ଭୁବନେଶ୍ୱର : ଶୀତ ପ୍ରକୋପରେ ସାମାନ୍ୟ ହ୍ରାସ। ଅଧିକାଂଶ ସ୍ଥାନରେ ରାତି ତାପମାତ୍ରା ବୃଦ୍ଧି ପାଇଛି। ବର୍ତ୍ତମାନ ତାପମାତ୍ରାରେ ଆସନ୍ତା ୪ ଦିନ ପର୍ଯ୍ୟନ୍ତ ବିଶେଷ ପରିବର୍ତ୍ତନ ହେବାର ସମ୍ଭାବନା ନାହିଁ। ଆସନ୍ତା ୪ ଦିନ ଭିତରେ ସର୍ବନିମ୍ନ ତାପମାତ୍ରା ବର୍ତ୍ତମାନ ତୁଳନାରେ ୨ରୁ ୩ ଡିଗ୍ରୀ କମିପାରେ। ଏନେଇ ଭୁବନେଶ୍ୱର ପାଣିପାଗ କେନ୍ଦ୍ର  ପୂର୍ବାନୁମାନ କରିଛି ।ରାଜ୍ୟରେ ପାଗ ବର୍ତ୍ତମାନ ଶୁଖିଲା ରହିଛି। ଆସନ୍ତା ଡିସେମ୍ବର ୬ ତାରିଖ ପର୍ଯ୍ୟନ୍ତ ଜାରି ହୋଇଥିବା ପୂର୍ବାନୁମାନରେ ପାଗ ଶୁଖିଲା ରହିବ। ଏବେ ବର୍ଷା ନେଇ କୌଣସି ସୂଚନା ଦିଆଯାଇନାହିଁ। ଡିସେମ୍ବର ପ୍ରଥମ ସପ୍ତାହରେ ପାଗ ଶୁଖିଲା ରହିବ।

ଶୁକ୍ରବାର ରାତିରେ ଜି.ଉଦୟଗିରିରେ ସର୍ବନିମ୍ନ ତାପମାତ୍ରା ୮.୩ ଡିଗ୍ରୀ ସେଲସିୟସ୍ ଓ ସେମିଳିଗୁଡ଼ାରେ ୯.୬ ଡିଗ୍ରୀ ରେକର୍ଡ ହୋଇଥିବାବେଳେ ବାକି କୌଣସି ସ୍ଥାନରେ ପାରଦ ୧୦ ଡିଗ୍ରୀ ତଳେ ନଥିଲା । ଦାରିଙ୍ଗିବାଡ଼ି ତାପମାତ୍ରା ୧୦ ଡିଗ୍ରୀ, ଫୁଲବାଣୀ ୧୦, କୋରାପୁଟ ୧୦.୨, ଝାରସୁଗୁଡ଼ା ୧୦.୪, ନବରଙ୍ଗପୁର ୧୦.୮, ରାଉରକେଲା ୧୧, ଚିପିଲିକା ୧୧.୪, କିରେଇ ୧୧.୬, ସୁନ୍ଦରଗଡ଼ ୧୨.୨, କେନ୍ଦୁଝର ୧୨.୮ ଡିଗ୍ରୀ ରେକର୍ଡ କରାଯାଇ ଥିଲା । ଉପକୂଳ ଅଞ୍ଚଳରେ ତାପମାତ୍ରା ବଢ଼ିଥିବାବେଳେ ଭୁବନେଶ୍ୱର ୧୭.୨ ଓ କଟକ ୧୬ ଡିଗ୍ରୀ ରେକର୍ଡ କରାଯାଇଥିଲା । 

ଅଧିକ ପଢନ୍ତୁ : ଦିଲ୍ଲୀର ସଙ୍ଗମ ବିହାରରେ ଅଗ୍ନିକାଣ୍ଡ