ଜୁଲାଇ 15 ସୁଦ୍ଧା ସମସ୍ତ ଶ୍ରେଣୀର ଛାତ୍ର ଓ ଛାତ୍ରୀମାନଙ୍କ ନାମ ଲେଖା ଶେଷ କରିବା ପାଇଁ ସ୍କୁଲ ଗୁଡିକୁ ଗଣଶିକ୍ଷା ବିଭାଗର ନିର୍ଦ୍ଦେଶ
Khabar Odisha:Department-of-Mass-Education-instructs-schools-to-complete-enrollment-of-students-of-all-classes-by-July-15
ଭୁବନେଶ୍ୱର, ଜୁନ ୦୬ (ଖବର ଓଡ଼ିଶା):

ମହାମାରୀ କରୋନା କାରଣରୁ ଦେଶର ଶିକ୍ଷା ବ୍ୟବସ୍ଥା ସବୁଠାରୁ ଅଧିକ ପ୍ରଭାବିତ ହୋଇଛି । ଛାତ୍ରଛାତ୍ରୀଙ୍କ ଭବିଷ୍ୟତ ବର୍ତ୍ତମାନ ଆଶା ଆଶଙ୍କା ଦେଇ ଗତି କରୁଛି । ଏ ପର୍ଯ୍ୟନ୍ତ ସ୍କୁଲ ଖୋଲିବା ପାଇଁ ସ୍ୱାଭାବିକ ହୋଇପାରୁନି ସ୍ଥିତି । ସ୍କୁଲ ଖୋଲିବ ନେଇ ସ୍ଥିତି କେବେ ଠିକ ହେବ ସେ ନେଇ ସରକାର ମଧ୍ୟ କହିପାରୁନାହାଁନ୍ତି । ତେବେ ପ୍ରାଥମିକ ଓ ମାଧ୍ୟମିକ ବିଦ୍ୟାଳୟ ଗୁଡ଼ିକରେ ନାମଲେଖା ଦିଗରେ ପଦକ୍ଷେପ ନେଇଛି ବିଦ୍ୟାଳୟ ଗଣଶିକ୍ଷା ବିଭାଗ ।

ଜୁଲାଇ ୧୫ ସୁଦ୍ଧା ସମସ୍ତ ଶ୍ରେଣୀର ଛାତ୍ରଛାତ୍ରୀଙ୍କ ନାମ ଲେଖା ଶେଷ କରିବାକୁ ସମସ୍ତ ବିଦ୍ୟାଳୟ ଗୁଡିକୁ ନିର୍ଦ୍ଦେଶ ଦେଇଛି ଗଣଶିକ୍ଷା ବିଭାଗ । ବିଦ୍ୟାଳୟ ଗଣଶିକ୍ଷା ବିଭାଗ ସଚିବ ଚିତ୍ରା ଅରୁମୁଗମ ସମସ୍ତ ଜିଲ୍ଲା ଶିକ୍ଷା ଅଧିକାରୀ, ଜିଲ୍ଲା ପ୍ରକଳ୍ପ ସଂଯୋଜକ ଓ ବ୍ଲକ ଶିକ୍ଷା ଅଧିକାରୀଙ୍କୁ କହିଛନ୍ତି ଯେ ପ୍ରତିଦିନ ସକାଳ ୭ଟାରୁ ୯ଟା୩୦ ମଧ୍ୟରେ ସ୍କୁଲରେ ଛାତ୍ରଛାତ୍ରୀଙ୍କ ନାମଲେଖା ହେବ । ଗୋଟିଏ ସମୟରେ ୫ ରୁ ଅଧିକ ଅଭିଭାବକ / ଛାତ୍ରଛାତ୍ରୀ ସ୍କୁଲକୁ ନାମ ଲେଖାଇବାକୁ ଆସିବା ପାଇଁ ଅନୁମତି ଦିଆଯିବ ନାହିଁ । ସ୍କୁଲରେ ନାମ ଲେଖାଇବା ଲାଗି ଛାତ୍ରଛାତ୍ରୀ / ଅଭିଭାବକ ଯେତେବେଳେ ବିଦ୍ୟାଳୟକୁ ଆସିବେ, ସେତେବେଳେ ସେମାନେ ଯେପରି କୋଭିଡ-୧୯ ଗାଇଡଲାଇନ ପାଳନ କରୁଥିବେ । ସେଥିପ୍ରତି ସ୍କୁଲର ପ୍ରଧାନଶିକ୍ଷକ/ ପ୍ରଧାନଶିକ୍ଷୟିତ୍ରୀ ଦୃଷ୍ଟି ଦେବେ ବୋଲି ନିର୍ଦ୍ଦେଶରେ ସ୍ପଷ୍ଟ ଭାବରେ କୁହାଯାଇଛି ।

ସ୍କୁଲକୁ ଆସିବା ବେଳେ ସମସ୍ତେ ମାସ୍କ ପିନ୍ଧିବା ସହ ସାମାଜିକ ଦୂରତା ବଜାୟ ରଖିବେ । ଛାତ୍ରଛାତ୍ରୀ / ଅଭିଭାବକଙ୍କ ଲାଗି ସ୍କୁଲ ନୋଟିସ ବୋର୍ଡରେ ସମସ୍ତ ନିର୍ଦ୍ଦେଶାବଳୀ ଉପଲବ୍ଧ ହେବ । ଏଥିସହ ନିର୍ଦ୍ଦେଶାବଳୀକୁ ହ୍ୱାଟସ ଆପ ମାଧ୍ୟମରେ ଛାତ୍ରଛାତ୍ରୀ / ଅଭିଭାବକ / ସିଆରସିସିକୁ ପଠାଯିବ । ନାମଲେଖା ଅନ୍ୟ ନିୟମାବଳୀରେ କୌଣସି ପରିବର୍ତ୍ତନ କରାଯିବ ନାହିଁ । ଏହା ରାଜ୍ୟର ସମସ୍ତ ସରକାରୀ ଓ ଅନୁଦାନ ପ୍ରାପ୍ତ ଓ ଅଣ ଅନୁଦାନ ପ୍ରାପ୍ତ ବିଦ୍ୟାଳୟ ଲାଗି ଲାଗୁ ହେବ । ବିଭାଗ ଅଧୀନରେ ଥିବା ମାଦ୍ରାସା ଓ ସଂସ୍କୃତ କେନ୍ଦ୍ର ଗୁଡ଼ିକରେ ମଧ୍ୟ ଏହି ସମାନ ନିୟମ ଲାଗୁ କରାଯିବ ବୋଲି ନିର୍ଦ୍ଦେଶ ଦିଆଯାଇଛି ।

  • Tags:

Subscribe

National International State Sports Entertainment