ଭୁବନେଶ୍ୱର: ରାଜ୍ୟ ସରକାର ରାଜ୍ୟବାସୀଙ୍କ ସ୍ୱାସ୍ଥ୍ୟକୁ ନେଇ ଚିନ୍ତା ପ୍ରକଟ କରିଛନ୍ତି । ଉତ୍ତମ ସ୍ୱାସ୍ଥ୍ୟ ଏବଂ ସ୍ୱାସ୍ଥ୍ୟକର ଖାଦ୍ୟ ଅଭ୍ୟାସ ଗୁରୁତ୍ୱ ଦେଇଛି ମହିଳା ଓ ଶିଶୁ ବିକାଶ ବିଭାଗ । ଆମେ ଦୈନନ୍ଦିନ ଜୀବନରେ ଖାଉଥିବା ତେଲ ଜାତୀୟ ଖାଦ୍ୟ ଯଥା ବରା, ପକୁଡ଼ି, ସିଙ୍ଗଡ଼ା ଆଦିରେ କେତେ ଚର୍ବି ଏବଂ ତେଲ ଅଛି ସେ ସମ୍ବନ୍ଧରେ ସମସ୍ତେ ଅବଗତ ହେବେ । ଏଥିପାଇଁ ସାର୍ବଜନୀନରେ ସ୍ଥାନରେ ବୋର୍ଡରେ ତେଲ ସମ୍ପର୍କରେ ଉଲ୍ଲେଖ କରିବାକୁ ବିଭାଗ ସମସ୍ତ ଜିଲ୍ଲାପାଳମାନଙ୍କୁ ଚିଠି ଲେଖିଛି । 

ମହିଳା ଓ ଶିଶୁ ବିକାଶ ବିଭାଗ ଛୋଟ ପିଲା, କିଶୋରୀ, ଯତ୍ନ ନେଉଥିବା ବ୍ୟକ୍ତି ଏବଂ ଗୋଷ୍ଠୀର ସୁସ୍ଥ ସ୍ୱାସ ଖାଦ୍ୟ ଅଭାସକୁ ପ୍ରୋତ୍ସାହିତ କରିବା ଉପରେ ଗୁରୁତ୍ୱ ଦେଇଛି ।ବିଭିନ୍ନ ସାର୍ବଜନୀନ ମଞ୍ଚରେ ତେଲ ବୋର୍ଡ ପ୍ରଦର୍ଶନ କରିବାକୁ ବିଭାଗ ନିଷ୍ପତ୍ତି ନେଇଛି । ଏହି ବୋର୍ଡଗୁଡ଼ିକ ଅଙ୍ଗନବାଡ଼ି କେନ୍ଦ୍ର, ସିସିଆଇ, ୱାନ୍ ଷ୍ଟପ୍ ସେଣ୍ଟର, ଶକ୍ତି ସଦନ ଏବଂ ସଖୀ ନିବାସ ଏବଂ ଅନ୍ୟାନ୍ୟ ଆବାସିକ ପ୍ରତିଷ୍ଠାନରେ ତେଲର ସମ୍ବନ୍ଧରେ ଉଲ୍ଲେଖ କରିବାକୁ ନିର୍ଦ୍ଦେଶ ଦେଇଛି । ଖାଦ୍ୟରେ ରହିଥିବା ଚର୍ବି ଏବଂ ତେଲ ସମ୍ବନ୍ଧରେ ପ୍ରାଞ୍ଜଳଭାବରେ ଉଲ୍ଲେଖ କରାଯିବ ।  ଯାହା ଦ୍ଵାରା ମେଦ ବହୁଳତା ଏବଂ ସଂକ୍ରାମକ ରୋଗ ବୃଦ୍ଧି ବିରୁଦ୍ଧରେ ମୁକାବିଲା କରାଯାଇ ପାରିବ । 

ଆଚରଣଗତ ପରିବର୍ତ୍ତନକୁ ସୁଦୃଢ଼ କରିବା ପାଇଁ ସ୍ୱାସ୍ଥ୍ୟ-ପ୍ରୋତ୍ସାହିତ ବାର୍ତ୍ତା ମୁଦ୍ରଣ ଏବଂ ପ୍ରଦର୍ଶନ କରିବାକୁ କୁହାଯାଇଛି । ସମ୍ବନ୍ଧିତ ପ୍ରତିଷ୍ଠାନରେ ଉପଲବ୍ଧ ଆକସ୍ମିକ ପାଣ୍ଠିରୁ ଏହି ଉଦ୍ଦେଶ୍ୟ ପାଇଁ ଆବଶ୍ୟକ ପାଣ୍ଠି ମଧ୍ୟ ପ୍ରଦାନ କରାଯିବ । ତେଲ ବୋର୍ଡ ଲଗାଇବା ପାଇଁ ତୁରନ୍ତ ପଦକ୍ଷେପ ନେବାକୁ ନିର୍ଦ୍ଦେଶ ଦିଆଯାଇଛି ।