ବଲାଙ୍ଗୀର: ଦେବଶିଳ୍ପୀ ବିଶ୍ଵକର୍ମାଙ୍କ ପୂଜା ଚାରିଆଡ଼େ ପାଳିତ ହୋଇଯାଇଛି। ଏହି ପୂଜାରେ ସମସ୍ତେ ଯାନବାହାନ, ଯନ୍ତ୍ରାଂଶ ଆଦି ସାମଗ୍ରୀକୁ ପୂଜାକରିଛନ୍ତି। ଇତି ମଧ୍ୟରେ ଏଭଳି ଏକ ଚିତ୍ର ସାମ୍ନାକୁ ଆସିଛି ଯାହା ଲୋକଙ୍କୁ ବେଶ ମନୋରଞ୍ଜିତ କରୁଛି। ଘରର ବଡ ମାନଙ୍କୁ ଗାଡ଼ି ମୋଟର ପୂଜା କରୁଥିବା ଦେଖି ଏକ ଶିଶୁ ତାର ଖେଳଣା ଗାଡ଼ିକୁ ମଧ୍ୟ ପୂଜା କରୁଥିବାର ଦେଖିବାକୁ ମିଳିଛି। 

ବଲାଙ୍ଗିର ସହର ରୁଗୁଡିପଡ଼ାର ଶୁଭକାକ୍ଷୀଂ ବେହେରା ଏବଂ ପ୍ରିୟବ୍ରତ ବେହେରାଙ୍କ ଦେଢ଼ ବର୍ଷର କୁନି ପୁଅ ଦେବାଂଶୁ ବେହେରାଙ୍କ ପୂଜା କରିବାର ଭିଡିଓ ଟି ସାମାଜିକ ଗଣ ମାଧ୍ୟମରେ ବେଶ ଭାଇରାଲ୍ ହେବାରେ ଲାଗିଛି। ଶିଶୁଟି ଅତି ଆନନ୍ଦର ସହିତ ନିଜର ଖେଳନା ଗାଡ଼ିକୁ ପୂଜା କରୁଛି। କଥା କହି ଜାଣୁ ନଥିଲେ ବି ଗୁଣୁଗୁଣୁ ହୋଇ ମନ୍ତ୍ର ପଢୁଛି। ଶଙ୍ଖ ଫୁଙ୍କି, ଘଣ୍ଟି ବଜାଇ ଗାଡ଼ିକୁ ପୂଜା କରୁଛି। ଶିଶୁର ଏହି କାର୍ଯ୍ୟକଳାପକୁ ପରିବାର ଲୋକେ ମୋବାଇଲରେ କଏଦ କରିଥିବା ବେଳେ ତାହା ଏବେ ବେଶ ଭାଇରାଲ ହେବାରେ ଲାଗିଛି।