ନୂଆଦିଲ୍ଲୀ: ଇଂଲଣ୍ଡ ସିରିଜ ମଝିରେ ଭାରତୀୟ ଦଳ ପାଇଁ ଆସିଛି ବହୁତ ବଡ ନିରାଶଜନକ ଖବର । ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ ଏବେ ଚତୁର୍ଥ ମ୍ୟାଚ୍ ମାଞ୍ଚେଷ୍ଟରର ଓଲ୍ଡ ଟ୍ରାଫର୍ଡରେ ଖେଳା ଯାଉଛି । ବ୍ୟାଟିଂ ବେଳେ ଭାରତୀୟ ଦଳର ୱିକେଟ୍ କିପର ବ୍ୟାଟର ଋଷଭ ପନ୍ତଙ୍କ ପାଦରେ ଆଘାତ ଲାଗିଛି । ଆଘାତ ଗୁରୁତର ଥିବାରୁ ପନ୍ତ ଏହି ଟେଷ୍ଟ ମ୍ୟାଚରୁ ବାହାରି ଯାଇଛନ୍ତି । ଏପରିକି ସେ ସିରିଜର ଶେଷ ମ୍ୟାଚ୍ ବି ଖେଳି ପାରିବେନି । ଏବେ ଯେଉଁ ଖବର ସାମ୍ନାକୁ ଆସିଛି, ପନ୍ତ ଅତି କମରେ ଛଅ ସପ୍ତାହ ଦଳରୁ ବାହାରେ ରହିବେ ।

ଭାରତର ଇନିଂସର ୬୮ତମ ଓଭରର ଚତୁର୍ଥ ବଲ୍ରେ ରିଷଭ ପନ୍ତ ଆହତ ହୋଇଥିଲେ। ଓଭରର ଚତୁର୍ଥ ବଲ୍ରେ ରିଭର୍ସ ସ୍ୱିପ୍ ଖେଳିବାକୁ ରିଷଭ ଚାହୁଁଥିଲେ। କିନ୍ତୁ  ବଲ୍କୁ ଠିକ୍ ଭାବରେ ସଂଯୋଗ କରିପାରି ନଥିଲେ। ବ୍ୟାଟ୍ରୁ ବଲ୍ ମିସ୍ ହେବା ପରେ ଏହା ସିଧା ତାଙ୍କ ଗୋଡ଼ ଉପରେ ଚାଲିଯାଇଥିଲା। ଏହା ପରେ ପନ୍ତ ବହୁତ ସମୟ ପର୍ଯ୍ୟନ୍ତ ଯନ୍ତ୍ରଣାରେ ଛଟପଟ ହେଉଥିବା ଦେଖିବାକୁ ମିଳିଥିଲା। ଆଘାତ ପରେ ତୁରନ୍ତ ଫିଜିଓ ପଡ଼ିଆ ଭିତରକୁ ଆସି ତାଙ୍କ ସହିତ ବହୁତ ସମୟ କଥା ହୋଇଥିଲେ। 

ପନ୍ତ ଏତେ ଯନ୍ତ୍ରଣା ଅନୁଭବ କରୁଥିଲେ ଯେ ସେ ଠିକ୍ ଭାବରେ ଚାଲିପାରୁ ନଥିଲେ। ତାଙ୍କୁ ଆମ୍ବୁଲାନ୍ସରେ ପଡ଼ିଆ ବାହାରକୁ ନିଆଯାଇଥିଲା। ତାଙ୍କର ଆଘାତ ସ୍ପଷ୍ଟ ଭାବରେ ଟିମ୍ ଇଣ୍ଡିଆ ପାଇଁ ଏକ ବଡ଼ ଝଟକା। ରିଟାୟର୍ଡ ହଟ୍ ହେବା ପୂର୍ବରୁ ପନ୍ତ ୪୮ ବଲ୍ରେ ୩୭ ରନ୍ କରିଥିଲେ। ହେଲେ ଗୁରୁବାର ଆସିଥିବା ସଦ୍ୟତମ ସୂଚନା ଅନୁଯାୟୀ, ପନ୍ତଙ୍କ ଆଘାତ ସମସ୍ୟା ଗୁରୁତର ଥିବାରୁ ସେ ଆଉ ଖେଳିବା ସ୍ଥିତିରେ ନାହାନ୍ତି । 

ବିସିସିଆଇ ଅଦ୍ୟାବଧି କୌଣସି ଆନୁଷ୍ଠାନିକ ଘୋଷଣା କରି ନ ଥିଲେ ବି ପନ୍ତ ପୂରା ସିରିଜରୁ ବାହାରି ଯାଇଛନ୍ତି । ତାଙ୍କ ସ୍ଥାନରେ ୱିକେଟ୍ କିପିଂ ଦାୟିତ୍ୱ ଧ୍ରୁବ ଜୁରେଲ ସମ୍ଭାଳିବେ । ହେଲେ ଜୁରେଲ ବ୍ୟାଟିଂ କରି ପାରିବେ ନାହିଁ । ତେଣୁ ଭାରତର ୯ ୱିକେଟ୍ ପତନ ସହ ଦଳ ଅଲଆଉଟ୍ ହେଲା ବୋଲି ବିବେଚନା କରାଯିବ । ଶେଷ ଟେଷ୍ଟରେ ପନ୍ତଙ୍କ ସ୍ଥାନରେ ଧ୍ରୁବ ଜୁରେଲଙ୍କ ଖେଳିବା ନିଶ୍ଚିତ ।