ରବିଚନ୍ଦ୍ରନ ଅଶ୍ୱିନ ଜଣେ ଅଭିଜ୍ଞ ସ୍ପିନର ଭାବରେ ଅନେକ କୀର୍ତ୍ତିମାନ ରଚିଛନ୍ତି । ନିଜ ସ୍ପିନ ଜାଲରେ ସେ ଅନେକ ବ୍ୟାଟ୍ସମ୍ୟାନଙ୍କ ୱିକେଟ୍ ନେଇଥାନ୍ତି । ଟେଷ୍ଟ ମ୍ୟାଚରେ ଅଶ୍ୱିନଙ୍କ ବୋଲିଂକୁ ସାମ୍ନା କରିବା କଷ୍ଟକର ହୋଇଥାଏ । ଅଶ୍ୱିନ କେବଳ ଜଣେ ଅଭିଜ୍ଞ ବୋଲର ତାହା ନୁହେଁ ସେ ଜଣେ ଭଲ ବ୍ୟାଟ୍ସମ୍ୟାନ ମଧ୍ୟ । ସେ ଟେଷ୍ଟ କ୍ରିକେଟରେ ଭାରତ ପାଇଁ ୫ ଟି ଶତକ କରିଥିବାବେଳେ ଦିନିକିଆ କ୍ରିକେଟରେ ଗୋଟିଏ ଅର୍ଦ୍ଧଶତକ କରିଛନ୍ତି । ତେବେ ତାମିଲନାଡୁରେ ଚାଲିଥିବା ତାମିଲନାଡୁ ପ୍ରିମିୟର ଲିଗରେ ଅଶ୍ୱିନ କିଛି ଏଭଳି କରିଛନ୍ତି ଯାହା ତାଙ୍କ ଦଳର ଅନ୍ୟ ବ୍ୟାଟ୍ସମ୍ୟାନ ମଧ୍ୟ କରିପାରିନାହାନ୍ତି । ତେବେ ଆସନ୍ତୁ ଜାଣିବା କଣ କରିଛନ୍ତି ଅଶ୍ୱିନ ?

ଅଶ୍ୱିନ ଚଳିତ ତାମିଲନାଡୁ ପ୍ରିମିୟର ଲିଗରେ ଡିଣ୍ଡିଗୁଲ୍ ଡ୍ରାଗନ୍ସର ଅଧିନାୟକ ଅଟନ୍ତି । ରବିବାର ଡିଣ୍ଡିଗୁଲ୍ ଡ୍ରାଗନ୍ସର ମ୍ୟାଚ ଚିପକ୍ ସୁପର ଗିଲିସ ସହ ଥିଲା ଏବଂ ବର୍ଷା ହେତୁ ୭ ଓଭରର ମ୍ୟାଚ ଖେଳାଯାଇଥିଲା । ଏହି ସାତ ଓଭରରେ ଅଶ୍ୱିନଙ୍କ ପ୍ରଦର୍ଶନ ସମସ୍ତଙ୍କୁ ଚକିତ କରିଥିଲା। ତେବେ ଡିଣ୍ଡିଗୁଲ୍ ଡ୍ରାଗନ୍ସ ନିର୍ଦ୍ଧାରିତ ୭ ଓଭରରେ ୬ ୱିକେଟ୍ ହରାଇ ୬୪ ରନ ସଂଗ୍ରହ କରିଥିଲା । ୬ ଟି ୱିକେଟ୍ ମଧ୍ୟରୁ ୪ ଟି ବ୍ୟାଟ୍ସମ୍ୟାନ ଖାତା ଖୋଲିବାରେ ଅସଫଳ ରହିଥିଲେ । ଶିବମ ସିଂ, ଭୂପତି କୁମାର, ଇନ୍ଦ୍ରଜିତ ଓ ସି ଶରତ କୁମାର ଖାତା ନ ଖୋଲି ଆଉଟ ହୋଇଥିଲେ । ବିମଲ କୁମାର ୧୨, ସୁବୋଥ ଭାଟି ୩ ଓ ଏସ ଦୀନେଶ ରାଜ ୧ ରନ ସଂଗ୍ରହ କରିଥିଲେ ।

ଡିଣ୍ଡିଗୁଲ୍ ଡ୍ରାଗନ୍ସର ବ୍ୟାଟ୍ସମ୍ୟାନଙ୍କ ନିରାଶଜନକ ପ୍ରଦର୍ଶନ ସତ୍ୱେ ଅଧିନାୟକ ଅଶ୍ୱିନ ଗୋଟିଏ ପଟେ ନିର୍ଭୟର ସହ ବ୍ୟାଟିଂ କରିଥିଲେ । ଅଶ୍ୱିନ ୨୦ ବଲରେ ୪୫ ରନ ସଂଗ୍ରହ କରି ଅପରାଜିତା ରହିଥିଲେ । ୨୨୫ ଷ୍ଟ୍ରାଇକ ହାରରେ ଅଶ୍ୱିନ ୩ ଟି ଚୌକା ଓ ୪ ଟି ଛକ୍କା ମାରିଥିଲେ । ଅଶ୍ୱିନ ଗୋଟିଏ ପଟେ ଲଢେଇ କରୁଥିବାବେଳେ ଅନ୍ୟପଟେ ଖେଳୁଥିବା ସମସ୍ତ ବ୍ୟାଟ୍ସମ୍ୟାନ ମାତ୍ର ୧୬ ରନ ସଂଗ୍ରହ କରିଥିଲେ । ଶେଷରେ ଡିଣ୍ଡିଗୁଲ୍ ଡ୍ରାଗନ୍ସ ସାତ ଓଭରରେ ୬ ଟି ୱିକେଟ୍ ହରାଇ ୬୪ ରନ ସଂଗ୍ରହ କରିଥିଲା।

ଅଶ୍ୱିନଙ୍କ ଲଢୁଆ ଇନିଂସ ସତ୍ୱେ ଡିଣ୍ଡିଗୁଲ୍ ଡ୍ରାଗନ୍ସକୁ ପରାଜୟର ସମ୍ମୁଖୀନ ହେବାକୁ ପଡିଥିଲା । ଚିପକ୍ ସୁପର ଗିଲିସ ଗୋଟିଏ ୱିକେଟ୍ ହରାଇ ୪.୫ ଓଭରରେ ଲକ୍ଷ୍ୟ ହାସଲ କରିଥିଲେ । ସନ୍ଦୀପ ୱାରିଅର ପ୍ରଥମ ବଲରେ ଚିପକ୍ ସୁପର ଗିଲିସର ଓପନର ଡି ସନ୍ତୋଷ କୁମାରଙ୍କ ୱିକେଟ୍ ନେଇଥିଲେ ମଧ୍ୟ ଏନ ଜଗଦୀଶନ(୩୨) ଓ ବାବା ଅପରାଜିତ(୩୧) ଦଳକୁ ବିଜୟ ଲକ୍ଷ୍ୟ ପାର କରାଇଥିଲେ ।