ପୁରୀ: ଗୁଳି ଗୋଳା ବାରୁଦ, ହେଲିକପ୍ଟରରେ ସୁ ସୁ ଗର୍ଜନରେ କମ୍ପୁଛି ପୁରୀ ବେଳାଭୂମି । କେତେବେଳେ ଜଳ ଭିତରେ ଶତ୍ରୁକୁ ବିନାଶ କରୁଛନ୍ତି ତ ଆଉ କେତେବେଳେ ବନ୍ଦୀ ଭାରତୀୟଙ୍କୁ ଆତଙ୍କବାଦୀଙ୍କ କବଳରୁ ବଞ୍ଚାଉଛନ୍ତି ନୌସେନାର ସାହସୀ ଯବାନ । ପ୍ରଥମଥର ପାଇଁ ଓଡ଼ିଶାରେ ସମୁଦ୍ର ବେଳାଭୂମିରେ ପାଳନ ହେଉଛି । ରାଷ୍ଟ୍ରପତି ଦ୍ରୌପଦୀ ମୁର୍ମୁ ମୁଖ୍ୟ ଅତିଥିଭାବେ ଯୋଗ ଦେଇଛନ୍ତି । ସେହିପରି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ରାଜ୍ୟପାଳ ରଘୁବର ଦାସ, ନୌସେନା ମୁଖ୍ୟ ଯୋଗ ଦେଇଛନ୍ତି । 

ଏହି ଅବସରରେ ଏକ ଅଭିନବ ଉପାୟରେ ରାଷ୍ଟ୍ରପତିଙ୍କୁ ସ୍ମାରକ ଭେଟି ଦିଆଯାଇଥିଲା । ମରିନ୍ କମାଣ୍ଡୋ ଚେତନ ମଦାନ ପାରାଚ୍ୟୁଟରୁ ଅବତରଣ କରି ରାଷ୍ଟ୍ରପତିଙ୍କୁ ଏକ ସ୍ମାରକ ପ୍ରଦାନ କରିଥିଲେ । 

ଆଜିର ଏହି କାର୍ଯ୍ୟକ୍ରମରେ ୪ଟି ଯୁଦ୍ଧ ଟ୍ୟାଙ୍କ, ୧୫ଟି ଯୁଦ୍ଧ ଜାହାଜ, ୩୦ଟି ଯୁଦ୍ଧ ହେଲିକପ୍ଟର, ୫ଟି ଯୁଦ୍ଧ ବିମାନ, ଜେଟ୍ ନୌସେନା ଦିବସରେ ସେମାନଙ୍କ ଯୁଦ୍ଧ କୌଶଳ ପ୍ରଦର୍ଶନ କରିବେ । ନୌସେନା ପକ୍ଷରୁ ୨୦ଟି ରଣ କୌଶଳ ପ୍ରଦର୍ଶନ କରାଯିବ । ବ୍ଲୁ ଫ୍ଲାଗ୍ ବିଚ୍ ରେ ୭୫୦୦ ନିମନ୍ତ୍ରିତ ଅତିଥି ବସିବାର ବନ୍ଦୋବସ୍ତ କରାଯାଇଛି । ବେଳାଭୂମିରେ ଲକ୍ଷାଧିକ ଲୋକଙ୍କ ସମାଗମ ହୋଇଛି ।