ବାଲେଶ୍ୱର: ଜିଲ୍ଲାରେ ସୋର ବ୍ଲକରେ ବାଲି ଓ ଖଣି ମାଫିଆଙ୍କ ଉପରେ ପ୍ରହାର କରିଛି ବ୍ଲକ୍ ପ୍ରଶାସନ । ପଥର ଓ ବାଲି ଚୋରା ଚାଲାଣ ହେଉଥିବାବେଳେ ୧୫ଟି ଟ୍ରକକୁ ଜବତ କରାଯାଇଛି । ଯେଉଁଥିରେ ୧୦ଟି ପଥର ଓ ୫ଟି ବାଲି ବୋଝେଇ ଟ୍ରକ୍ ରହିଛି ।
ସୂଚନା ଅନୁସାରେ ଗତକାଲି ରାତିରେ ସୋର ପୋଲିସ, ତଦସିଲଦାର ଏବଂ ଖଣି ବିଭାଗ ପକ୍ଷରୁ ବଡ଼ ଧରଣର ଚଢ଼ଉ ହୋଇଛି । ବାଗୁଡିରୁ ପଥର ଚୋରା ଚାଲାଣର ଖବର ପାଇ ବାଲେଶ୍ୱର ଖଣି ବିଭାଗ ପକ୍ଷରୁ ବିଦୁ ନିକଟରେ ଚଢ଼ାଉ କରାଯାଇଥିଲା । ଏହି ସମୟରେ ୧୦ଟି ପଥର ବୋଝେଇ ଗାଡ଼ିକୁ ଖଣି ବିଭାଗ ପକ୍ଷରୁ ଜବତ କରାଯାଇ ଥାନାରେ ଜିମା ଦିଆଯାଇଛି। ସେପଟେ ସୋର ତହସିଲଦାର ଦୈତାରି ମଲ୍ଲିକ ବିଳମ୍ବିତ ରାତିରେ ଜାତୀୟ ରାଜପଥ ରୁଷୋ ଛକ ନିକଟସ୍ଥ ତଳନଗର ଦୁଇଟି ପଥର ବୋଝେଇ ଗାଡ଼ିକୁ ଧରିଥିଲେ । ଏହି ସମୟରେ ବେଆଇନ ଭାବେ ଚାଲାଣ ହେଉଥିବା ୫ଟି ବାଲି ବୋଝେଇ ଟ୍ରକକୁ ମଧ୍ୟ ଜବତ କରିଥିଲେ । ବୈତରଣୀ ନଦୀ ପଠାରୁ ବାଲି ଉଠାଇ ଆନନ୍ଦପୁରରୁ ଚୋରା ଚାଲାଣ କରାଯାଉଥିଲା ବୋଲି ପ୍ରାଥମିକ ସୂତ୍ରରୁ ଜଣାପଡ଼ିଛି ।
ଗତକିଛି ଦିନ ତଳେ ଜଗତସିଂହପୁର ଜିଲ୍ଲାର ବାଲିପାଟଣା ଅନ୍ତର୍ଗତ କିଲିପାଳରେ ଏକ ବଡ଼ ଧରଣର ଚଢ଼ଉ ହୋଇଥିଲା । ଜିଲ୍ଲା ପ୍ରଶାସନ ଚଢ଼ଉ କରି ୬୦ରୁ ଉର୍ଦ୍ଧ୍ୱ ବାଲି ବୋଝେଇ ଟ୍ରକ୍ ଜବତ କରିଥିଲେ ।