିଜ ମା’କୁ ଜଣାଇଥିଲା। ନାବାଳିକାର ମା’ ଏ ସମ୍ପର୍କରେ ଅଭିଯୁକ୍ତକୁ ପଚାରିଥିଲେ। ଏହି କଥାକୁ ରାଗ ରଖି ଦୁଇ ଦିନ ପରେ ଅର୍ଥାତ ଜୁନ ୮ ତାରିଖ ରାତି ୧୧ଟା ବେଳେ ନାବାଳିକା, ତାଙ୍କ ମା’ ଓ ଭାଇ ପରିସ୍ରା କରିବା ପାଇଁ ପଦାକୁ ଉଠିଥିବା ବେଳେ ଅଭିଯୁକ୍ତ ସୌମ୍ୟ ରଞ୍ଜନ ଓ ତାର ସାଥୀ ବିଟୁ ଓରଫ ପ୍ରଶାନ୍ତ ରାୟ ନାବାଳିକା ଉପରକୁ ଏସିଡ୍‌‌ ଫିଙ୍ଗିଥିଲେ। 

ଏସିଡ୍‌‌ ମାଡ଼ରେ ନାବାଳିକାଙ୍କ ଦେହର ବିଭିନ୍ନ ସ୍ଥାନରେ କ୍ଷତ ସୃଷ୍ଟି ହୋଇଥିଲା। ନାବାଳିକାକୁ ଗୁରୁତର ଅବସ୍ଥାରେ ଯାଜପୁର ମୁଖ୍ୟ ଚିକିତ୍ସାଳୟକୁ ଅଣାଯାଇଥିବା ବେଳେ ଅବସ୍ଥା ଗୁରୁତର ଥିବାରୁ ଅଧିକ ଚିକିତ୍ସା ନିମନ୍ତେ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ଏ ନେଇ ନାବାଳିକାର ମା’ ଜୁନ ୧୦ ତାରିଖରେ ବିଞ୍ଝାରପୁର ଥାନାରେ ଲିଖିତ ଅଭିଯୋଗ କରିଥିଲେ। ଲିଖିତ ଅଭିଯୋଗକୁ ଭିତ୍ତି କରି ବିଞ୍ଝାରପୁର ପୁଲିସ କେଶ ନଂ. ୧୦୨/୧୪ ବିଭିନ୍ନ ଦଫାରେ ମାମଲା ରୁଜୁ କରିବା ସହ ବିଟୁ ଓରଫ ପ୍ରଶାନ୍ତ ରାୟ ଓ ସୌମ୍ୟ ରଞ୍ଜନ ଓରଫ ପୁଅ ସାର୍‌କୁ ଗିରଫ କରି କୋର୍ଟ ଚାଲାଣ କରିଥିଲେ। ଏହି ମାମଲାରେ ଶୁକ୍ରବାର ଅତିରିକ୍ତ ଜିଲା ଦୌରା ଜଜ୍‌‌ ବିଶ୍ୱେଶ୍ୱର ବିଶ୍ୱପ୍ରକାଶ ରାୟ ୧୧ଜଣ ସାକ୍ଷୀଙ୍କ ବୟାନ ଓ ପୁଲିସର ଦସ୍ତାବିଜକୁ ଆଧାର କରି ୨ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡ ଶୁଣାଇଛନ୍ତି। 

ଅଧିକ ପଢନ୍ତୁ: ରାଇସେନ ଦୁଷ୍କର୍ମ ମାମଲା: ଏସଆଇଙ୍କ ବନ୍ଧୁକ ଛଡ଼ାଇ ନେଇ ପଳାଇଥିଲା, ଅଭିଯୁକ୍ତ ଏନକାଉଣ୍ଟରରେ ଆହତ