ରାଜ୍ୟରେ ନିୟନ୍ତ୍ରଣାଧୀନ ରହିଛି କରୋନା ବିସ୍ତାର: ଜନସ୍ୱାସ୍ଥ୍ୟ ନିର୍ଦ୍ଦେଶକ ଭୁବନେଶ୍ୱର, ଜାନୁଆରୀ ୨୦ (ଖବର ଓଡ଼ିଶା): Share story: ରାଜ୍ୟରେ ସ୍ଥିର ରହିଛି ଦୈନିକ କରୋନା ସଂକ୍ରମଣ। ସାମଗ୍ରିକ ଭାବରେ କରୋନା ବିସ୍ତାର ନିୟନ୍ତ୍ରଣାଧୀନ ରହିଛି ବୋଲି କହିଛନ୍ତି ଜନସ୍ୱାସ୍ଥ୍ୟ ନିର୍ଦ୍ଦେଶକ ନିରଞ୍ଜନ ମିଶ୍ର। ସେ କହିଛନ୍ତି ଯେ ଯେଉଁ ଗତିରେ ସଂକ୍ରମଣ ବଢୁଥିଲା ସେଥିରେ ରୋକ ଲାଗିଛି। କେସ୍ ଡବଲିଂ ସଂଖ୍ୟା କମିଛି। ରାଜ୍ୟରେ ଏବେ ୮୮ ହଜାର ୩୪୬ ସକ୍ରିୟ ସଂକ୍ରମଣ ରହିଥିବା ବେଳେ ମାତ୍ର ୧୨୩୦ ଜଣ ଡାକ୍ତରଖାନାରେ ଅଛନ୍ତି। ଯାହା ଆଶ୍ୱସ୍ତିକର ବିଷୟ। ତୃତୀୟ ଲହରରେ ଅଧିକ ଲୋକେ ଡକ୍ତରଖାନାରେ ଭର୍ତ୍ତି ହେବାକୁ ପଡୁନାହିଁ। ତେଣୁ ସ୍ୱାସ୍ଥ୍ୟ ବ୍ୟବସ୍ଥା ଉପରେ ଏପର୍ଯ୍ୟନ୍ତ କୌଣସି ଚାପ ପଡିନାହିଁ। ରୋଗି ଆଇସିୟୁରେ ମଧ୍ୟ ନାହାନ୍ତି, ଅକ୍ସିଜେନ୍ର ଅଭାବ ମଧ୍ୟ ନାହିଁ ତେଣୁ ସାମଗ୍ରିକ ଭାବରେ ରାଜ୍ୟରେ ବର୍ତ୍ତମାନ କରୋନା ନିୟନ୍ତ୍ରାଣାଧିନ ରହିଛି ବୋଲି ସେ କହିଛନ୍ତି। ରାଜ୍ୟର ଏବେ ଖୋର୍ଦ୍ଧା, ସୁନ୍ଦରଗଡ଼, କଟକ, ସମ୍ବଲପୁର ଜିଲ୍ଲା ଲାଲ ବଳୟ ଭିତରେ ରହିଛି। ରାଜ୍ୟରେ ଗତ ୨୪ ଘଣ୍ଟାରେ ୧୦ ହଜାର ୩୬୮ ନୂତନ ଆକ୍ରାନ୍ତ ଚିହ୍ନଟ ହୋଇଛନ୍ତି। ଏଥି ସହିତ ରାଜ୍ୟରେ ସକ୍ରିୟ ସଂକ୍ରମଣ ୮୮ ହଜାର ୩୪୬ରେ ପହଁଞ୍ଚିଛି। ସେହିଭଳି ଗତ ୨୪ ଘଣ୍ଟାରେ ୭ ଜଣ ମୃତ୍ୟୁ ବରଣ କରିଛନ୍ତି। ଖବର ଓଡ଼ିଶା, Reporter, 20/01/2022