କେନ୍ଦୁଝର: ଦୁର୍ଗାପୂଜା ଅବସରରେ ରାଜ୍ୟର ସମସ୍ତ ଶକ୍ତିପୀଠ ଓ ଦେବୀପୀଠ ଚଳଚଞ୍ଚଳ ହୋଇଉଠିଛି । ଆଜି ବିଭିନ୍ନ ଶକ୍ତିପୀଠରେ ମହାଷ୍ଟମୀ ପୂଜା ପାଳନ କରାଯାଉଥିବା ବେଳେ, କେନ୍ଦୁଝର ଜିଲ୍ଲାର ଅଧିଷ୍ଠାତ୍ରୀ ଦେବୀ ମା’ ତାରିଣୀଙ୍କ ପୀଠରେ ପାଳିତ ହେଉଛି ମହାସପ୍ତମୀ ପୂଜା। ଆଜିଠାରୁ ବିଜୟା ଦଶମୀ ଯାଏ ମା ସୁନାବେଶରେ ଶ୍ରଦ୍ଧାଳୁଙ୍କୁ ଦର୍ଶନ ଦେବେ । 

ଅନ୍ୟପଟେ , ମାଙ୍କର ମନ୍ଦିର ପରିସରରେ ଦେବୀ ଦୁର୍ଗାଙ୍କର ମୃଣ୍ମୟୀ ମୂର୍ତ୍ତି ପୂଜା ପାଉଛନ୍ତି ।ଏହି ଅବସରରେ ସୁନାବେଶରେ ସଜ୍ଜିତ ହୋଇ ଭକ୍ତଙ୍କୁ ଦର୍ଶନ ଦେଉଛନ୍ତି ମା’ ତାରିଣୀ । ମହାସପ୍ତମୀ ଅବସରରେ ବ୍ରହ୍ମମୁହୂର୍ତ୍ତରୁ ମା’ଙ୍କ ପୀଠରେ ଆରମ୍ଭ ହୋଇଥିଲା ସ୍ୱତନ୍ତ୍ର ନୀତିକାନ୍ତି। ପ୍ରଥମେ ଧୂପ, ଦୀପ, ଅଗୁରୁ ଓ ଚନ୍ଦନ ସମେତ ବିଭିନ୍ନ ସୁବାସିତ ଦ୍ରବ୍ୟରେ ମା’ଙ୍କ ମାଜଣା କରାଯାଇ ମହାସ୍ନାନ କରାଯାଇଥିଲା। ପରେ ମା’ଙ୍କୁ ସୁନାବେଶରେ ସୁସଜ୍ଜିତ କରାଯାଇଥିଲା । ଏହାପରେ ସାଧାରଣ ଭକ୍ତଙ୍କ ଦର୍ଶନ ପାଇଁ ମନ୍ଦିରର ପହଡ଼ ଖୋଲାଯାଇଥିଲା । ପହଡ଼ ଖୋଲିବା ପରେ ମା’ ତାରିଣୀଙ୍କ ମନୋରମ ଦୁର୍ଲଭ ସୁନାବେଶ ଦର୍ଶନ କରିବା ପାଇଁ ସକାଳୁ ସକାଳୁ ଘଟଗାଁ ପୀଠରେ ଶ୍ରଦ୍ଧାଳୁଙ୍କ ଭିଡ଼ ଦେଖିବାକୁ ମିଳିଛି।