ସ୍କୁଲ୍ ଛାତ୍ରଛାତ୍ରୀଙ୍କୁ କ୍ରୀଡା କ୍ଷେତ୍ରରେ ଅଧିକ ପ୍ରୋତ୍ସାହିତ କରିବା ଲକ୍ଷ୍ୟରେ ସୋଆ ପକ୍ଷରୁ ଆୟୋଜିତ ହୋଇଥିବା ୧୦ ଦିନିଆ ସମର କ୍ୟାମ୍ପ ଗତକାଲି ଉଦ୍ଯାପିତ ହୋଇଯାଇଛି । ଗତ ମେ ୫ ତାରିଖରେ ସୋଆ କ୍ୟାମ୍ପସ-୨ ସ୍ପୋର୍ଟସ୍ କମ୍ପେ୍ଲକ୍ସରେ ଏହି ସମର କ୍ୟାମ୍ପର ଶୁଭାରମ୍ଭ ହୋଇଥିଲା l ପଞ୍ଚମ ରୁ ଦଶମ ଶ୍ରେଣୀ ପର୍ଯ୍ୟନ୍ତ ପ୍ରାୟ ୧୩୦ ଜଣ ଛାତ୍ରଛାତ୍ରୀ ଏହି କ୍ୟାମ୍ପରେ ଯୋଗ ଦେଇଥିଲେ। ଅପରାହ୍ନ ୪ ଟାରୁ ୬ ଟା ପର୍ଯ୍ୟନ୍ତ ଏହି କ୍ୟାମ୍ପ ଚାଲିଥିଲା ।
ସୋଆରେ ତୃତୀୟ ବର୍ଷ ପାଇଁ ଏହି ସମର କ୍ୟାମ୍ପ ଆୟୋଜନ କରାଯାଇଥିଲା । ଏହି କ୍ୟାମ୍ପରେ ଭଲିବଲ୍, ବାସ୍କେଟ ବଲ୍, ଟେବୁଲ୍ ଟେନିସ, ଟେନିସ୍ ଓ କ୍ରିକେଟ୍ ଭଳି କ୍ରୀଡାରେ ଛାତ୍ରଛାତ୍ରୀମାନଙ୍କୁ ପ୍ରଶିକ୍ଷଣ ଦିଆଯାଇଥିଲା । ଏହି କ୍ୟାମ୍ପରେ କୋଚ ପ୍ରିୟମ୍ ମଲ୍ଲିକ କ୍ରିକେଟ୍ ପ୍ରଶିକ୍ଷଣ ଦେଉଥିବା ବେଳେ ସହୀଦ ହୁସେନ ଟେବୁଲ ଟେନିସ, ଉର୍ବଶୀ ମଲ୍ଲିକ ବାସ୍କେଟ ବଲ, ବରେଶ ମିଶ୍ର ଭଲିବଲ ଓ ସୁବ୍ରତ ନାୟକ ଟେନିସର ପ୍ରଶିକ୍ଷଣ ଦେଇଥିଲେ ।
ଉଦ୍ଯାପନୀ କାର୍ଯ୍ୟକ୍ରମରେ ସୋଆ କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ମୁଖ୍ୟ ଅତିଥି ଭାବେ ଯୋଗଥିଲେ । ପିଲାମାନେ ଖୁସିରେ ରହିବା ସବୁଠାରୁ ବଡ ଜିନିଷ ଏବଂ ବାର୍ତ୍ତାଳାପ ମାଧ୍ୟମରେ ଛାତ୍ରଛାତ୍ରୀମାନେ ଏହି କ୍ୟାମ୍ପକୁ ଆସି ଖୁସି କି ନାହିଁ ବୋଲି ମଧ୍ୟ ପ୍ରଶ୍ନ କରିଥିଲେ । ଯାହାର ଉତ୍ତରରେ ଛାତ୍ରଛାତ୍ରୀମାନେ କ୍ୟାମ୍ପକୁ ଆସି ଖୁବ ଖୁସି ବୋଲି କହିଥିଲେ । ଏହି ଅବସରରେ ସୋଆର ସ୍ପୋର୍ଟସ ଅଫିସର ଶ୍ରୀମତୀ ସୁନିତା ବର୍ମା ସ୍ୱାଗତ ଭାଷଣ ଦେବା ସହ କ୍ୟାମ୍ପ ସମ୍ପର୍କିତ ତଥ୍ୟ ଉପସ୍ଥାପନ କରିଥିଲେ ।
