ଭୁବନେଶ୍ୱର:  ରଥଯାତ୍ରା ସମୟରେ ଶରଧାବାଲିରେ ଦଳାଚକଟା ଯୋଗୁଁ ତିନି ଶ୍ରଦ୍ଧାଳୁଙ୍କ ମୃତ୍ୟୁକୁ ଏକ ମାସ ପୂରିଲା। ରାଜ୍ୟ ଉନ୍ନୟନ କମିଶନର ଅନୁ ଗର୍ଗ ଏହି ଘଟଣାର ତଦନ୍ତ କରି ଗୁରୁବାର ସନ୍ଧ୍ୟାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ରିପୋର୍ଟ ପ୍ରଦାନ କରିଛନ୍ତି। କେଉଁ ଅଧିକାରୀଙ୍କ ଅବହେଳାରୁ ଏତେବଡ଼ ଅଘଟଣ ଘଟିଲା ସେଥିନେଇ ରିପୋର୍ଟରେ ଉଲ୍ଲେଖ କରିଛନ୍ତି ଉନ୍ନୟନ କମିଶନର । ଭବିଷ୍ୟତରେ କେଉଁ ପଦକ୍ଷେପ ଗ୍ରହଣ କରାଗଲେ ଏଭଳି ଘଟଣାର ପୁନରାବୃତ୍ତି ହେବନାହିଁ ସେଥିନେଇ ସେ ସୁପାରିସ କରିଛନ୍ତି। 

ତଦନ୍ତ ସମୟରେ ୬୭ଜଣଙ୍କ ବୟାନ ରେକର୍ଡ କରାଯାଇଛି। ରିପୋର୍ଟରେ କ’ଣ ରହିଛି, ଏତେ ବଡ଼ ଅଘଟଣ ପାଇଁ କିଏ ଦାୟୀ ତାହା ଜାଣିବା ଲାଗି ଜନସାଧାରଣଙ୍କ ମଧ୍ୟରେ ଉତ୍କଣ୍ଠା ପ୍ରକାଶ ପାଇଛି। ରଥଯାତ୍ରା ପରଦିନ ସକାଳୁ ଶରଧାବାଲିରେ ଦଳାଚକଟା ଘଟିବା ଦ୍ବାରା ଏଥିରେ ୩ ଜଣ ଶ୍ରଦ୍ଧାଳୁ ପ୍ରାଣ ହରାଇଥିଲେ ଏବଂ ୫୦ରୁ ଅଧିକ ଲୋକ ଆହତ ହୋଇଥିଲେ।

ଏହି ଘଟଣାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ପୁରୀ ଜିଲାପାଳ ଓ ଏସ୍ପିଙ୍କୁ ଦାୟିତ୍ବରୁ ଅପସାରଣ କରିବା ସହିତ ଦୁଇ ଜଣ ବରିଷ୍ଠ ପୁଲିସ ଅଧିକାରୀଙ୍କୁ ନିଲମ୍ବନ କରିଥିଲେ। ଏଥିସହ ୩୦ ଦିନ ମଧ୍ୟରେ ତଦନ୍ତ ଶେଷ କରିବା ଲାଗି ଉନ୍ନୟନ ଆୟୁକ୍ତ ଶ୍ରୀମତୀ ଗର୍ଗଙ୍କୁ ଦାୟିତ୍ବ ଦେଇଥିଲେ। ରାଜ୍ୟ ସରକାରଙ୍କ ପରବର୍ତ୍ତୀ କାର୍ଯ୍ୟନୁଷ୍ଠାନକୁ କୋଟି କୋଟି ଜଗନ୍ନାଥ ପ୍ରେମୀ ଅପେକ୍ଷା କରିଛନ୍ତି। ଯେଉଁ ଅଧିକାରୀଙ୍କ ଚରମ ଅବହେଳା ଏବଂ ଦାୟିତ୍ବହୀନତା ଯୋଗୁଁ ତିନିଜଣଙ୍କ ମୂଲ୍ୟବାନ ଜୀବନ ଚାଲିଗଲା ସେମାନଙ୍କ ବିରୋଧରେ ଦୃଷ୍ଟାନ୍ତମୂଳକ ଦଣ୍ଡ ପାଇଁ ସାଧାରଣରେ ମତ ପ୍ରକାଶ ପାଇଛି।