ପୁଣେ: ମହାରାଷ୍ଟ୍ରରେ ପୁଣେରେ ଅତି ଲଜ୍ଜାଜନକ ଘଟଣା ଘଟିଥିବା ଜଣାପଡ଼ିଛି । ଶେଷରେ ୮୫ ବର୍ଷିୟା ବୃଦ୍ଧା ବି ଅସାମାଜିକଙ୍କ ଲୋଲୁପ ଦୃଷ୍ଟିରୁ ବର୍ତ୍ତି ପାରି ନାହାଁନ୍ତି । ବୃଦ୍ଧାଙ୍କୁ ଦୁଷ୍କର୍ମ କରିବାକ ପରେ ଗଳା ଚିପି ହତ୍ୟା କରିବାକୁ ମଧ୍ୟ ଉଦ୍ୟମ କରାଯାଇଛି । ପୁଣେ ପୁଲିସ ସଂପୃକ୍ତ ଅଭିଯୁକ୍ତକୁ ଗିରଫ କରିଥିବା ଜଣାପଡ଼ିଛି । 

ବରିଷ୍ଠ ପୁଲିସ ଅଧିକାରୀ କହ୍ନେୟା ଥୋରାତଙ୍କ କହିବା ମୁତାବକ, ରବିବାର ସନ୍ଧ୍ୟା ପ୍ରାୟ ୬ଟା ସମୟରେ ଓମ୍ ଜୟଚନ୍ଦ (୨୩) ନାମକ ଜଣେ ବ୍ୟକ୍ତି ଏକ ସୋସାଇଟିରେ କାମ କରୁଥିଲେ । ଏହି ସମୟରେ ଜଣେ ବୃଦ୍ଧା ଛାତ ଉପରେ ଚାଲୁଥିବାର ସେ ଦେଖିଥିଲା । ସେ ବୃଦ୍ଧାଙ୍କ ନିକଟକୁ ଯାଇ ତୁରନ୍ତ ତାଙ୍କ ପାଟିକୁ ବନ୍ଦ କରି ଘୋଷାଡ଼ି ଘୋଷାଡ଼ି ୬ ମହଲା ଉପରକୁ ଟାଣି ନେଇ ଯାଇଥିଲା । ଏହା ପରେ ସେ ନିଜର ଯୌନ ଲାଲସା ମେଣ୍ଟାଇଥିଲା । 

କାଳେ ଖବର ଆଉ କେଉଁଠି ପ୍ରଘଟ ହୋଇଯିବ ସେଇ ଭୟରେ ଗଳା ଚିପି ହତ୍ୟା ଉଦ୍ୟମ କରିବାକୁ ଚେଷ୍ଟା କରିଥିଲା । ସେପଟେ ବୃଦ୍ଧା ଜଣକ ଘରକୁ ନ ଫେରିବାରୁ ପରିବାର ଲୋକ ଖୋଜିବା ଆରମ୍ଭ କରିଦେଇଥିଲେ । ବୃଦ୍ଧାଙ୍କୁ ଛାତ ଉପରୁ ପାଇଥିଲେ । ତୁରନ୍ତ ଗୁରୁତର ଅବସ୍ଥାରେ ମେଡ଼ିକାଲରେ ଭର୍ତ୍ତି କରି ପୁଲିସକୁ ସୂଚନା ଦେଇଥିଲେ । ବୃଦ୍ଧାଙ୍କ ସହିତ ଦୁଷ୍କର୍ମ ହୋଇଥିବା ମେଡ଼ିକାଲ ରିପୋର୍ଟରୁ ସ୍ପଷ୍ଟ ହୋଇଛି । 

ସେପଟେ ପରିବାର ଲୋକଙ୍କ ଅଭିଯୋଗ ମୁତାବକ, ପୁଲିସ ତଦନ୍ତ ଆରମ୍ଭ କରିଦେଇଥିଲା । ସିସିଟିଭି ଫୁଟେଜକୁ ଆଧାର କରି ଅଭିଯୁକ୍ତ ଓମ ଜୟଚନ୍ଦଙ୍କୁ ଗିରଫ କରିଛି ପୁଲିସ । ଅଭିଯୁକ୍ତ ଜଣକ ଗତ ୬ ମାସ ହେବ ସେହି ସୋସାଇଟିରେ ଇଲେକଟ୍ରିସିଆନଭାବରେ କାମ କରୁଥିଲା । ଅଭିଯୁକ୍ତଙ୍କୁ କୋର୍ଟରେ ହାଜର କରାଯିବା ପରେ ପୁଲିସ ୪ ଦିନିଆ ରିମାଣ୍ଡରେ ନେଇଛି ।