ଭୁବନେଶ୍ୱର: ଦୀର୍ଘ ୬ ବର୍ଷ ପରେ ପୁଣି ଥରେ ପିହୁ ନିଖୋଜ ପ୍ରସଙ୍ଗ ଉଠିଛି । ଯାଜପୁର ସାଂସଦ ଡା. ରବିନାରାୟଣ ବେହେରା କ୍ରାଇମବ୍ରାଞ୍ଚ ତଦନ୍ତ ଦାବିରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଛନ୍ତି ।

ସାଂସଦ ଗତକାଲି ମୁଖ୍ୟମନ୍ତ୍ରୀଙ୍କୁ ଭେଟି ବରୀ ମଧୁସୂଦନପୁରର ଶିଶୁକନ୍ୟା ପିହୁ ନିଖୋଜ ଘଟଣାର ନିରପେକ୍ଷ ତଦନ୍ତ ପାଇଁ ମାମଲାକୁ କ୍ରାଇମ୍ ବ୍ରାଞ୍ଚକୁ ହସ୍ତାନ୍ତର କରିବାକୁ ଅନୁରୋଧ କରିଛନ୍ତି । ପିହୁଙ୍କ ପରିବାରକୁ ନ୍ୟାୟ ମିଳିବା ଏବଂ ଘଟଣାର ସତ୍ୟତା ସାମ୍ନାକୁ ଆସିବା ଆମର ପ୍ରାଥମିକତା ଅଟେ ବୋଲି କହିଛନ୍ତି ସାଂସଦ । 

ସେହିପରି ଏଭଳି ଏକ ସମ୍ବେଦନଶୀଳ ଘଟଣାରେ ତଦନ୍ତରେ ଅବହେଳା କରିଥିବା ତତ୍କାଳୀନ ବିଞ୍ଝାରପୁର ଥାନା ଆଇଆଇସି ନିରଞ୍ଜନ ଶବରଙ୍କ ବିରୁଦ୍ଧରେ ଦୃଢ଼ରୁ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ସେ ଚିଠିରେ ଉଲ୍ଲେଖ କରିଛନ୍ତି । ଗତ ୯ ଅଗଷ୍ଟ, ୨୦୨୦ ମସିହାରେ ପିହୁ ନିଖୋଜ ହୋଇଥିଲା । ପରିବାର ପକ୍ଷରୁ ବାରମ୍ବାର ଅନୁରୋଧ କରାଯାଇଥିଲେ ମଧ୍ୟ ପୋଲିସ ପକ୍ଷରୁ କୌଣସି ଆଖି ଦୃଶିଆ ପଦକ୍ଷେପ ନିଆଯାଇନଥିଲା । ଘଟଣାର ପାଞ୍ଚ ଦିନ ପରେ ପୋଲିସ ୧୪ ଅଗଷ୍ଟ ୨୦୨୦ରେ ମାମଲା ପଞ୍ଜିକୃତ କରିଥିଲା । ତେଣୁ ଏଭଳି ଅବହେଳା ପାଇଁ ସମ୍ପୃକ୍ତ ପୋଲିସ ଅଧିକାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବାକୁ ସାଂସଦ ଦାବି କରିଛନ୍ତି । 

ଉଲ୍ଲେଖ ଯୋଗ୍ୟ, ଗତ ୯ ଅଗଷ୍ଟ, ୨୦୨୦ରେ ଯାଜପୁର ଜିଲ୍ଲା ବିଞ୍ଝାରପୁର ଥାନା ଅନ୍ତର୍ଗତ ମଧୁସୂଦନପୁରର ଲକ୍ଷ୍ମଣ ନାୟକ ଏବଂ ମୋନାଲିସା ନାୟକଙ୍କ ଅଢ଼େଇ ବର୍ଷର ଶିଶୁ କନ୍ୟା ଶୁଭଲକ୍ଷ୍ମୀ ନାୟକ ଓରଫ୍ ଡାକ ନାମ ପିହୁ, ଗାଁ ଦାଣ୍ଡରେ ଖେଳୁ ଖେଳୁ ହଠାତ୍ ନିଖୋଜ ହୋଇଯାଇଥିଲା । ପରିବାର ଲୋକେ ବହୁତ ଖୋଜାଖୋଜି କରିବା ପରେ ପିହୁ ମିଳିନଥିଲା । କିଛି ଲୋକେ ତାକୁ ଅପହରଣ କରିଥିବା ପରିବାର ଅଭିଯୋଗ କରିଥିଲା । ପରେ ପରିବାର କ୍ରାଇମବ୍ରାଞ୍ଚ ଓ ସିବିଆଇ ତଦନ୍ତ ଦାବି ମଧ୍ୟ କରିଥିଲା । ତଥାପି କିଛି ସୁଫଳ ମିଳିନଥିଲା । ଦୀର୍ଘ ୬ ବର୍ଷ ହେବ ଏବେବି ନିଖୋଜ ପିହୁର ଫେରିବା ବାଟକୁ ଚାହିଁ ବସିଛନ୍ତି ବାପା ଓ ମାଆ ।