ସୁନ୍ଦରଗଡ଼: ଶିଶୁକନ୍ୟା ଦୁଷ୍କର୍ମ ମାମଲାରେ ରାୟ ଶୁଣାଇଲେ ପୋକ୍ସୋ କୋର୍ଟ। ସୁନ୍ଦରଗଡ଼ର ସ୍ୱତନ୍ତ୍ର ପୋକ୍ସୋ କୋର୍ଟ ଆଜି (ସୋମବାର ଦିନ) ଜଣେ ୨୨ ବର୍ଷୀୟ ଯୁବକଙ୍କୁ ଶିଶୁକନ୍ୟା ଦୁଷ୍କର୍ମ ମାମଲାରେ ଦୋଷୀ ସାବ୍ୟସ୍ତ କରି ୨୦ ବର୍ଷ ସଶ୍ରମ କାରାଦଣ୍ଡ ସହିତ ୫୦,୦୦୦ ଟଙ୍କା ଜରିମାନା  ଶୁଣାଇଛନ୍ତି।

କୋର୍ଟ ଅଭିଯୁକ୍ତ ଲଭ୍ ଖାଡିଆଙ୍କୁ ଆଇପିସିର ଧାରା ୩୭୬ ଏବି ଏବଂ ଯୌନ ଅପରାଧରୁ ଶିଶୁ ସୁରକ୍ଷା (POCSO) ଆଇନ ଅନୁଯାୟୀ ଦୋଷୀ ସାବ୍ୟସ୍ତ କରିଛନ୍ତି। କୋର୍ଟ ଆହୁରି ମଧ୍ୟ କହିଛନ୍ତି ଯେ, ଜରିମାନା ଦେବାକୁ ବିଫଳ ହେଲେ ଏଥିପାଇଁ ଅତିରିକ୍ତ ଏକ ବର୍ଷ ଜେଲଦଣ୍ଡ ଭୋଗିବାକୁ ପଡିବ।

ମାମଲାର ବିବରଣୀ ଅନୁଯାୟୀ, ଘଟଣାଟି ୧୭ ମାର୍ଚ୍ଚ ୨୦୨୨ରେ ହେମଗିର ଥାନା ଅଧୀନରେ ଘଟିଥିଲା। ଛଅ ବର୍ଷୀୟା ଶିଶୁ କନ୍ୟା ଅପରାହ୍ନରେ ଘର ପାଖ ଏକ ଦୋକାନକୁ ଯାଇଥିବା ବେଳେ ଅଭିଯୁକ୍ତ ତାଙ୍କୁ ଅପହରଣ କରିନେଇ ନିଜ ଘରେ  ଦୁଷ୍କର୍ମ କରିଥିବା ଅଭିଯୋଗ ହୋଇଛି।

ଶିଶୁଟି ପ୍ରଥମେ ଘଟଣା ବିଷୟରେ ଘରେ କାହାରିକୁ କହିନଥିଲା କିନ୍ତୁ, ପରେ ପ୍ରବଳ ଯନ୍ତ୍ରଣା ଅନୁଭବ କରିବା ପରେ ସେ ପରିବାରକୁ ଜଣାଇଥିଲା। ପରିବାର ଲୋକେ ଏନେଇ ପୋଲିସରେ ଅଭିଯୋଗ କରିବା ପରେ ପୋଲିସ ମାମଲା ରୁଜୁ କରି ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ କରିଥିଲା। ଏହି ପୋକ୍ସୋ କୋର୍ଟରେ ମାମଲାର ଶୁଣାଣି ସମୟରେ, କୋର୍ଟ ପୋଲିସର ତଦନ୍ତ ରିପୋର୍ଟ ଏବଂ ସାକ୍ଷୀଙ୍କ ସାକ୍ଷ୍ୟକୁ ଆଧାର କରି ଏହି ରାୟ ଶୁଣାଇଛନ୍ତି।