ନୂଆଦିଲ୍ଲୀ: ଭାରତୀୟ କ୍ରିକେଟ୍ ଦଳର ଇଂଲଣ୍ଡ ଗସ୍ତ ଦୁଇ ସପ୍ତାହ ପରେ ଆରମ୍ଭ ହେବ । ଭାରତୀୟ ଦଳ ଏହି ଗସ୍ତରେ ଘରୋଇ ଇଂଲଣ୍ଡ ବିପକ୍ଷରେ ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଖେଳିବ । ଜୁନ ୨୦ରୁ ସିରିଜ୍ ଆରମ୍ଭ ହେବ । ଏହା ବିଶ୍ୱ ଟେଷ୍ଟ ଚାମ୍ପିଅନଶିପ(ଡବ୍ଲ୍ୟୁଟିସି)ର ନୂଆ ଚକ୍ରରେ ଭାରତର ପ୍ରଥମ ସିରିଜ ହେବ ।  ଏହି ଗସ୍ତ ପାଇଁ ଭାରତୀୟ ଦଳ ଗୁରୁବାର ଅର୍ଥାତ ଆଜି ଇଂଲଣ୍ଡ ଅଭିମୁଖେ ଯାତ୍ରା କରିବ । ଏହା ପୂର୍ବରୁ ଟେଷ୍ଟ ଦଳର ନୂଆ ଅଧିନାୟକ ଶୁଭମନ ଗିଲ୍ ସାମ୍ବାଦିକ ସମ୍ମିଳନୀ କରିବେ । ଅଧିନାୟକ ଗିଲ୍ ଓ ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନର ସମ୍ମୁଖୀନ ହେବେ ।  ଟେଷ୍ଟ ଅଧିନାୟକ ଭାବେ ଗିଲଙ୍କ ଏହା ପ୍ରଥମ ସାମ୍ବାଦିକ ସମ୍ମିଳନୀ ।

ବିସିସିଆଇ ଗୁରୁବାର ଭାରତୀୟ ଦଳର ଇଂଲଣ୍ଡ ଯାତ୍ରା କରିବା ପୂର୍ବରୁ ଏକ ସାମ୍ବାଦିକ ସମ୍ମିଳନୀର ଆୟୋଜନ କରିଛି । ଏଥିରେ ଗିଲ୍ ଓ କୋଚ୍ ଗମ୍ଭୀର ଯୋଗ ଦେବେ । ସାମ୍ବାଦିକ ସମ୍ମିଳନୀ ସନ୍ଧ୍ୟା ୭ଟା ୩୦ରେ ବିସିସିଆଇର ମିଡିଆ ସେଣ୍ଟରରେ ଆୟୋଜିତ ହେବ । ଏଥିରେ ଅଧିନାୟକ ଓ କୋଚଙ୍କୁ ଇଂଲଣ୍ଡ ଗସ୍ତ ପାଇଁ ଭାରତୀୟ ଦଳର ରଣନୀତି ଉପରେ ପ୍ରଶ୍ନ କରିବେ । ଏହା ବ୍ୟତୀତ ରୋହିତ ଶର୍ମା ଓ ବିରାଟ କୋହଲିଙ୍କ ଅବସରକୁ ନେଇ ମଧ୍ୟ କୋଚଙ୍କୁ ପ୍ରଶ୍ନ ପଚରା ଯାଇପାରେ ।

ବିରାଟ କୋହଲି ଓ ରୋହିତ ଶର୍ମା ଗତ ମାସ ଆରମ୍ଭରେ ଟେଷ୍ଟ କ୍ରିକେଟରୁ ଅବସର ନେଇ ସାରିଛନ୍ତି । ଉଭୟଙ୍କ ଅବସରକୁ ନେଇ ସମସ୍ତେ ଆଶ୍ଚର୍ଯ୍ୟ ପ୍ରକାଶ କରିଛନ୍ତି, କାରଣ ଅଷ୍ଟ୍ରେଲିଆ ଗସ୍ତ ପରେ ଦୁଇ ଖେଳାଳି ରଣଜୀ ଖେଳିଥିଲେ । ତେଣୁ କୁହାଯାଉଥିଲା ରୋହିତ ଓ ବିରାଟ ଇଂଲଣ୍ଡ ଗସ୍ତ ପାଇଁ ପ୍ରସ୍ତୁତି କରୁଥିଲେ । ମାତ୍ର ଅପ୍ରତ୍ୟାଶିତ ଭାବେ ୫ ଦିନର ବ୍ୟବଧାନରେ ରୋହିତ ଶର୍ମା ଓ ବିରାଟ କୋହଲି ଅବସର ଘୋଷଣା କରିଥିଲେ । ଏବେ ଦୁଇ ବରିଷ୍ଠ ଖେଳାଳି କେବଳ ଦିନିକିଆ ଖେଳିବେ, କାରଣ ଟି-୨୦ ବିଶ୍ୱକପ୍ ଜିତିବା ପରେ ଉଭୟ ଏହି ଫର୍ମାଟରୁ ସନ୍ନ୍ୟାସ ନେଇ ସାରିଛନ୍ତି ।