ଗଞ୍ଜାମ: ଗଞ୍ଜାମ ଜିଲ୍ଲା ଆସିକାରେ ଜଣେ ଭାରତୀୟ ଜନତା ପାର୍ଟିର ନେତାଙ୍କ ଉପରେ ମରଣାନ୍ତକ ଆକ୍ରମଣ ହୋଇଛି । କୋଟିନଡ଼ା ଥାନା କଲେଜ ଛକ ସୂତାକଳ ରାସ୍ତାରେ ବିଜେପି ନେତା ଶ୍ରୀନିବାସ ଭଞ୍ଜଙ୍କୁ ଆକ୍ରମଣ କରାଯାଇଥିବା ଅଭିଯୋଗ ହୋଇଛି । ତାଙ୍କ ମୁଣ୍ଡରେ ଗଭୀର ଆଘାତ ଲାଗିଛି । ତାଙ୍କୁ ଗୁରୁତର ଅବସ୍ଥାରେ ଆସିକା ଉପଖଣ୍ଡ ମେଡ଼ିକାଲରେ ଭର୍ତ୍ତି କରାଯାଇଛି । 

ମିଳିଥିବା ସୂଚନା ମୁତାବକ, ଗତକାଲି ରାତିରେ ଶ୍ରୀନିବାସ ଭଞ୍ଜ ଘରକୁ ଫେରୁଥିବାବେଳେ କୋଟିନଡ଼ା ଥାନା କଲେଜ ଛକ ସୂତାକଳ ରାସ୍ତାରେ ତାଙ୍କ ଉପରେ ମରଣାନ୍ତକ ଆକ୍ରମଣ ହୋଇଥିଲା । ପ୍ରାୟ ଦୁଇ ରୁ ତିନି ଜଣ ତାଙ୍କୁ ଲୁହା ରଡ଼ରେ ମାରିଥିଲେ । ସ୍ଥାନୀୟ ଲୋକ ତାଙ୍କୁ ଉଦ୍ଧାର କରି ଆସିକା ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ। ଏହା ପରେ ତାଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ହେବାରୁ ତାଙ୍କୁ ବ୍ରହ୍ମପୁର ଏମକେସିଜି ମେଡ଼ିକାଲକୁ ସ୍ଥାନାନ୍ତର କରାଯାଇଛି । ଚିକିତ୍ସା ପରେ ତାଙ୍କ ସ୍ୱାସ୍ଥ୍ୟାବସ୍ଥାରେ ସୁଧାର ଆସିଥିବା ଜଣା ପଡ଼ିଛି । ତେବେ ତାଙ୍କୁ ରାଜନୈତିକ ଆକ୍ରୋଶ ରଖି ଆକ୍ରମଣ କରାଯାଇଥିବା ସେ ଅଭିଯୋଗ କରିଛନ୍ତି । କୋଟିନଡ଼ା ପୋଲିସ ଘଟଣାର ତଦନ୍ତ ଆରମ୍ଭ କରିଛି । 

ଶ୍ରୀନିବାସ ଭଞ୍ଜ ଘୁମୁସର ଯୁବ ମୋର୍ଚ୍ଚା ସଭାପତି ହୋଇଥିଲେ । ଏହା ବାଦ ସେ ଜିଲ୍ଲା ପରିଷଦ ଭାବେ ବିଜେପି  ପକ୍ଷରୁ ଦୁଇ ଥର ପ୍ରାର୍ଥୀ ହୋଇଥିଲେ l 

ଏଠାରେ ଉଲ୍ଲେଖ ଯୋଗ୍ୟ, ଗତ ଶନିବାର ବଲାଙ୍ଗୀର ଜିଲ୍ଲା ପାଟଣାଗଡ଼ରେ ବିଜେଡ଼ି ବ୍ଲକ ଅଧ୍ୟକ୍ଷ ନୀଳକାନ୍ତ ବାଗ ବିଜେପି ମଣ୍ଡଳ ସଭାପତି ସ୍ୱରୁପ ପରୁଆଙ୍କ ଉପରେ ସଂଘବଦ୍ଧ ଆକ୍ରମାଣ ହୋଇଥିଲା । ଏହି ଘଟଣାରେ ପାଟଣାଗଡ ପୋଲିସ ବ୍ଲକ ଅଧ୍ୟକ୍ଷ ନୀଳକାନ୍ତ ବାଗ ସହ ମାଧବ ବାଗ ଓ ଜୟଚନ୍ଦ୍ର ନାଗଙ୍କୁ ଗିରଫ କରିଥିଲା ।