ନୂଆଦିଲ୍ଲୀ: ଏୟାର ଇଣ୍ଡିଆ ବିମାନରେ ବାରମ୍ବାର ଯାନ୍ତ୍ରିକ ତ୍ରୁଟି  ପରିଲକ୍ଷିତ ହେଉଥିବାବେଳେ ଚେତୁ ନାହାଁନ୍ତି କମ୍ପାନୀ କର୍ତ୍ତୃପକ୍ଷ । ନିଜେ ବିମାନରେ ଅସୁବିଧାର ସମ୍ମୁଖୀନ ହେବା ପରେ କ୍ଷୋଭ ପ୍ରକାଶ କରିଛନ୍ତି ବିଜେପି ସାଂସଦ ଭର୍ତ୍ତୃହରି ମହତାବ । ଏ ନେଇ କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀଙ୍କୁ ଭେଟି ଅଭିଯୋଗ କରିଛନ୍ତି ସାଂସଦ ମହତାବ ।   

ଜୁଲାଇ ୨୬ ତାରିଖରେ ସାଂସଦ ଭର୍ତ୍ତୃହରି ମହତାବ ଏୟାର ଇଣ୍ଡିଆ ବିମାନରେ ଦିଲ୍ଲୀ ଯାତ୍ରା କରୁଥିଲେ । ତାଙ୍କ ସହିତ ଓଡ଼ିଶାର ଆଉ ୪ ଜଣ ସାଂସଦ ମଧ୍ୟ ଯାତ୍ରା କରୁଥିଲେ । ଏୟାର ଇଣ୍ଡିଆ ପ୍ରାୟ ଏକ ଘଣ୍ଟା ବିଳମ୍ବରେ ଉଡ଼ାଣ ଆରମ୍ଭ କରିଥିଲା । କିନ୍ତୁ ବିମାନରେ ଏସି କାମ କରୁନଥିବାବେଳେ କ୍ୟାବିନରେ ତାପମାତ୍ରା ରେ ସମସ୍ୟା ଥିଲା । ଏ ନେଇ ସାଂସଦ ବିଭାଗୀୟ ମନ୍ତ୍ରୀ  ରାମମୋହନ ନାଇଡୁଙ୍କୁ ଭେଟିଛନ୍ତି । ଏୟାର ଇଣ୍ଡିଆ ଡିଜିସଏର ନିୟମ ଉଲ୍ଲଂଘନ କରୁଥିବା ସେ କହିଛନ୍ତି । ଘଟଣାର ତଦନ୍ତ କରି ଏହାର ସମାଧାନ ବାହାର କରିବାକୁ ସେ କେନ୍ଦ୍ରମନ୍ତ୍ରୀଙ୍କୁ ଅନୁରୋଧ କରିଛନ୍ତି ।  

ଶ୍ରୀଯୁକ୍ତ ମହତାବ କହିଛନ୍ତି, ମାତ୍ର ଦୁଇ ସପ୍ତାହ ମଧ୍ୟରେ, ଦିଲ୍ଲୀ ଏବଂ ଭୁବନେଶ୍ୱର ମଧ୍ୟରେ ଏୟାର ଇଣ୍ଡିଆର ବିମାନଗୁଡ଼ିକ ତିନୋଟି ବିଳମ୍ବ ଏବଂ ଗୋଟିଏ ବାତିଲର ସମ୍ମୁଖୀନ ହୋଇଛି, ଯେଉଁଥିରେ ଏୟାର କଣ୍ଡିସନିଂ ବିଫଳତାରୁ କ୍ୟାବିନ ଗରମ ଯୋଗୁଁ ଏକ ଘଟଣା ଅନ୍ତର୍ଭୁକ୍ତ। ଏହା ଯାତ୍ରୀମାନଙ୍କୁ ବଡ଼ ଅସୁବିଧାର ସମ୍ମୁଖୀନ କରୁଛି ଏବଂ ବିମାନ ସୁରକ୍ଷା ଏବଂ ନିର୍ଭରଯୋଗ୍ୟତା ଉପରେ ପ୍ରଶ୍ନ ଉଠାଇଛି । ମାନ୍ୟବର ମନ୍ତ୍ରୀ ଡିଜିସିଏ ମାଧ୍ୟମରେ ଏକ ପୁଙ୍ଖାନୁପୁଙ୍ଖ ତଦନ୍ତ ଏବଂ ଆବଶ୍ୟକୀୟ କାର୍ଯ୍ୟାନୁଷ୍ଠାନ ପାଇଁ ଆଶ୍ୱାସନା ଦେଇଛନ୍ତି । ସମସ୍ତ ଯାତ୍ରୀଙ୍କ ପାଇଁ ଉତ୍ତରଦାୟିତ୍ୱ ଏବଂ ଉତ୍ତମ ସେବା ସୁନିଶ୍ଚିତ କରିବା ପାଇଁ ଆମେ ଏହି ସମସ୍ୟା ଉପରେ ନଜର ରଖିବୁ। ମହତାବଙ୍କ  ସହିତ ଅନ୍ୟ ସାଂସଦଗଣ ମଧ୍ୟ ଉପସ୍ଥିତ ଥିଲେ । 

ତେବେ ଏୟାର ଇଣ୍ଡିଆର ଏହି ଯାନ୍ତ୍ରିକ ସମସ୍ୟା କିଛି ନୂଆ ଘଟଣା ନୁହେଁ । ବାରମ୍ବାର ଏଭଳି ଅଭିଯୋଗ ପୂର୍ବରୁ ମଧ୍ୟ ଆସିଛି । କେତେବେଳେ ଏସି ବନ୍ଦ ହୋଇଯାଇଛି ତ ଆଉ କେତେବେଳେ ବିମାନରେ ସ୍କ୍ରିନ୍ କାମ କରୁ ନ ଥାଏ । ନିକଟରେ ଅହମ୍ମଦାବାଦ ଏୟାର ଇଣ୍ଡିଆ ବିମାନ ଦୁର୍ଘଟଣା ସମସ୍ତଙ୍କୁ ସ୍ତମ୍ଭୀଭୂତ କରିଦେଇଥିଲା ।