ବେଙ୍ଗାଲୁରୁ: ଦୀଲିପ ଟ୍ରଫିର ଏକ ଗୁରୁତ୍ୱପୂର୍ଣ୍ଣ ସେମିଫାଇନାଲ୍ ମୁକାବିଲାରେ ପୂର୍ବାଞ୍ଚଳ (East Zone) ଦଳକୁ ଏକ ବଡ଼ ଝଟକା ଲାଗିଛି। ଦଳର ଅଧିନାୟକ ତଥା ଷ୍ଟାର୍ ୱିକେଟକିପର ଇଶାନ କିଶନ ଆହତ ହୋଇ ମଇଦାନରୁ ବାହାରି ଯିବା ପରେ, ମାତ୍ର ୧୫ ବର୍ଷ ବୟସ୍କ ଯୁବ ବ୍ୟାଟ୍ସମ୍ୟାନ୍ ବୈଭବ ସୂର୍ଯ୍ୟବଂଶୀ ଦଳର ଅଧିନାୟକତ୍ୱ ସମ୍ଭାଳିଛନ୍ତି।

ବେଙ୍ଗାଲୁରୁରେ ଚାଲିଥିବା ଏହି ସେମିଫାଇନାଲ୍ ମ୍ୟାଚ୍‌ରେ ପୂର୍ବଞ୍ଚଳ ଏବଂ ମଧ୍ୟାଞ୍ଚଳ (Central Zone) ପରସ୍ପରକୁ ଭେଟିଛନ୍ତି। ମ୍ୟାଚ୍‌ର ପ୍ରଥମ ଦିନରେ ମଧ୍ୟାଞ୍ଚଳ ବ୍ୟାଟିଂ କରୁଥିବା ବେଳେ ଇନିଂସର ୧୯ତମ ଓଭରରେ ଏହି ଦୁର୍ଘଟଣା ଘଟିଥିଲା। ୱିକେଟକିପିଂ କରୁଥିବା ସମୟରେ ଇଶାନ କିଶନଙ୍କ ଡାହାଣ କଚ୍ଚିରେ ଜୋର୍ରେ ବଲ୍ ବାଜିଥିଲା।

ଫଳରେ ସେ ଗଭୀର ଯନ୍ତ୍ରଣା ଅନୁଭବ କରିଥିଲେ ଏବଂ ଫିଜିଓ ପଡ଼ିଆ ଭିତରେ ପହଞ୍ଚି ତାଙ୍କର ପ୍ରାଥମିକ ଚିକିତ୍ସା କରିଥିଲେ ମଧ୍ୟ ସେ ଆଉ ଖେଳିପାରି ନଥିଲେ। ପରେ ସେ ହାତରେ ବ୍ୟାଣ୍ଡେଜ୍ ବାନ୍ଧି ଡ୍ରେସିଂ ରୁମକୁ ଚାଲିଯାଇଥିଲେ। ଇଶାନଙ୍କ ଅନୁପସ୍ଥିତିରେ କୁମାର କୁଷାଗ୍ର ୱିକେଟକିପିଂ ଦାୟିତ୍ୱ ନେଇଥିବାବେଳେ, ଦଳର ଉପ-ଅଧିନାୟକ ତଥା ୧୫ ବର୍ଷୀୟ ବୈଭବ ସୂର୍ଯ୍ୟବଂଶୀ ଅଧିନାୟକତ୍ୱ ଆଧାରରେ ଟିମ୍ ପରିଚାଳନା କରିଥିଲେ।

ଟୁର୍ଣ୍ଣାମେଣ୍ଟ ଆରମ୍ଭ ହେବା ପୂର୍ବରୁ ଯେତେବେଳେ ଏତେ କମ୍ ବୟସର ବୈଭବଙ୍କୁ ପୂର୍ବାଞ୍ଚଳ ଦଳର ଉପ-ଅଧିନାୟକ କରାଯାଇଥିଲା, ସେତେବେଳେ କ୍ରିକେଟ୍ କରିଡରରେ ଏହାକୁ ନେଇ ବେଶ୍ ଚର୍ଚ୍ଚା ଓ ବିତର୍କ ହୋଇଥିଲା। ଅନେକ ବିଶେଷଜ୍ଞ ମତ ଦେଇଥିଲେ ଯେ ତାଙ୍କୁ ଏବେ ପରିପକ୍ୱତା ହାସଲ କରିବାକୁ ବହୁତ ବାକି ଅଛି। ମାତ୍ର ଚୟନକର୍ତ୍ତାମାନେ ତାଙ୍କ ଦକ୍ଷତା ଉପରେ ଭରସା ରଖି ନିଜ ନିଷ୍ପତ୍ତିରେ ଅଟଳ ରହିଥିଲେ। ଆଜି ହଠାତ୍ ପରିସ୍ଥିତି ବଦଳିବାରୁ ସେହି କମ୍ ବୟସ୍କ ଖେଳାଳିଙ୍କୁ ସେମିଫାଇନାଲ୍ ପରି ବଡ଼ ମ୍ୟାଚ୍‌ରେ ଅଧିନାୟକ ହେବାର ସୁଯୋଗ ମିଳିଛି।

ବୈଭବଙ୍କ ବ୍ୟକ୍ତିଗତ ପ୍ରଥମ ଶ୍ରେଣୀ  କ୍ରିକେଟ୍ କ୍ୟାରିୟରକୁ ଦେଖିଲେ, ସେ ଏପର୍ଯ୍ୟନ୍ତ ନିଜକୁ ସମ୍ପୂର୍ଣ୍ଣ ପ୍ରତିଷ୍ଠା କରିବା ପଥରେ ଅଛନ୍ତି। ସେ ଏଯାବତ୍ ମୋଟ ୯ଟି ପ୍ରଥମ ଶ୍ରେଣୀ ମ୍ୟାଚ୍ ଖେଳି ୧୯୩ ରନ୍ ସଂଗ୍ରହ କରିଛନ୍ତି ଏବଂ ୧୩ଟି ପାଳିରୁ ତାଙ୍କ ନାମରେ ମାତ୍ର ଗୋଟିଏ ଅର୍ଦ୍ଧଶତକ ରହିଛି। ଏହାପୂର୍ବରୁ ଉତ୍ତର-ପୂର୍ବଞ୍ଚଳ ବିପକ୍ଷ ମ୍ୟାଚ୍‌ରେ ଉପ-ଅଧିନାୟକ ଭାବେ ଖେଳି ମାତ୍ର ୮ ରନ୍ କରି ଆଉଟ୍ ହୋଇଥିଲେ ହେଁ, ସେ ବୋଲିଂରେ ଚମତ୍କାର ପ୍ରଦର୍ଶନ କରି ୨ଟି ୱିକେଟ୍ ଅକ୍ତିକାର କରିଥିଲେ।