ଆସନ୍ତା ବିଶ୍ୱପ୍ରସିଦ୍ଧ ଶ୍ରୀଜଗନ୍ନାଥ ରଥଯାତ୍ରାକୁ ସୁରକ୍ଷିତ, ଶୃଙ୍ଖଳିତ ଏବଂ ନିର୍ବିଘ୍ନ ଭାବେ ସମ୍ପନ୍ନ କରିବା ଲକ୍ଷ୍ୟରେ ପୁରୀରେ ଏକ ଉଚ୍ଚସ୍ତରୀୟ ସମନ୍ୱୟ ବୈଠକ ଅନୁଷ୍ଠିତ ହୋଇଛି। ଏହି ବୈଠକରେ କେନ୍ଦ୍ରାଞ୍ଚଳ ଆଇଜି ଡ଼. ସତ୍ୟଜିତ ନାୟକ ଓ ପୁରୀ ଏସପି ପ୍ରତୀକ ସିଂହ ଯୁଗ୍ମ ଭାବେ ଅଧ୍ୟକ୍ଷତା କରିଥିଲେ।

ବୈଠକରେ ପୋଲିସର ବରିଷ୍ଠ ଅଧିକାରୀମାନଙ୍କ ସହ ବିଭିନ୍ନ ସେବାୟତ ନିଯୋଗର ପ୍ରତିନିଧିମାନେ ଯୋଗଦେଇଥିଲେ। ରଥଯାତ୍ରା ସମୟରେ ପ୍ରଶାସନ ଓ ସେବାୟତମାନଙ୍କ ମଧ୍ୟରେ ଉତ୍ତମ ସମନ୍ୱୟ ରହିବା ସହ ଉତ୍ସବକୁ ଶାନ୍ତିପୂର୍ଣ୍ଣ ଭାବେ ସମାପ୍ତ କରିବା ନେଇ ଆଲୋଚନା ହୋଇଥିଲା।

ପ୍ରତିବର୍ଷ ଲକ୍ଷ ଲକ୍ଷ ଶ୍ରଦ୍ଧାଳୁ ରଥଯାତ୍ରାରେ ଯୋଗଦେଉଥିବାରୁ ଭିଡ଼ ନିୟନ୍ତ୍ରଣକୁ ନେଇ ସ୍ୱତନ୍ତ୍ର କୌଶଳ ପ୍ରସ୍ତୁତ କରାଯାଇଛି। ବଡ଼ଦାଣ୍ଡ ଓ ଆଖପାଖ ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ ଆହୁରି କଡ଼ା କରାଯିବା ସହ ଜରୁରୀକାଳୀନ ପରିସ୍ଥିତି ପାଇଁ ସ୍ୱତନ୍ତ୍ର କରିଡର ବ୍ୟବସ୍ଥା ରହିବ।

ସେହିପରି ରଥଟଣା, ନୀତିକାନ୍ତି ଓ ଅନ୍ୟାନ୍ୟ ଧାର୍ମିକ କାର୍ଯ୍ୟ ନିର୍ଦ୍ଧାରିତ ସମୟରେ ସମ୍ପନ୍ନ ହେବା ଉପରେ ବିଶେଷ ଜୋର ଦିଆଯାଇଥିଲା। ସେବାୟତ ପ୍ରତିନିଧିମାନେ ମଧ୍ୟ ପ୍ରଶାସନକୁ ପୂର୍ଣ୍ଣ ସହଯୋଗ କରିବା ସହ ପରମ୍ପରା ଓ ଶୃଙ୍ଖଳା ରକ୍ଷା ପାଇଁ ପ୍ରତିବଦ୍ଧତା ଜଣାଇଥିଲେ।

ଯାତାୟାତ ନିୟନ୍ତ୍ରଣ, ଟ୍ରାଫିକ ଡାଇଭର୍ସନ, ପାର୍କିଂ ବ୍ୟବସ୍ଥା ଓ ଲୋକଙ୍କ ସୁବିଧା ପାଇଁ ମଧ୍ୟ ବିସ୍ତୃତ ଯୋଜନା ପ୍ରସ୍ତୁତ ହୋଇଛି। ପୋଲିସ ଓ ସେବାୟତମାନଙ୍କ ମଧ୍ୟରେ ନିରନ୍ତର ସୂଚନା ଆଦାନ-ପ୍ରଦାନ ହେଲେ କୌଣସି ବାଧା ସୃଷ୍ଟି ହେବ ନାହିଁ ବୋଲି ଅଧିକାରୀମାନେ ମତ ଦେଇଥିଲେ।

ସମସ୍ତ ପ୍ରସ୍ତୁତିକୁ ନେଇ ପ୍ରଶାସନ ଆଶାବାଦୀ ଥିବା ବେଳେ, ଭକ୍ତମାନଙ୍କ ସୁରକ୍ଷା ଓ ମହାପ୍ରଭୁଙ୍କ ରଥଯାତ୍ରାର ପବିତ୍ରତା ରକ୍ଷା କରିବା ହିଁ ସର୍ବୋଚ୍ଚ ପ୍ରାଥମିକତା ବୋଲି ବୈଠକରେ ସ୍ପଷ୍ଟ କରାଯାଇଛି।