ଆରମ୍ଭ ହେଲା ପ୍ରସିଦ୍ଧ ଓଳାଶୁଣୀ ମେଳା । ଏହି ମେଳାରେ ପ୍ରାୟ ୨୦ ହଜାର ଦର୍ଶକଙ୍କ ସମାଗମ ହୋଇଛି । ସନ୍ଥସାଧକ ମହାପୁରୁଷ ଅରକ୍ଷିତ ଦାସଙ୍କ ମହାପ୍ରୟାଣ ଦିବସ ଅବସରରେ ମଙ୍ଗଳବାର ଦିନ ଆରମ୍ଭ ହୋଇଛି ଓଡ଼ିଶା ପ୍ରସିଦ୍ଧ ଓଳାଶୁଣୀ ଗୁମ୍ଫାମେଳା। ପ୍ରତିବର୍ଷ ମାଘକୃଷ୍ଣ ଷଟତିଳା ଏକାଦଶୀ ତିଥିରେ ଏହି ମେଳା ଆରମ୍ଭ ହୋଇଥାଏ । କଟକ ଜିଲ୍ଲାର ଏହା ହେଉଛି ଏକ ପ୍ରମୁଖ ମେଳା । ଏହି ମେଳାର ପ୍ରଥମ ଦିନରେ ୨୦ ହଜାରରୁ ଅଧିକ ଶ୍ରଦ୍ଧାଳୁଙ୍କ ସମାଗମ ହୋଇଥିବା ଦେଖିବାକୁ ମିଳିଛି ।
ଗତକାଲି ପ୍ରାତଃ ସମୟରୁ ମହାପୁରୁଷଙ୍କ ପବିତ୍ର ସମାଧି ମନ୍ଦିରରେ ମଠର ମହନ୍ତ ସମସ୍ତ ନୀତିକାନ୍ତି ଅନୁଯାୟୀ ପୂଜାର୍ଚ୍ଚନା କରିବା ସହ ମହାପୁରୁଷଙ୍କ ପ୍ରିୟ ଭୋଗ ପୋଡ଼ପିଠା ଲାଗି କରିଥିଲେ। ଏହାପରେ ସର୍ବସାଧାରଣ ସନ୍ଥ ଅରକ୍ଷିତ ଦାସଙ୍କ ସମାଧି ମନ୍ଦିର ଦର୍ଶନ କରିବା ସହ ଭୋଗ ଲଗାଇ କୃପା ଭିକ୍ଷାଆଶିଷ ଲାଭ କରିଥିଲେ। ଅନ୍ୟପଟେ ମେଳା ପଡିଆକୁ ଉଦ୍ଘାଟନ କରାଯାଇଥିଲା । ପ୍ରତିବର୍ଷ ପରି ଚଳିତ ବର୍ଷା ମଧ୍ୟ ମେଳାର ପ୍ରଥମ ଦିନରେ ଓଳାଶୁଣୀ ଗୁମ୍ଫା ଉନ୍ନୟନ ପରିଷଦ ପକ୍ଷରୁ ପୀଠର ବଡ଼ଦାଣ୍ଡରେ ଶ୍ରଦ୍ଧାଳୁଙ୍କ ପାଇଁ ପ୍ରସାଦ ସେବନର ବ୍ୟବସ୍ଥା କରାଯାଇଥିଲା।ମହାପୁରୁଷଙ୍କ ଦର୍ଶନ କରିବାକୁ ଯାଇଥିବା ଶ୍ରଦ୍ଧାଳୁମାନେ ଆନନ୍ଦର ସହ ପ୍ରସାଦ ସେବନ କରିଥିଲେ ।
ଅଧିକ ପଢନ୍ତୁ :ଉଦଯାପିତ ହେଲା ଆଦିବାସୀ ମେଳା