ଉଦ୍ଯାପନୀ କାର୍ଯ୍ୟକ୍ରମ ଶେଷରେ ଜୁନିୟର ସ୍ପୋର୍ଟସ ଅଫିସର ଶ୍ରୀ ପ୍ରିୟମ୍ ମଲ୍ଲିକ ଧନ୍ୟବାଦ ଅର୍ପଣ କରିଥିଲେ । କାର୍ଯ୍ୟକ୍ରମରେ ଛାତ୍ରମଙ୍ଗଳ ଡ଼ିନ୍ ପ୍ରଫେସର ଜ୍ୟୋତିରଞ୍ଜନ ଦାସ ଯୋଗଦେଇ ପିଲାମାନେ ସତ୍ ପଥରେ ଯିବା ସହ ସଫଳତା ହାସଲ କରିବା ଉପରେ ଗୁରୁତ୍ୱ ଦେଇଥିଲେ । ସେହିପରି ଆର୍ନ୍ତଜାତିକ କରାଟେ ପ୍ରତିଯୋଗୀ କୁମାରୀ ଭ୍ୟାଲିନା ଭ୍ୟାଲେଂଟିନା ସମ୍ମାନିତ ଅତିଥି ଭାବେ ଯୋଗଦେଇ ପିଲାମାନଙ୍କୁ ନିଜର ପରିଚୟ ସୃଷ୍ଟି କରିବା ସହ ଦେଶ ପାଇଁ ସଫଳତା ଆଣିବା ନିମନ୍ତେ ଆହ୍ୱାନ ଦେଇଥିଲେ l
ଏହି କ୍ୟାମ୍ପରେ ସାମିଲ୍ ହୋଇଥିବା ଛାତ୍ରଛାତ୍ରୀମାନଙ୍କ ମଧ୍ୟରୁ ବୀଣାଭାରତୀ ବିଦ୍ୟାମନ୍ଦିରର ଏବଂ ଏସ.ଓ.ଏସ ଭିଲେଜର ଅଧିକ ସଂଖ୍ୟକ ଛାତ୍ରଛାତ୍ରୀ ସାମିଲ୍ ହୋଇଥିବାରୁ ବୀଣାଭାରତୀର ପ୍ରଧାନ ଆଚାର୍ଯ୍ୟା ଶ୍ରୀମତୀ ଦିପ୍ତିମୟୀ ସାମନ୍ତରାୟ ଏବଂ ଏସ.ଓ.ଏସ ଭିଲେଜର ଆସିଷ୍ଟାଂଟ ଭିଲେଜ ଡାଇରେକ୍ଟର ଶ୍ରୀ ଶ୍ରୀକ୍ରିଷ୍ଣା ନନ୍ଦଗିରିଙ୍କୁ ସ୍ୱତନ୍ତ୍ର ଭାବେ ସମ୍ମାନିତ କରାଯାଇଥିଲା । ସୋଆର ଏହି ସମର କ୍ୟାମ୍ପରେ ଭବିଷ୍ୟତରେ ୧୦୦୦ ପିଲା ସାମିଲ୍ ହେବେ ବୋଲି ଛାତ୍ରମଙ୍ଗଳ ଡ଼ିନ୍ ପ୍ରଫେସର ଦାସ ଆଶା ପ୍ରକାଶ କରିଥିଲେ । ତେବେ ସାମିଲ ହୋଇଥିବା ସମସ୍ତ ୧୩୦ ଜଣ ଛାତ୍ରଛାତ୍ରୀଙ୍କୁ ଅତିଥି ମାନେ ମାନପତ୍ର ଓ ଉପହାର ପ୍ରଦାନ କରିଥିଲେ ।