ଇଂଲଣ୍ଡ, ସେପ୍ଟେମ୍ବର ୨୨ (ଖବର ଓଡ଼ିଶା): ଭାରତୀୟ ମହିଳା କ୍ରିକେଟ ଟିମ୍ ଇଂଲଣ୍ଡରେ ଇତିହାସ ରଚିଛନ୍ତି । ୨୩ ବର୍ଷ ପରେ ଇଂଲଣ୍ଡ ଟିମ୍କୁ ତାଙ୍କ ମାଟିରେ କୌଣସି ଦିନିକିଆ ଶୃଙ୍ଖଳାରେ ପରାସ୍ତ କରିଛନ୍ତି । ଏଥି ସହିତ ଭାରତୀୟ ମହିଳା ଟିମ୍ ୩ ମ୍ୟାଚ ବିଶିଷ୍ଟ ଦିନିକିଆ ଶୃଙ୍ଖଳାରେ ୨-୦ରେ ଅଗ୍ରଣୀ ରହିଛି । ଶୃଙ୍ଖଳାର ଅନ୍ତିମ ମ୍ୟାଚ ଲର୍ଡସରେ ଆସନ୍ତା ୨୪ ତାରିଖରେ ଖେଳାଯିବ । ଶୃଙ୍ଖଳାର ପ୍ରଥମ ମୁକାବିଲାରେ ଭାରତ ୭ ୱିକେଟରେ ମ୍ୟାଚ ଜିତିଥିଲା । ଅନ୍ୟପଟରେ ବୁଧବାର ମ୍ୟାଚରେ ଇଂଲଣ୍ଡକୁ ମହିଳା ଟିମ୍ ୮୮ ରନ୍ରେ ପରାସ୍ତ କରିଛି । ଏହି ବିଜୟରେ ଅଧିନାୟକ ହରମନପ୍ରୀତ କୌର ଚମକପ୍ରଦ ପ୍ରଦର୍ଶନ କରିଥିଲେ ।
ଭାରତୀୟ ଟିମ୍ ଲଗାତାର ୨ୟ ବର୍ଷ ଇଂଲଣ୍ଡ ଗସ୍ତ କରିଥିଲା । ଗତଥର ଏଠରେ ୩ ମ୍ୟାଚର ଦିନିକିଆ ଶୃଙ୍ଖଳାରେ ୧-୨ରେ ପରାସ୍ତ ହୋଇଥିଲା । ମାତ୍ର ଏଥର ଖେଳାଯାଉଥିବା ସମାନ ସଂଖ୍ୟକ ମ୍ୟାଚର ଶୃଙ୍ଖଳାରେ ଟିମ୍ ଇଣ୍ଡିଆ ପ୍ରଥମ ୨ଟି ମ୍ୟାଚରେ ଇଂଲଣ୍ଡ ବିପକ୍ଷରେ ଜିତିଛି ।
ଭାରତ ପ୍ରଥମେ ବ୍ୟାଟିଂ କରି ୫୦ ଓଭରରେ ୫ଟି ୱିକେଟ ହରାଇ ୩୩୩ ରନ୍ ସଂଗ୍ରହ କରିଥିଲା । ଏଥିରେ ଅଧିନାୟକ ହରମନପ୍ରୀତ କୌର ଅପରାଜିତ ଶତକ (୧୪୩ ରନ୍) କରିଥିଲେ । ସେ ୧୧୧ଟି ବଲ୍ ଖେଳି ୧୮ଟି ଚୌକା ଓ ୪ଟି ଛକା ମାରିଥିଲେ । ହରଲିନ ଦେଓଳ ୭୨ଟି ବଲ୍ ସାମ୍ନା କରି ୫ଟି ଚୌକା ଓ ୨ଟି ଛକା ବଳରେ ବ୍ୟକ୍ତିଗତ ଭାବେ ୫୮ ରନ୍ ସଂଗ୍ରହ କରିଥିଲେ । ସ୍ମୃତି ମନ୍ଧାନା ୫୧ଟି ବଲ ଖେଳି ୪୦ ରନ୍ ଯୋଡ଼ିଥିଲେ । ଏଥିରେ ସେ ୪ଟି ଚୌକା ଓ ଗୋଟିଏ ଛକା ମାରିଥିଲେ ।
ଇଂଲଣ୍ଡ ୪୪.୨ ଓଭରରେ ସମସ୍ତ ୱିକେଟ ହରାଇ ୨୪୫ ରନ୍ ସଂଗ୍ରହ କରିଥିଲା । ଦଳ ପାଇଁ ଡାନିଏଲି ହ୍ୱାଏଟ ସର୍ବାଧିକ ୬୫ ରନ୍ ସଂଗ୍ରହ କରିଥିଲେ । ଇଂଲଣ୍ଡ ଆରମ୍ଭରୁ ବିପର୍ଯ୍ୟୟର ସାମ୍ନା କରିଥିଲା । ଭାରତ ପକ୍ଷରୁ ରେଣୁକା ସିଂହ ସର୍ବାଧିକ ୪ଟି ୱିକେଟ ନେଇଥିଲେ । ଦୟାଲନ ହେମଲତା ୨ଟି ୱିକେଟ ନେଇଥିଲା ବେଳେ ଦୀପ୍ତି ଶର୍ମା ଓ ଓ ସେଫାଳି ବର୍ମା ଗୋଟିଏ ଲେଖାଏଁ ୱିକେଟ ନେଇଥିଲେ ।