ସାଧାରଣତଃ ଆମ ମାନଙ୍କ ପରିବାରରେ ପିଲାଟିଏ ଜନ୍ମ ହେଲେ ନାମକରଣ କରିବା ସହିତ ଏକୋଇଶିଆ ପାଳନ ହୋଇଥାଏ । ଯେଉଁ ଉତ୍ସବକୁ ସମସ୍ତେ ଭୋଜିଭାତ ସହ ଖୁସିରେ ପାଳନ କରିଥାଆନ୍ତି କିନ୍ତୁ ଅନୁଗୁଳ ଜିଲ୍ଲା ଗୁରଙ୍ଗ ଗାଁରେ ଏକ ହାତୀଛୁଆର ଏକୋଇଶିଆ ପାଳନ କରାଯାଇଛି। ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିବା ସହ ଜଙ୍ଗଲ ସୁରକ୍ଷା ଦିଗରେ ପ୍ରେରଣା ଯୋଗାଇଛି। ଗୋଟିଏ ପଟେ ରାଜ୍ୟରେ ହାତୀ ଶିକାର ହୋଇ ସଙ୍କଟରେ ଥିବାବେଳେ ଏହି ମହାନ ଉଦ୍ୟମ ଗ୍ରାମବାସୀଙ୍କ ବନ୍ୟପ୍ରାଣୀଙ୍କ ପ୍ରତି ଭଲପାଇବାର ଏକ ଉଦାହରଣ ଅଟେ । 

ସୂଚନା ଅନୁଯାୟୀ ଅନୁଗୁଳ ବନାଞ୍ଚଳ ଗୁରଙ୍ଗ ଗାଁର ଲୋକମାନେ ଠେଙ୍ଗା ପାଳି କରି ଦୀର୍ଘ ୪୦ ବର୍ଷ ହେବ ଜଙ୍ଗଲ ସୁରକ୍ଷା କରି ଆସୁଛନ୍ତି। ଫଳରେ ଗାଁ ନିକଟ ଜଙ୍ଗଲରେ ଏବେ ବଡ଼ ବଡ଼ ଶାଳଗଛରେ ପରିପୂର୍ଣ୍ଣ ହୋଇଛି। ଆଉ ଏହି ଜଙ୍ଗଲ ମଧ୍ୟ ବନ୍ୟଜନ୍ତୁଙ୍କ ସୁରକ୍ଷିତ ବାସସ୍ଥଳୀ ପାଲଟିଛି। ତେବେ ଏହି ଜଙ୍ଗଲରେ ୨୧ ଦିନ ପୂର୍ବରୁ ଏକ ହାତୀଛୁଆ ଜନ୍ମ ହୋଇଥିବା ବେଳେ ଗୁରଙ୍ଗ ଗାଁର ଲୋକମାନେ ହାତୀଛୁଆର ଏକୋଇଶିଆ ଆଡ଼ମ୍ବର ସହକାରେ ପାଳନ କରିଛନ୍ତି। ଏଥିପାଇଁ ଆଜି ଗାଁରେ ଭୋଜିଭାତର ଆସର ମଧ୍ୟ ଜମିଥିଲା। ହାତୀଛୁଆର ଦୀର୍ଘ ଜୀବନ କାମନା କରି ସେମାନେ ତ୍ରିନାଥ ମେଳା ଆୟୋଜିତ କରିବା ସହିତ ହୋମଯଜ୍ଞ କରିଛନ୍ତି । ଗ୍ରାମବାସୀ ଏକାଠି ବସି ଭୋଜି ଖାଇ ଖୁସିରେ ମଉଜ କରିଥିଲେ । ପ୍ରତିଦିନ ହାତୀ- ମଣିଷ ଲଢ଼େଇ ପାଇଁ ଉଭୟଙ୍କ ଜୀବନ ବିପଦରେ ପଡ଼ୁଥିବା ଖବର ଶୁଣିବାକୁ ମିଳୁଥିବା ବେଳେ ଗୁରଙ୍ଗ ଗ୍ରାମବାସୀଙ୍କ ଏହି କାର୍ଯ୍ୟ ପ୍ରଶଂସା ସାଉଁଟୁଛି।