କଟକ : ଓସିଏ ସଭାପତି ପଦରୁ ଇସ୍ତଫା ଦେଲେ ପ୍ରଣବ ପ୍ରକାଶ ଦାସ । ସେ ଇସ୍ତଫା ଦେଇଥିବା ନେଇ ଓସିଏ କାର୍ଯ୍ୟାଳୟ ସୂତ୍ରରୁ ସୂଚନା ମିଳିଛି । ବ୍ୟକ୍ତିଗତ କାରଣ ଦର୍ଶାଇ ବବି ଇସ୍ତଫା ଦେଇଥିବା ବେଳେ ଆସନ୍ତା  ୪୫ ଦିନ ମଧ୍ୟରେ ନୂଆ ସଭାପତି ନିର୍ବାଚନ ହେବ ବୋଲି ସୂଚନା ରହିଛି ।

ସୂଚନାଯୋଗ୍ୟ ଗତ ୨୦୨୨ ମସିହା ଅକ୍ଟୋବର ମାସରେ ଓସିଏର ସଭାପତି ଦାୟିତ୍ୱ ଗ୍ରହଣ କରିଥିଲେ ପ୍ରଣବ ପ୍ରକାଶ ଦାସ । ସେ ନିର୍ଦ୍ୱନ୍ଦ୍ୱରେ ଏହି ପଦ ପାଇଁ ନିର୍ବାଚିତ ହୋଇଥିଲେ । ପୂର୍ବରୁ ଏହି ପଦରେ ସଞ୍ଜୟ ବେହେରା ରହିଥିଲେ । ତେବେ ସଭାପତି ଦାୟିତ୍ୱ ନେବାପରେ ଲଗାତାର ଓସିଏର କାର୍ୟ୍ୟ କରିବା ଢାଞ୍ଚାରେ ପରିବର୍ତ୍ତନ ଆସିଥିଲା । ଗତ ଦୁଇ ବର୍ଷ ମଧ୍ୟରେ ଓଡ଼ିଶା ଦଳ କୌଣସିଟି ଟୁର୍ଣ୍ଣାମେଣ୍ଟରେ ଆଖି ଦୃଶିଆ ଭଲ ପ୍ରଦର୍ଶନ କରି ପାରିନାହିଁ । ଏହାକୁ ନେଇ ଓସିଏ ସଭାପତି ଦାୟିତ୍ୱରେ ଥାଇ ମଧ୍ୟ କୌଣସି ଉତ୍ତର ରଖି ପାରିନଥିଲେ ବବି ଦାସ । ଗତ ଜୁଲାଇ ମାସରେ ଏହାକୁ ନେଇ ତାଙ୍କ ଇସ୍ତଫା ଦାବି ମଧ୍ୟ ଉଠିଥିଲା ବେଳେ ଆଜି ସେ ଇସ୍ତଫା ଦେଇଛନ୍ତି । ତେବେ ଏହାକୁ ନେଇ ବବି ଦାସ କୌଣସି ପ୍ରତିକ୍ରିୟା ଦେଇନାହାନ୍ତି ।