ନୂଆଦିଲ୍ଲୀ: ଭାରତୀୟ ଦଳର ବିସ୍ଫୋରକ ଓପନର ଅଭିଷେକ ଶର୍ମା ସୟଦ ମୁସ୍ତାକ ଅଲ୍ଲୀ ଟ୍ରଫି ୨୦୨୫ରେ ଧମାଲ କରୁଛନ୍ତି । ସେ ପଶ୍ଚିମବଙ୍ଗ ବିପକ୍ଷ ମ୍ୟାଚରେ ୧୨ ବଲରେ ଅର୍ଦ୍ଧଶତକ ଏବଂ ପରବର୍ତ୍ତୀ ୨୦ ବଲରେ ଶତକ ପୂରା କରିଛନ୍ତି । ୧୨ ବଲରେ ଅର୍ଦ୍ଧଶତକ ହାସଲ କରି ଅଭିଷେକ ନିଜ ଗୁୁରୁ ଯୁବରାଜ ସିଂଙ୍କ ରେକର୍ଡର ସମକକ୍ଷ ହୋଇଛନ୍ତି । ସେ ୩୨ ବଲରେ ଶତକ ମାରି ଭାରତ ପାଇଁ ଟି-୨୦ରେ ସବୁଠୁ ଦ୍ରୁତତମ ଶତକ ହାସଲ କରିବାରେ ଋଷଭ ପନ୍ତଙ୍କ ବରାବରି କରିଛନ୍ତି । ଏହି ଇନିଂସରେ ଅଭିଷେକଙ୍କ ଷ୍ଟ୍ରାଇକ ରେଟ୍ ୩୦୦ ଉପରେ ଥିଲା ।
ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ପଞ୍ଜାବ ପାଇଁ ଇନିଂସ ଓପନ କରିଥିଲେ ଅଭିଷେକ ଶର୍ମା ଓ ପ୍ରଭସିମରନ ସିଂ । ପ୍ରଭସିମରନ ସିଂଙ୍କ ମେଣ୍ଟର ମଧ୍ୟ ଯୁବରାଜ ସିଂ । ଦୁଇ ବ୍ୟାଟର ପଶ୍ଚିମବଙ୍ଗ ବୋଲରଙ୍କୁ ନିର୍ମମ ପ୍ରହାର କରି ପ୍ରଥମ ୧୦ ଓଭରରେ ୧୬୩ ରନ ଯୋଡିଥିଲେ ।
ଟି-୨୦ରେ ଭାରତ ପାଇଁ ସବୁଠୁ ଦ୍ରୁତତମ ଶତକ ହାସଲ କରିବାରେ ଅଭିଷେକ ଏହି ବିସ୍ଫୋରକ ଇନିଂସ ଜରିଆରେ ଋଷଭ ପନ୍ତଙ୍କ ସମକକ୍ଷ ହୋଇଛନ୍ତି । ଭାରତ ପାଇଁ ଦ୍ରୁତତମ ଶତକ ହାସଲ କରିବାର ରେକର୍ଡ ଉର୍ଭିଲ ପଟେଲ ଓ ଅଭିଷେକଙ୍କ ନାଁରେ ରହିଛି । ଉଭୟ ୨୦୨୪ ଏହି ସୈୟଦ ମୁସ୍ତାକ ଅଲ୍ଲୀ ଟୁର୍ଣ୍ଣାମେଣ୍ଟରେ ୨୮-୨୮ ବଲରେ ଶତକ ହାସଲ କରିଥିଲେ । ଉଲ୍ଲେଖନୀୟ ଉର୍ଭିଲ ପଟେଲ ଚଳିତ ଏହି ଟୁର୍ଣ୍ଣାମେଣ୍ଟରେ ୩୧ ବଲରେ ଶତକ ହାସଲ କରି ସାରିଛନ୍ତି ।
ଭାରତ ପାଇଁ ଘରୋଇ ଟୁର୍ଣ୍ଣାମେଣ୍ଟରେ ଦ୍ରୁତତମ ଶତକ ହାସଲ କରିଥିବା ବ୍ୟାଟର
ଉର୍ଭିଲ ପଟେଲ- ୨୮
ଅଭିଷେକ ଶର୍ମା- ୨୮
ଉର୍ଭିଲ ପଟେଲ- ୩୧
ଋଷଭ ପନ୍ତ- ୩୨
ଅଭିଷେକ ଶର୍ମା- ୩୨
ବୈଭବ ସୂର୍ଯ୍ୟବଂଶୀ- ୩୨
ସେହିପରି ଭାରତ ପାଇଁ ଟି-୨୦ ଘରୋଇ ସିଜିନରେ ସବୁଠୁ ଦ୍ରୁତ ଅର୍ଦ୍ଧଶତକ ହାସଲ କରିବାର ରେକର୍ଡ ଆଶୁତୋଷ ଶର୍ମାଙ୍କ ନାମରେ ରହିଛି । ଆଶୁତୋଷ ଅରୁଣାଚଳ ପ୍ରଦେଶ ବିପକ୍ଷରେ ୨୦୨୩ରେ ୧୧ ବଲରୁ ଅର୍ଦ୍ଧଶତକ ହାସଲ କରି ଯୁବରାଜ ସିଂଙ୍କ ରେକର୍ଡ ଭାଙ୍ଗିଥିଲେ ।
ଭାରତ ପାଇଁ ଟି-୨୦ରେ ସବୁଠୁ ଦ୍ରୁତ ଅର୍ଦ୍ଧଶତକ
ଆଶୁତୋଷ ଶର୍ମା- ୧୧
ଯୁବରାଜ ସିଂହ- ୧୨
ଅଭିଷେକ ଶର୍ମା- ୧୨
ଯଶସ୍ୱୀ ଜୟସ୍ୱାଲ- ୧୩
Also read: ରାଞ୍ଚି ଦିନିକିଆ, ଟସ୍ ଜିତି ଦକ୍ଷିଣ ଆଫ୍ରିକାର ବୋଲିଂ ନିଷ୍ପତ୍ତି, ବ୍ୟାଟିଂ କରିବ ଭାରତ