ଭୁବନେଶ୍ୱର: ମହିଳା ଥାନାରେ ହାଜର ହେଲେ ଓଏଏସ୍‍ ଅଫିସର ସାର୍ଥକ ସୌରଭ ମହାପାତ୍ର । ଗତକାଲି ପତ୍ନୀ ଅର୍ଚ୍ଚନା ଦାସଙ୍କ ଅଭିଯୋଗ ପରେ ଥାନାରେ ହାଜର ହୋଇଛନ୍ତି । ସ୍ୱାମୀଙ୍କ ବିରୋଧରେ ସାଘାଂତିକ ଅଭିଯୋଗ ଆଣିଛନ୍ତି ପତ୍ନୀ । ଓସ୍‍ଡମାରେ ଡିଜିଏମ୍‍ ଭାବେ କାର୍ଯ୍ୟରତ ଓଏଏସ୍‍ ସାର୍ଥକ ସୌରଭ ମହାପାତ୍ର ତାଙ୍କ ପତ୍ନୀ ଓ ନବଜାତ ପିଲା ପ୍ରତି ନିଷ୍ଠୁରତା ଓ ମାନସିକ ନିର୍ଯାତନା ଦେବା ସହ ଉଭୟଙ୍କୁ ହସ୍ପିଟାଲରୁ ଛାଡି ପଳାଇବା ଅଭିଯୋଗ ହୋଇଛି ।ଗୁରୁବାର ପତ୍ନୀ ଅର୍ଚ୍ଚନା ଦାସଙ୍କ ବୟାନ ରେକର୍ଡ କରାଯାଇଛି । ବାହାଘରଠାରୁ ଆରମ୍ଭ କରି ସନ୍ତାନ ହେବା ପର୍ଯ୍ୟନ୍ତ ଉଭୟଙ୍କ ଭିତରେ କଣ ଘଟିଥିଲା ସେନେଇ ପଚରାଉଚରା ହୋଇଛି । ତେବେ ଓଏଏସ୍‍ ସାର୍ଥକଙ୍କୁ ମହିଳା ଥାନା ନୋଟିସ୍‍ କରିବା ପରେ ସେ ଆଜି ଥାନାରେ ହାଜର ହୋଇଥିଲେ । 

ତେବେ ମହିଳା ଥାନାରୁ ବାହାରିବା ପରେ OAS ସାର୍ଥକ ପତ୍ନୀ ଅର୍ଚ୍ଚନା ଦାସଙ୍କ ସମସ୍ତ ଅଭିଯୋଗକୁ ଖଣ୍ଡନ କରିଛନ୍ତି। ସେ କହିଛନ୍ତି ଯେ ମୋ ଛଡ଼ା ମାଆର କେହି ନାହାନ୍ତି; ମାଆ, ଭଉଣୀଙ୍କୁ ସପୋର୍ଟ ଦରକାର। 

ପତ୍ନୀ କେବେ ସପୋର୍ଟ ଦେଉ ନଥିଲେ ଓଲଟା ମାଆଙ୍କୁ ମୁଁ ସମୟ ଦେଲେ ଯେମିତି ଅପରାଧ କରିଦେଲି ସେମିତି ଭାବିଥିଲେ ।ଛୁଆ ହେଲେ ସବୁ ସ୍ବାଭାବିକ ହୋଇଯିବ ବୋଲି ଚିନ୍ତା କରୁଥିଲି। ଏମିତି କି ଛୁଆ ଜନ୍ମବେଳେ ହସ୍ପିଟାଲରେ ୩ ଦିନ ରହି ସବୁ ସେବା କରିଛି ବୋଲି ସେ କହିଛନ୍ତି । କିନ୍ତୁ ପତ୍ନୀ ଓଲଟା ମାନସିକ ନିର୍ଯାତନା ଦେଉଥିଲେ ବୋଲି ସେ କହିଛନ୍ତି। ମୁଁ ଅତୁଲ ସୁବାଷ ନୁହେଁ, ଶେଷ ପର୍ଯ୍ୟନ୍ତ ଲଢ଼େଇ କରିବି। କୋର୍ଟଙ୍କ ଉପରେ ଭରସା ଅଛି, ଜଗନ୍ନାଥଙ୍କ ଉପରେ ଭରସା ଅଛି ବୋଲି OAS ସାର୍ଥକ କହିଛନ୍ତି।