ଭଦୋଦରା: ମହିଳା ପ୍ରିମିୟର ଲିଗ୍-୨୦୨୫ର ପ୍ରଥମ ମ୍ୟାଚ୍‌ରେ, ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ୬ ୱିକେଟ୍‌ରେ ଗୁଜରାଟ ଜାଏଣ୍ଟସ୍‌କୁ ପରାସ୍ତ କରିଛି। ଡିଫେଣ୍ଡିଂ ଚାମ୍ପିଅନ୍ ବେଙ୍ଗାଲୁରୁ ଏକ ବଡ଼ ବିଜୟ ସହିତ ସିଜିନ୍ ଆରମ୍ଭ କରିଛି। ଟୁର୍ଣ୍ଣାମେଣ୍ଟର ପ୍ରଥମ ମ୍ୟାଚ୍‌ରେ, ଗୁଜରାଟ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୨୦୧ ରନ୍ କରିଥିଲା। ଜବାବରେ, ବେଙ୍ଗାଲୁରୁ ୯ ବଲ୍ ବାକି ଥାଇ ୬ ୱିକେଟରେ ମ୍ୟାଚ୍ ଜିତି ନେଇଥିଲା। ବେଙ୍ଗାଲୁରୁ ପକ୍ଷରୁ ଏଲିସ୍ ପେରି ୫୭ ରନ ଏବଂ ରିଚା ଘୋଷ ଅପରାଜିତ ୬୪ ରନ କରି ଆରସିବିର ବିଜୟରେ ଏକ ବଡ଼ ଯୋଗଦାନ ଦେଇଥିଲେ।

ଗୁଜରାଟର ଭଦୋଦରାର କୋଟାମ୍ବି ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚ୍‌ରେ, ଆରସିବିର ଅଧିନାୟିକା ସ୍ମୃତି ମନ୍ଧାନା ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ମନ୍ଧାନା କହିଛନ୍ତି ଯେ ପରେ ମ୍ୟାଚ୍‌ରେ କାକର ଏକ ବଡ଼ ଭୂମିକା ଗ୍ରହଣ କରିପାରିବ ଏବଂ ବାସ୍ତବରେ ମଧ୍ୟ ସମାନ କିଛି ଘଟିଥିଲା। ବ୍ୟାଟିଂ ସମୟରେ ଗୁଜରାଟ ସ୍କୋରବୋର୍ଡରେ ୨୦୧ ରନ ରଖିବାରେ ସଫଳ ହୋଇଥିଲା। କିନ୍ତୁ ଦ୍ୱିତୀୟ ଇନିଂସରେ କାକର ଯୋଗୁଁ ବୋଲିଂ କରିବା କଷ୍ଟକର ହୋଇପଡ଼ଥିଲା। ତଥାପି, RCB ସ୍ମୃତି ମନ୍ଧାନା (୯ରନ) ଏବଂ ଡାନିଏଲ ୱାୟଟ୍ (୪ରନ)ଙ୍କ ୱିକେଟ ଶୀଘ୍ର ହରାଇଥିଲା। କିନ୍ତୁ ଏଲିସ୍ ପେରି ଏବଂ ରିଚା ଘୋଷ ପରିସ୍ଥିତିର ପୂର୍ଣ୍ଣ ଉପଯୋଗ କରି ଆରସିବିକୁ ବିଜୟୀ କରାଇଥିଲେ।

ମହିଳା ପ୍ରିମିୟର ଲିଗ୍ ଇତିହାସରେ ଆରସିବି ସର୍ବାଧିକ ସ୍କୋର ପିଛା କରୁଥିବା ଦଳ ପାଲଟିଛି। ଏହି ଟୁର୍ଣ୍ଣାମେଣ୍ଟର ଇତିହାସରେ ୨୦୦ରୁ ଅଧିକ ରନ ସ୍କୋରକୁ ସଫଳତାର ସହ ପିଛା କରିବାରେ ଆରସିବି ମଧ୍ୟ ପ୍ରଥମ ଦଳ। ପୂର୍ବରୁ ଏହି ରେକର୍ଡ ମୁମ୍ବାଇ ଇଣ୍ଡିଆନ୍ସଙ୍କ ନାମରେ ଥିଲା, ଯିଏ ୨୦୨୪ରେ ଗୁଜରାଟ ଜାଏଣ୍ଟ୍ସ ବିପକ୍ଷରେ ୧୯୧ ରନର ଲକ୍ଷ୍ୟ ହାସଲ କରିଥିଲା। ଗୁଜୁରାଟ ପାଇଁ ଏହା ଲଜ୍ଜାର ବିଷୟ ଯେ ଡବ୍ଲୁପିଏଲ ଇତିହାସରେ ଚାରୋଟି ସବୁଠାରୁ ବଡ଼ ପିଛା କେବଳ ଗୁଜୁରାଟ ଦଳ ବିରୁଦ୍ଧରେ କରାଯାଇଛି।

ମହିଳା ପ୍ରିମିୟର ଲିଗରେ ଗତ ଚାରୋଟି ମ୍ୟାଚ୍‌ରେ ଆରସିବି ହାରିନାହିଁ। ବେଙ୍ଗାଲୁରୁ ମହିଳା ପ୍ରିମିୟର ଲିଗ୍‌-୨୦୨୪ରେ ସେମାନଙ୍କର ଶେଷ ତିନୋଟି ମ୍ୟାଚ୍ ଜିତି ହ୍ୟାଟ୍ରିକ୍ ବିଜୟ ହାସଲ କରିଛି। ସେହି ସମୟରେ, ମହିଳା ପ୍ରିମିୟର ଲିଗ୍‌-୨୦୨୫ର ପ୍ରଥମ ମ୍ୟାଚ୍ ଜିତି, ଏହା ଏହାର ବିଜୟ ଧାରା ଚାରିଟି ମ୍ୟାଚ୍‌କୁ ବୃଦ୍ଧି କରିଛି।

ଅଧିକ ପଢ଼ନ୍ତୁ: ଆମେରିକାରେ ଏମାନେ ଆଉ ସୈନିକ ହୋଇପାରିବେନି