ବ୍ରହ୍ମପୁର: ରବିବାର ବିଳମ୍ବିତ ରାତିରେ ଗଞ୍ଜାମ ଜିଲ୍ଲା ବ୍ରହ୍ମପୁର ସହରର ବଡ଼ବଜାର ଥାନା ଅନ୍ତର୍ଗତ ଲକ୍ଷ୍ମୀ ନୃସିଂହ ନଗର ଓ ପ୍ରହଲ୍ଲାଦ ନଗର ଅଞ୍ଚଳରେ ଥିବା ଦୁଇଟି ମସଲା ମିଲ୍‌ ଉପରେ ପୁଲିସ ଚଢଉ କରିଥିଲା।

ଏହି ଚଢଉ ସମୟରେ ବିପୁଳ ପରିମାଣର ଭେଜାଲ ହଳଦୀ ଗୁଣ୍ଡ, ଲଙ୍କା ଗୁଣ୍ଡ ସହିତ ୪ଟି ମିଲିଂ ମେସିନ ଏବଂ ୩୦ରୁ ଅଧିକ ମସଲା ପ୍ୟାକେଟ ଜବତ କରାଯାଇଛି। ଏହି ନକଲି ମସଲା କାରବାର ଅଭିଯୋଗରେ ପୁଲିସ ୨ ଜଣ ବ୍ୟକ୍ତିଙ୍କୁ ଅଟକ ରଖି ପଚରାଉଚରା କରୁଛି। 

ସୂଚନା ଅନୁସାରେ, ଏହି ଅଭିଯୁକ୍ତମାନେ ପୂର୍ବରୁ ୨୦୨୨ ମସିହାରେ ମଧ୍ୟ ସମାନ ଅଭିଯୋଗରେ ଗିରଫ ହୋଇଥିଲେ। ମସଲାର ପରିମାଣ ବଢ଼ାଇବା ପାଇଁ ଏଥିରେ ଚାଉଳ କୁଣ୍ଡା ଏବଂ କୃତ୍ରିମ କେମିକାଲ ରଙ୍ଗ ମିଶାଯାଇ ଶସ୍ତା ଦରରେ ବଜାରରେ ବିକ୍ରି କରାଯାଉଥିଲା। ତେବେ ଏହି ମିଲ୍‌ଗୁଡ଼ିକର କୌଣସି ଜିଏସଟି (GST) ପଞ୍ଜୀକରଣ କିମ୍ବା ବ୍ରାଣ୍ଡ୍ ନାମ ମଧ୍ୟ ନଥିଲା। 

ବ୍ୟବହୃତ ହୋଇଥିବା ନିର୍ଦ୍ଦିଷ୍ଟ ବିଷାକ୍ତ ପଦାର୍ଥ ଓ ରଙ୍ଗ ଚିହ୍ନଟ କରିବା ପାଇଁ ଉଭୟ ପ୍ରକ୍ରିୟାକରଣ କେନ୍ଦ୍ରରୁ ନମୁନାଗୁଡ଼ିକୁ ବିସ୍ତୃତ ରାସାୟନିକ ପରୀକ୍ଷଣ ନିମନ୍ତେ ରାଜ୍ୟ ଖାଦ୍ୟ ପରୀକ୍ଷଣାଗାରକୁ ପଠାଯାଇଛି। ଭାରତୀୟ ନ୍ୟାୟ ସଂହିତା (BNS) ଏବଂ ଖାଦ୍ୟ ସୁରକ୍ଷା ଓ ମାନକ ଆଇନର ସମ୍ପୃକ୍ତ ଧାରା ଅନୁଯାୟୀ ଦୁଇଟି ପୃଥକ ମାମଲା ରୁଜୁ କରାଯାଇଛି।