ଖାଉଟି ଯୋଗାଣ ଅଧିକାରୀ ଟିମ୍ ପକ୍ଷରୁ ଆଳୁ ଗୋଦାମରେ ଚଢ଼ାଉ । ଲଗାତାର କିଛି ଦିନ ଧରି ରାଜ୍ୟରେ ଆକାଶଛୁଆଁ ହୋଇଛି ପରିବା ଦର । ଏପରିକି ଆଳୁର ଦର ମଧ୍ୟ ବୃଦ୍ଧିପାଇବାରେ ଲାଗିଛି । ଯାହାଫଳରେ ଗ୍ରାହକମାନେ ଚିନ୍ତାରେ ପଡିଯାଇଛନ୍ତି । ହାଣ୍ଡିଶାଳ ଉପରେ ମହଙ୍ଗା ମାଡ ହୋଇଛି । ଆଳୁର ଦର ଏଭଳି ଦ୍ରୁତଗତିରେ ବଢ଼ୁଥିବାରୁ ଗ୍ରାହକଙ୍କ ଉପରେ ପ୍ରଭାବ ପକାଉଛି । ତେବେ ଆଳୁର ମୂଲ୍ୟ ଥମି ନଥିବା ବେଳେ ଦେଓଗଡ଼ ଟାଉନ ଡେଲି ମାର୍କେଟରେ ଆଳୁ ଗୋଦାମରେ ଚଢ଼ାଉ କରିଛି ଖାଉଟି ଯୋଗାଣ ଅଧିକାରୀ ଟିମ୍ ।  

ଆଳୁ ଗୋଦାମରେ ଚଢ଼ାଉ କରିବା ସହ ଗୋଦାମର ମାଲିକମାନଙ୍କୁ ତାଗିଦ କରାଯାଇଥିବା ଜଣାପଡିଛି । ଆଳୁ ଗୋଦାମରୁ ବସ୍ତା ପିଛା ୧୪୦୦ ରୁ ୧୫୦୦ ଶହ ଟଙ୍କା ନେଉଥିଲା ବେଳେ ବେପାରୀ ମାନକୁ କମ୍ କମିଶନ ମିଳୁଥିବାରୁ ଆଳୁ କିଲୋଗ୍ରାମ ପିଛା ୪୦ ରୁ ୫୦ ଟଙ୍କାରେ ବିକ୍ରି କରାଯାଉଥିବା ଜଣାପଡିଛି । ଏହିସବୁ ଖବର ପାଇବା ପରେ ଖାଉଟି ଯୋଗାଣ ଅଧିକାରୀ ପକ୍ଷରୁ ଆଳୁ ଗୋଦାମରେ ଚଢ଼ାଉ କରାଯାଇଛି ।  

ତେବେ ଗୋଦାମର ମାଲିକ କହିବା ଅନୁଯାୟୀ ଆଳୁ ସହରରେ ପରିମାଣରୁ କମ ରହିଛି । ଦୈନିକ ଦୁଇ ତିନି ଟ୍ରକ୍ ଆସୁଥିବା ଆଳୁ ଗାଡ଼ି ବର୍ତ୍ତମାନ ପାଖା ପାଖି ଏକ ଗାଡ଼ି ଆସୁଥିବା ଜଣାପଡିଛି । ଯାହାଫଳରେ ମଧ୍ୟବିତ୍ତ ପରିବାର ଓ ଖଟିଖିଆ ଦିନ ମଜୁରିଆ ଲୋକଙ୍କ ଉପରେ ପ୍ରଭାବ ପଡୁଛି । ବଜାରରେ ଏଭଳି ଆଳୁ ଦରଦାମକୁ ନେଇ ସତ୍ୟାସତ୍ୟ ଜାଣିବାପାଇଁ ପ୍ରଶାସନ ପକ୍ଷରୁ ଆଳୁ ଗୋଦାମରେ ଚଢ଼ାଉ କରଯାଉଛି ।