ନୂଆଦିଲ୍ଲୀ: ଆଜି ସମଗ୍ର ଦେଶରେ ବେଶ ଧୁମଧାମର ସହ ଗଣେଶ ଚତୁର୍ଥୀ ପାଳନ କରାଯାଉଛି । ପୁରପଲ୍ଲୀଠୁ ନେଇ ସହର ପର୍ଯ୍ୟନ୍ତ ସବୁଠି ବିଘ୍ନ ବିନାଶକ ଗଣେଶଙ୍କୁ ନେଇ ଉତ୍ସବ ମୁଖର ହୋଇ ଉଠିଛି । ବିଶେଷ କରି ମହାରାଷ୍ଟ୍ରରେ ଗଣେଶ ଚତୁର୍ଥୀକୁ ନେଇ ଭକ୍ତଙ୍କ ମଧ୍ୟରେ ବିଶେଷ ଉତ୍ସାହ ଦେଖିବାକୁ ମିଳିଥାଏ । କେବଳ ଭାରତ ନୁହେଁ ଦୁନିଆର ଅନେକ ଦେଶରେ ଗଣେଶ ପୂଜା ଧୁମଧାମର ସହ ପାଳନ କରାଯାଉଛି । ଏହି କ୍ରମରେ ଅଷ୍ଟ୍ରେଲିଆର ବିସ୍ଫୋରକ ଓପନର ଡେଭିଡ ୱାର୍ଣ୍ଣରଙ୍କ ପୁଣି ଥରେ ଭାରତ ପ୍ରେମ ଏବଂ ସଂସ୍କୃତି ପ୍ରତି ଭଲ ପାଇବା ଦେଖିବାକୁ ମିଳିଛି । 

ସାମାଜିକ ଗଣମାଧ୍ୟମରେ ୱାର୍ଣ୍ଣରଙ୍କ ଷ୍ଟୋରୀ ଦ୍ରୁତ ଗତିରେ ଭାଇରାଲ୍ ହେବାରେ ଲାଗିଛି । ଏହି ଅଷ୍ଟ୍ରେଲିଆ ବ୍ୟାଟର ବେଶ ଆନନ୍ଦର ସହ ଗଣେଶ ପୂଜା ପାଳନ କରିଛନ୍ତି । ଏହା ପରେ ସେ ନିଜର ସାମାଜିକ ଗଣମାଧ୍ୟମରେ ଷ୍ଟୋରୀ ସେୟାର କରିଛନ୍ତି । ୱାର୍ଣ୍ଣରଙ୍କ ପୋଷ୍ଟକୁ ଲୋକେ ବହୁତ ପସନ୍ଦ କରିଛନ୍ତି । ପ୍ରଥମ ଥର ୱାର୍ଣ୍ଣରଙ୍କ ଭାରତ ପ୍ରତି ଭଲ ପାଇବା ଦେଖିବାକୁ ମିଳିନି, ଏହା ପୂର୍ବରୁ ମଧ୍ୟ ଭାରତୀୟ ସଂସ୍କୃତି ପ୍ରତି ନିଜର ଭଲ ପାଇଦା ଦର୍ଶାଇ ଆସିଛନ୍ତି । ସେ ଭାରତୀୟ ଫିଲ୍ମର ଅନେକ ଗୀତରେ ନାଚୁଥିବାର ଭିଡିଓ ମଧ୍ୟ ସେୟାର କରିଛନ୍ତି । 

ୱାର୍ଣ୍ଣରଙ୍କ କ୍ୟାରିୟର ଉପରେ ନଜର ପକାଇଲେ ଏହି ଖେଳାଳି ଅଷ୍ଟ୍ରେଲିଆ ପକ୍ଷରୁ ୧୧୨ ଟେଷ୍ଟ, ୧୬୧ ଦିିନିକିଆ ଓ ୧୧୦ ଟି-୨୦ ମ୍ୟାଚ୍ ଖେଳିଛନ୍ତି । ୱାର୍ଣ୍ଣର ଟେଷ୍ଟରେ ୭୦.୨ ଷ୍ଟ୍ରାଇକ ରେଟ୍ ଓ ୪୪.୬ ହାରରେ ୮୭୮୬ ରନ କରିଛନ୍ତି । ଏଥିରେ ୨୬ ଶତକ ଓ ୩୭ ଅର୍ଦ୍ଧଶତକ ସାମିଲ । ସେହିପରି ଦିନିକିଆରେ ୯୭.୨୬ ଷ୍ଟ୍ରାଇକ୍ ରେଟ୍ ଓ ୪୫.୦୧ ହାରରେ ୬୯୩୨ ରନ କରିଛନ୍ତି । ଦିନିକିଆରେ ତାଙ୍କ ନାମରେ ୨୨ ଶତକ ଓ ୩୩ ଅର୍ଦ୍ଧଶତକ ସାମିଲ । ଟି-୨୦ରେ ସେ ୧୪୨.୪୮ ଷ୍ଟ୍ରାଇକ ରେଟ୍ ଓ ୩୩.୩୩ ହାରରେ ୨୩୦୦ ରନ କରିଛନ୍ତି । ଏଥିରେ ଗୋଟିଏ ଶତକ ସାମିଲ ।