ଭୁବନେଶ୍ୱର : ପୁଣି ଥରେ ଦିଲ୍ଲୀ ଗସ୍ତ କରିଛନ୍ତି ରାଜ୍ୟ ବିଜେପି ସଭାପତି ମନମୋହନ ସାମଲ । ଶନିବାର ରାତିରେ ସେ ଦିଲ୍ଲୀ ଯାଇଛନ୍ତି।ଏହାର ଗୋଟିଏ ଦିନ ପୂର୍ବରୁ ହିଁ ମନମୋହନ ଦିଲ୍ଲୀରୁ ଫେରିଥିଲେ। ରାଜ୍ୟ ମନ୍ତ୍ରିମଣ୍ଡଳ ସମ୍ପ୍ରସାରଣ ନେଇ ଜୋରଦାର ଚର୍ଚ୍ଚା ହେଉଛି। ଏହା ସହ ରାଜ୍ୟ କମିଟି ଏବଂ ବୋର୍ଡ ଓ ନିଗମ ନିଯୁକ୍ତି ନେଇ ମଧ୍ୟ ଚର୍ଚ୍ଚା ହେଉଛି । ଏବେ ପୁଣି ଥରେ ଦିଲ୍ଲୀ ଯିବାକୁ ନେଇ ବିଭିନ୍ନ ଚର୍ଚ୍ଚା ହେଉଛି। ଗତ ଗସ୍ତ ବେଳେ ରାଜ୍ୟ ବିଜେପିର ନୂଆ ଟିମ୍ ଗଠନ ନେଇ ଆଲୋଚନା ହୋଇଥିବା ସେ ସୂଚନା ଦେଇଥିଲେ। ତେଣୁ ଏବେ ପୁଣି ଗସ୍ତ ନାନା ଚର୍ଚ୍ଚାକୁ ବଢ଼ାଇଛି। 

ଅନ୍ୟପଟେ ଦିଲ୍ଲୀ ଯାଇଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ଉପରାଷ୍ଟ୍ରପତି ନିର୍ବାଚନ ପୂର୍ବରୁ ନବୀନ ଦିଲ୍ଲୀ ଗସ୍ତ କରିଛନ୍ତି । ସେଠାରେ ବିଜେଡ଼ି ସାଂସଦ ମାନଙ୍କ ସହ ସେ ଆଲୋଚନା କରିବେ। ଗତକାଲି ବିଜେଡି ପିଏସି ସଦସ୍ୟଙ୍କ ସହିତ ନବୀନ ପଟ୍ଟନାୟକ ନିବାସରେ ଉପରାଷ୍ଟ୍ରପତି ନିର୍ବାଚନ ସମ୍ପର୍କରେ ଆଲୋଚନା କରିଥିଲେ । ଦଳର ଆଭିମୁଖ୍ୟ ନେଇ ନବୀନ ଖୁବଶୀଘ୍ର ଚୁଡାନ୍ତ ନିଷ୍ପତ୍ତି ନେବେ । ଏସବୁ ଭିତରେ ବିଜେଡିର ଆଭିମୁଖ୍ୟ କଣ ରହିବ। ନବୀନଙ୍କ ଦିଲ୍ଲୀ ଗସ୍ତକୁ ନେଇ ଜାତୀୟ ରାଜନୀତି ସରଗରମ ହୋଇଛି । ଉଭୟ ନେତାଙ୍କ ଦିଲ୍ଲୀ ଗସ୍ତ ନେଇ ରାଜ୍ୟ ରାଜନୀତି ସହ ଜାତୀୟ ରାଜନୀତିରେ ମଧ୍ୟ ଚର୍ଚ୍ଚା ଜୋର ଧରିଛି।