ବାଙ୍ଗିରିପୋଷି: ମୟୁରଭଞ୍ଜ ଜିଲ୍ଲା ୧୮ନଂ ଜାତୀୟ ରାଜପଥର ବାଙ୍ଗିରିପୋଷି ଥାନା ଅଧୀନସ୍ଥ ଜଗନ୍ନାଥ ଖୁଣ୍ଟା ହାଇସ୍କୁଲ ସମ୍ମୁଖରେ ଏକ ଭୟଙ୍କର ଦୁର୍ଘଟଣା ଘଟିଛି । ବାଇକକୁ ଧକ୍କା ଦେବା ପରେ ରାସ୍ତାରେ ଜଳି ଉଠିଲା ଷୋହଳ ଚକିଆ ଟ୍ରକ୍ । ଅଳ୍ପକେ ବର୍ତ୍ତିଲେ ବାଇକ୍ ଚାଳକ । 

ଜଗନ୍ନାଥ ଖୁଣ୍ଟା ହାଇସ୍କୁଲ ନିକଟରେ ଏକ ବାଇକ ଆରୋହୀ ରାସ୍ତା ପାର୍ ହେଉଥିଲେ । ଏହି ସମୟରେ ବମ୍ବେ ଛକରୁ ବାରିପଦା ଅଭିମୁଖେ ଆସୁଥିବା ଟ୍ରକ୍ ଟି ସାମ୍ନା ପଟୁ ଧକ୍କା ଦେଇଥିଲା । ଫଳରେ ବାଇକ୍ ଟି ଏକ ଭୟଙ୍କର ଶବ୍ଦ କରି ଫାଟି ଥିଲା । ଏହା ପରେ ଟ୍ରକରେ ତୁରନ୍ତ ନିଆଁ ଲାଗିଯାଇଥିଲା । ରାସ୍ତା ମଝିରେ ଟ୍ରକ୍ ଟି ଜଳି ଉଠିଥିଲା । ସ୍ଥାନୀୟ ଲୋକେ ତୁରନ୍ତ  ଅଗ୍ନିଶମ ବାହିନୀକୁ ଖବର ଦେଇଥିଲେ । ଅଗ୍ନିଶମ ବାହିନୀ ଘଟଣା ସ୍ଥଳରେ ପହଁଚି ନିଆଁକୁ ଆୟତ୍ତ କରିବାକୁ ଉଦ୍ୟମ କରିଥିଲେ । ବାଙ୍ଗିରିପୋଷି ଥାନା ପୋଲିସ ମଧ୍ୟ ଖବର ପାଇ ତୁରନ୍ତ ଘଟଣା ସ୍ଥଳରେ ପହଁଚି ଥିଲା । 

ଟ୍ରକରେ ମକା ମଞ୍ଜି ଯାଉଥିଲା ବୋଲି ଜଣାପଡ଼ିଛି । ତେବେ ଏହି ଦୁର୍ଘଟଣାର କାହାର ଜୀବନ ହାନି ହୋଇ ନ ଥିବା ଜଣାପଡ଼ିଛି ।