ଭୁବନେଶ୍ୱର: ଯେଉଁ ଶିକ୍ଷକତାରୁ ଦିନେ ମୁଖ୍ୟମନ୍ତ୍ରୀ ହୋଇଥିଲେ ଆଜି ସେହି ପୁରୁଣା ଦିନକୁ ଫେରିଛନ୍ତି ମୋହନ ଚରଣ ମାଝୀ । ପିଲାଙ୍କ ସହିତ ବିଶେଷ ମୁହୂର୍ତ୍ତ ବିତାଇବା ସହିତ ବିଭିନ୍ନ ପ୍ରଶ୍ନ ପଚାରିଛନ୍ତି । ଆଉ ପିଲାଙ୍କୁ ମଧ୍ୟାହ୍ନ ଭୋଜନ ପରଷିଛନ୍ତି ମୁଖ୍ୟମନ୍ତ୍ରୀ । 

ଆଜିଠାରୁ ଆନୁଷ୍ଠାନିକଭାବେ ରାଜ୍ୟରେ ଜାତୀୟ ଶିକ୍ଷା ନୀତି ୨୦୨୦ ଲାଗୁ ହୋଇଛି । ମୁଖ୍ୟମନ୍ତ୍ରୀ ଏହାର ଶୁଭାରମ୍ଭ କରିଛନ୍ତି । ଭୁବନେଶ୍ୱରସ୍ଥିତ ବଡ଼ଗଡ଼ ହାଇସ୍କୁଲରେ ଶିଶୁ ବାଟିକାର ଶୁଭାରମ୍ଭ କରିବା ସହିତ ପିଲାଙ୍କର ଖଡ଼ିଛୁଆଁ ମଧ୍ୟ କରାଇଛନ୍ତି ମୁଖ୍ୟମନ୍ତ୍ରୀ । ଏହି ସମୟରେ ମୁଖ୍ୟମନ୍ତ୍ରୀ କୁନି କୁନି ପିଲାଙ୍କ ସହିତ କିଛି ବିଶେଷ ମୁହୂର୍ତ୍ତ ବିତାଇଛନ୍ତି । ପିଲାଙ୍କ ହାତ ଧରି  ବ୍ରହ୍ମା, ବିଷ୍ଣୁ ଏବଂ ମହେଶ୍ୱର ଲେଖାଇଥିଲେ । ଏହା ପରେ ପିଲାଙ୍କୁ ମଜାଳିଆ ପ୍ରଶ୍ନ ପଚାରିଥିଲେ ଏବଂ ସେମାନଙ୍କ ସହିତ ଆଲୋଚନା କରିବା ସହିତ ବ୍ୟାଗ୍ ଏବଂ ଚକୋଲେଟ୍ ବାଣ୍ଟିଛନ୍ତି । ଏହା ପରେ ମୁଖ୍ୟମନ୍ତ୍ରୀ ନବମ ଓ ଦଶମ ପିଲାଙ୍କୁ ମଧ୍ୟାହ୍ନ ଭୋଜନ ପରଷି ଥିଲେ ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀଙ୍କ ସହିତ ମେୟର ସୁଲୋଚନା ଦାସ, ବିଧାୟକ ବାବୁ ସିଂ, ସଚିବ ଶାଳୀନ ପଣ୍ଡିତ ପ୍ରମୁଖ ମଧ୍ୟାହ୍ନ ଭୋଜନ ବାଣ୍ଟିଥିଲେ । 

ମୁଖ୍ୟମନ୍ତ୍ରୀ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ ଆଜି ଆମ ଓଡ଼ିଆ ଘରର ପରମ୍ପରା ଅନୁସାରେ ଖଡ଼ିଛୁଆଁ ଉତ୍ସବ କରାଯାଇଛି । ପିଲାମାନେ ଅତି ଖୁସିରେ ପାଠ ପଢ଼ିଥିଲେ । ଶିଶୁ ବାଟିକାରେ ପ୍ରାକ୍ଟିକାଲ୍ ଭାବରେ ପାଠ ପଢ଼ିବେ । ବିଭିନ୍ନ ଖେଳନା, ଖେଳ ସାମଗ୍ରୀ, ପଜଲ୍ ମାଧ୍ୟମରେ ପିଲାମାନେ ପାଠ ପଢ଼ିଲେ ସେମାନଙ୍କ ମାନସିକ ସ୍ତରରେ ବୃଦ୍ଧି ଘଟିବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ସେହିପରି ନବମ ଓ ଦଶମ ପିଲାଙ୍କୁ ମଧ୍ୟାହ୍ନ ଭୋଜନ ଦିଆଯାଇଛି । ଏହା ନିଶ୍ଚିତ ଫଳପ୍ରଦ ହେବ ବୋଲି ମୁଖ୍ୟମନ୍ତ୍ରୀ ଆଶାବ୍ୟକ୍ତ କରିଛନ୍ତି । ଏହା ଶିକ୍ଷାର ଭିତ୍ତି ପ୍ରସ୍ତର ସ୍ଥାପନ କରିବ । 

ଜାତୀୟ ଶିକ୍ଷାନୀତି ୨୦୨୦ ଅଧୀନରେ ଆଜିଠାରୁ ଶିଶୁ ବାଟିକା ବା ପ୍ରାକ୍  ପ୍ରାଥମିକ ଶ୍ରେଣୀ ଶିକ୍ଷା ଆରମ୍ଭ କରାଯାଇଛି । ୨୦୨୫-୨୬ ଶିକ୍ଷା ବର୍ଷରୁ ସବୁ ପ୍ରାଥମିକ ବିଦ୍ୟାଳୟରେ ଗୋଟିଏ ଲେଖାଏ ଶିଶୁ ବାଟିକା ଖୋଲାଯିବ । ଏହି ସବୁ ଶିଶୁ ବାଟିକାରେ ୫ରୁ ୬ ବର୍ଷ ବୟସର ପିଲାମାନେ ପ୍ରାକ୍ ବିଦ୍ୟାଳୟ ଶିକ୍ଷା ଗ୍ରହଣ କରିବେ । ଶିଶୁ ବାଟିକାର ପିଲା ମାନଙ୍କୁ ଶିକ୍ଷଣୀୟ ସାମଗ୍ରୀ କିଟ୍ ଯୋଗାଇ ଦିଆଯାଇ ମନୋରଞ୍ଜନ ଧର୍ମୀ ଶିକ୍ଷା ପ୍ରଦାନ କାର୍ଯ୍ୟକ୍ରମ ଜରିଆରେ ଶିକ୍ଷା ପ୍ରତି ଆକୃଷ୍ଟ କରାଯିବ । ପ୍ରାଥମିକ ଶିକ୍ଷା କ୍ଷେତ୍ରକୁ ସୁଦୃଢ କରିବା ଏହି କାର୍ଯ୍ୟକ୍ରମର ମୂଳ ଉଦ୍ଦେଶ୍ୟ ।