କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ଗ୍ରାମାଞ୍ଚଳ ଥାନା ଅନ୍ତର୍ଗତ କାଠିଆପଡା ଛାତ୍ରୀ ପୋଡି ଘଟଣାର ତୃତୀୟ ଦିନର ତଦନ୍ତ ଶେଷ ହୋଇଛି । ଶୁକ୍ରବାର ତୃତୀୟ ଦିନରେ ଫୋରେନସିକ ଟିମ୍ ଓ ସାଇଣ୍ଟିଫିକ୍ ଟିମ୍ ସହିତ କେନ୍ଦ୍ରାପଡା ଏସ୍ପି ସିଦ୍ଧାର୍ଥ କଟାରିଆ ତଦନ୍ତରେ ସାମିଲ ହୋଇଥିଲେ । ତଦନ୍ତ ସମୟରେ ଘରର ବିଭିନ୍ନ କୋଠାରୀ, ସିଡି ଓ ଛାତ ଉପରେ ସମେତ ପ୍ରବେଶ ଦ୍ଵାର  ନିରୀକ୍ଷଣ କରାଯାଇଥିଲା । ୪ ଜଣିଆ ଫୋରେନସିକ୍ ଟିମ୍  ଛାତ୍ରୀଙ୍କ ଘରେ ପହଞ୍ଚି ପରିବାର ଲୋକଙ୍କୁ ପଚରା ଉଚରା କରିଛି। ଏହା ବ୍ୟତୀତ କେନ୍ଦ୍ରାପଡ଼ା ଏସପି ଏବଂ ପଟ୍ଟାମୁଣ୍ଡାଇ ଥାନା ଆଇଆଇସି ମଧ୍ୟ ଛାତ୍ରୀଙ୍କ ଘରେ ପହଞ୍ଚି ଯାଞ୍ଚ କରିଛନ୍ତି।

କୁହାଯାଉଛି ଯେ, ଛାତ୍ରୀ ଜଣକ ଆହତ୍ମତ୍ୟା କରିନାହାନ୍ତି। ତାଙ୍କୁ ହତ୍ୟା କରାଯାଇଛି। ଏ ନେଇ ପୁଲିସ ହାତରେ ବଡ଼ ସୁରାକ ଲାଗିଥିବା ବିଶ୍ଵସ୍ତ ସୂତ୍ରରୁ ଜଣାପଡ଼ିଛି। ତେଣୁ ଏହା ଆତ୍ମହତ୍ୟା ନା ହତ୍ୟା ତାହାକୁ ନେଇ ସନ୍ଦେହ ପ୍ରକାଶ ପାଇଛି। ପୁଲିସ ମଧ୍ୟ ବିଭିନ୍ନ ଦିଗରୁ ଘଟଣାର ତଦନ୍ତ ଚଳାଇଛି। ସେପଟେ ତଦନ୍ତ ନସରିବା ପର୍ଯ୍ୟନ୍ତ କୌଣସି ତଥ୍ୟ ସୂଚନା ଦେଇ ହେବ ନାହିଁ ବୋଲି ଏସ୍ପି କହିଛନ୍ତି । ଅନ୍ୟପକ୍ଷରେ ପୋଷ୍ଟମର୍ଟମ ରିପୋର୍ଟ ଆସିବା ପରେ ହିଁ ଘଟଣା ସମ୍ପର୍କରେ ସ୍ପଷ୍ଟ ସୂଚନା ମିଳିପାରିବ।