ଭଦ୍ରକ: ଭଦ୍ରକ ଜିଲ୍ଲା ବିଜୁ ଜନତା ଦଳକୁ ଲାଗିଛି ଶକ୍ତ ଝଟକା । ଭଶୁଡ଼ୁଛି ବିଜେଡ଼ି ଗଡ଼ । ଜିଲ୍ଲାର ତିନି ତିନି ଜଣ ବ୍ଲକ୍ ଅଧ୍ୟକ୍ଷା ଦଳରୁ ଇସ୍ତଫା ଦେଇଛନ୍ତି । ଆଉ ଏମାନଙ୍କୁ ଦଳରେ ଅଟକାଇ ରଖିବାକୁ ବିଜେଡ଼ି ଆପଣାଇଥିବା ସମସ୍ତ କଳବଳ କୌଶଳ ବିଫଳ ହୋଇଛି । ସେମାନେ ହେଲେ ବନ୍ତ ବ୍ଲକ୍‌ ଅଧ୍ୟକ୍ଷ ମନୋରଞ୍ଜନ ଘଡ଼େଇ, ଭଦ୍ରକ ବ୍ଲକ୍ ଅଧ୍ୟକ୍ଷା ଉର୍ମିଳା ନାୟକ ଏବଂ ଭଣ୍ଡାରୀପୋଖରୀ ବ୍ଲକ୍ ଅଧ୍ୟକ୍ଷା ସୁମତୀ ସେଠୀ । ଆଗକୁ ଏହି ସଂଖ୍ୟା ଆହୁରି ବଢ଼ିବାର ମଧ୍ୟ ଆଲୋଚନା ହେଉଛି ।

ପ୍ରଥମେ ବନ୍ତ ବ୍ଲକ୍ ଅଧ୍ୟକ୍ଷ ମନୋରଞ୍ଜନ ଘଡ଼େଇ ଦଳ ଛାଡ଼ିଥିଲେ । ନିଜର ଇସ୍ତଫାପତ୍ର ଭଦ୍ରକ ଜିଲ୍ଲା ସଭାପତି ଜଗନ୍ନାଥ ସ୍ୱାଇଁ ନିକଟକୁ ପଠାଇ ଦେଇଥିଲେ । ଏହାର ଚର୍ଚ୍ଚା ଜୋର ଧରିଥିବାବେଳେ ଉର୍ମିଳା ନାୟକ ଓ ସୁମତୀ ସେଠୀ ଆଉ ଏକ ଝଟକା ଦେଇଥିଲେ । ସମସ୍ତେ ବ୍ୟକ୍ତିଗତ କାରଣ ଦର୍ଶାଇ ଦଳରୁ ଇସ୍ତଫା ଦେଇଛନ୍ତି । ତେବେ ଏମାନେ ଖୁବଶୀଘ୍ର ବିଜେପି ଦଳରେ ଯୋଗ ଦେଇପାରନ୍ତି । 

ଦଳ ବିରୋଧୀ କାର୍ଯ୍ୟ ପାଇଁ ଭଦ୍ରକ ଜିଲ୍ଲା ବନ୍ତ ଅଧ୍ୟକ୍ଷ ମନୋରଞ୍ଜନ ଘଡ଼େଇଙ୍କୁ ଦଳ ନିଲମ୍ୱିତ କରିଛି ବୋଲି ବିଜେଡ଼ି କହିଥିଲା । ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ତାଙ୍କୁ ଦଳରୁ ନିଲମ୍ବନ କରାଯାଇଥିବା ଦଳର ରାଜ୍ୟ ଉପସଭାପତି ପ୍ରତାପ ଜେନା ଏକ ପ୍ରେସ୍‌ ବିବୃତିରେ ସୂଚନା ଦେଇଛନ୍ତି ।

ପ୍ରକାଶ ଯୋଗ୍ୟ, ଗତ କିଛି ଦିନ ତଳେ ସୁମତୀ ସେଠୀ ବିଜେପିରେ ମିଶିବେ ବୋଲି ଦରଖାସ୍ତ ଜରିଆରେ ନିବେଦନ କରିଥିଲେ । ଏହା ପରେ ତାଙ୍କୁ ରାତି ଅଧରେ ଧମକ ଦିଆଯାଇଥିବା ନେଇ ସେ ଭଣ୍ଡାରୀପୋଖରୀ ଥାନାରେ ଅଭିଯୋଗ ମଧ୍ୟ କରିଥିଲେ । କିଛି ଦୁର୍ବୃତ୍ତ ତାଙ୍କ ଘର ଉପରକୁ ପଥର ମାଡ଼ ମାରିବା ସହିତ ଅଶ୍ଳୀଳ ଭାଷାରେ ଗାଳି ଗୁଲଜ କରୁଥିବା ସେ କହିଥିଲେ ।