କୋଟିଆକୁ ନେଇ ଓଡ଼ିଶା-ଆନ୍ଧ୍ର ବିବାଦ ମଧ୍ୟରେ ବଡ଼ ଖବର। ଆନ୍ଧ୍ରପ୍ରଦେଶରେ ମଣ୍ଡଳ ପରିଷଦ ଟେରିଟୋରିଆଲ୍ କନଷ୍ଟିଚୁଏନ୍ସି (MPTC) ଏବଂ ଜିଲ୍ଲା ପରିଷଦ ଟେରିଟୋରିଆଲ୍ କନଷ୍ଟିଚୁଏନ୍ସି (ZPTC) ନିର୍ବାଚନ ତାରିଖ ବଦଳିଛି। ନଭେମ୍ବର ୩ ତାରିଖରେ ହେବାକୁ ଥିବା ମତଦାନ ଏବେ ନଭେମ୍ବର ୫ରେ ହେବ। ସେହିପରି ନଭେମ୍ବର ୭ରେ ଭୋଟ୍ ଗଣତି ହେବାକୁ ଥିବାବେଳେ ଆବଶ୍ୟକ ପଡ଼ିଲେ ନଭେମ୍ବର ୬ରେ ପୁନଃ ମତଦାନ କରାଯିବ।

ଅକ୍ଟୋବର ୨୮ ତାରିଖରେ ଜାରି ବିଜ୍ଞପ୍ତି ନମ୍ବର ୯୦୫/SEC-B1/2026 ଅନୁଯାୟୀ ଆନ୍ଧ୍ରପ୍ରଦେଶ ରାଜ୍ୟ ନିର୍ବାଚନ ଆୟୋଗ ଏହି ପରିବର୍ତ୍ତନ କରିଛନ୍ତି। ସହରାଞ୍ଚଳ ସ୍ଥାନୀୟ ନିର୍ବାଚନର ଭୋଟ୍ ଗଣତି ନଭେମ୍ବର ୩ରେ ଥିବାରୁ ସୁରକ୍ଷାକର୍ମୀ ଓ ନିର୍ବାଚନ କର୍ମଚାରୀଙ୍କ ନିୟୋଜନରେ ସମସ୍ୟା ହେବା ଆଶଙ୍କାରେ ଏହି ନିଷ୍ପତ୍ତି ନିଆଯାଇଛି।

କୋଟିଆକୁ ନେଇ ବଢ଼ିପାରେ ଉତ୍ତେଜନା

ଏହି ନିଷ୍ପତ୍ତିର ପ୍ରଭାବ ଓଡ଼ିଶା-ଆନ୍ଧ୍ର ସୀମାରେ ଥିବା ବିବାଦୀୟ କୋଟିଆ ଗ୍ରାମପୁଞ୍ଜ ଉପରେ ପଡ଼ିବ। ଆନ୍ଧ୍ରପ୍ରଦେଶ ପାର୍ବତୀପୁରମ୍ ମନ୍ୟମ୍ ଜିଲ୍ଲା ଅଧୀନରେ ଫଗୁଣସିନେରୀ, ଗଞ୍ଜେଇପଦର ଓ ଫାଟୁସିନେରୀ ସମେତ କୋଟିଆ ପଞ୍ଚାୟତର ପ୍ରାୟ ୨୧ଟି ଗାଁରେ ନିର୍ବାଚନ ପାଇଁ ପଦକ୍ଷେପ ନେଇଛି। ଅନ୍ୟପଟେ, କୋଟିଆର ସମସ୍ତ ୨୮ଟି ଗାଁ ଓଡ଼ିଶାର ବୋଲି ରାଜ୍ୟ ସରକାରଙ୍କ ଦାବି ରହିଛି।

ଏହି ପ୍ରସଙ୍ଗକୁ ନେଇ ଓଡ଼ିଶା ସରକାର ସୁପ୍ରିମକୋର୍ଟରେ ଅଦାଲତ ଅବମାନନା ଆବେଦନ ଦାଖଲ କରିଛନ୍ତି। ୧୯୬୮ର ମାମଲା ସହ ଜଡ଼ିତ ୨୦୦୬ର ସ୍ଥିତାବସ୍ଥା ଆଦେଶ ଉଲ୍ଲଂଘନ ହୋଇଥିବା ଓଡ଼ିଶା ପକ୍ଷରୁ ଅଭିଯୋଗ କରାଯାଇଛି।

୨,୭୦୦ ଭୋଟରଙ୍କୁ ନେଇ ନଜର

ସମ୍ପୃକ୍ତ MPTC ଆସନଗୁଡ଼ିକ ପାଇଁ ଆନ୍ଧ୍ରପ୍ରଦେଶର ଭୋଟର ତାଲିକାରେ ପ୍ରାୟ ୨,୭୦୦ ଭୋଟରଙ୍କ ନାମ ଥିବା ଜଣାପଡ଼ିଛି। କେତେକ ବାସିନ୍ଦାଙ୍କ ପାଖରେ ଉଭୟ ରାଜ୍ୟର ଭୋଟର ପରିଚୟପତ୍ର, ରାସନ କାର୍ଡ ଓ ଆଧାର କାର୍ଡ ଥିବା ମଧ୍ୟ ରିପୋର୍ଟରେ ଉଲ୍ଲେଖ ରହିଛି।

ନିର୍ବାଚନ ତାରିଖ ଦୁଇ ଦିନ ଘୁଞ୍ଚିଥିଲେ ମଧ୍ୟ କୋଟିଆକୁ ନେଇ ଦୁଇ ରାଜ୍ୟ ମଧ୍ୟରେ ଥିବା ସୀମା ବିବାଦର ସମାଧାନ ହୋଇନାହିଁ। ଏବେ ନିର୍ବାଚନ ପ୍ରକ୍ରିୟା କେଉଁ ଦିଗକୁ ଯାଉଛି ଏବଂ ଏହାକୁ ନେଇ ଆଗକୁ କି ପଦକ୍ଷେପ ନିଆଯାଉଛି, ତାହା ଉପରେ ସମସ୍ତଙ୍କ ନଜର ରହିଛି।