ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଭାରତୀୟ ସେନାର ଯବାନଙ୍କ ସହ ଦୀପାବଳି ପାଳନ କରିବେ। କଚ୍ଛରେ ଭାରତୀୟ ଯବାନଙ୍କ ସହ ସେ ଦୀପାବଳି ପାଳନ କରିବେ। ଏଥିପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କେଭାଡିଆରୁ ଭଦୋଦରା ଅଭିମୁଖେ ଯାତ୍ରା କରିଛନ୍ତି। ସେ ଭଦୋଦରାରୁ କଚ୍ଛର ନାଲିଆ ଏୟାରଫୋର୍ସ ଷ୍ଟେସନରେ ଅବତରଣ କରିବେ, ଯେଉଁଠାରୁ ସେମାନେ ସୈନିକମାନଙ୍କ ସହିତ ଦୀପାବଳି ପର୍ବ ପାଳନ କରିବାକୁ ଯିବେ । ପ୍ରଧାନମନ୍ତ୍ରୀ ହେବା ପରେ ପ୍ରଥମ ଥର ପାଇଁ ଗୁଜୁରାଟରେ ସୈନିକଙ୍କ ସହ ଦୀପାବଳି ପାଳନ କରିବେ। 

ଏହା ପୂର୍ବରୁ ପ୍ରଧାନମନ୍ତ୍ରୀ ମୋଦି ମୁଖ୍ୟମନ୍ତ୍ରୀ ଥିବା ବେଳେ ଗୁଜରାଟର ଯବାନଙ୍କ ସହ ଦୀପାବଳି ମଧ୍ୟ ପାଳନ କରିଥିଲେ। ଏହା ପୂର୍ବରୁ ଅନେକ ଥର ଦୀପାବଳି ଅବସରରେ ଯବାନଙ୍କ ସହ ପ୍ରଧାନମନ୍ତ୍ରୀ ମୋଦୀଙ୍କୁ ଦେଖିବାକୁ ମିଳିଛି।

୨୦୧୪ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରଧାନମନ୍ତ୍ରୀ ହେବା ପରେ ପ୍ରଥମ ଥର ପାଇଁ ସିଆଚେନରେ ମୁତୟନ ହୋଇଥିବା ସୁରକ୍ଷା ବାହିନୀ ସହ ଦୀପାବଳି ପାଳନ କରିଥିଲେ। ପରବର୍ଷ ସେ ପଞ୍ଜାବର ତିନୋଟି ଯୁଦ୍ଧ ସ୍ମାରକୀ ପରିଦର୍ଶନ କରି ୧୯୬୫ ଯୁଦ୍ଧରେ ଭାରତୀୟ ସେନାର ସଫଳତାକୁ ସମ୍ମାନ ଜଣାଇଥିଲେ। ୨୦୧୬ରେ ସେ ହିମାଚଳ ପ୍ରଦେଶ ଗସ୍ତ କରି ଚୀନ୍ ସୀମା ନିକଟରେ ଆଇଟିବିପି, ଡୋଗ୍ରା ସ୍କାଉଟ୍ ସ ଏବଂ ସେନା ଯବାନଙ୍କୁ ଭେଟିଥିଲେ।  

୨୦୧୭ରେ ପ୍ରଧାନମନ୍ତ୍ରୀ ମୋଦୀ ଉତ୍ତର କଶ୍ମୀରର ଗୁରେଜ ସେକ୍ଟରରେ ଦୀପାବଳି ପାଳନ କରିଥିବା ବେଳେ ୨୦୧୮ରେ ଉତ୍ତରାଖଣ୍ଡର ହର୍ସିଲରେ ଯବାନଙ୍କ ସହ ଆଶ୍ଚର୍ଯ୍ୟଜନକ ଭାବେ ଦୀପାବଳି ପାଳନ କରିଥିଲେ। ୨୦୧୯ରେ ସେ ଜମ୍ମୁ-କଶ୍ମୀରର ରାଜୌରୀରେ ମୁତୟନ ଥିବା ଯବାନଙ୍କ ସହ ଦୀପାବଳି ପାଳନ କରିଥିଲେ ଏବଂ ୨୦୨୦ରେ ଲଙ୍ଗେୱାଲାସ୍ଥିତ ସୀମା ଘାଟିକୁ ଯାଇ ଯବାନମାନଙ୍କୁ ଭେଟିଥିଲେ।

 ୨୦୨୧ରେ ପ୍ରଧାନମନ୍ତ୍ରୀ ଜମ୍ମୁ-କଶ୍ମୀରର ନୌଶେରାରେ ଯବାନଙ୍କ ସହ ଦୀପାବଳି ପାଳନ କରିଥିଲେ। ଗତବର୍ଷ ସେ କାର୍ଗିଲରେ ମୁତୟନ ଥିବା ଯବାନଙ୍କ ସହ ଦୀପାବଳି ପାଳନ କରିଥିଲେ।  

ଦୀପାବଳି ପାଳନ ପାଇଁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଆଜି ଅରୁଣାଚଳ ପ୍ରଦେଶର ତୱାଙ୍ଗରେ ପହଞ୍ଚିବେ। ସେଠାରେ ସେ ଭାରତୀୟ ସେନାର ଯବାନଙ୍କ ସହ ଦୀପାବଳି ପାଳନ କରିବେ। ଏହାପୂର୍ବରୁ କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଓ ସେନା ମୁଖ୍ୟ ଜେନେରାଲ ଉପେନ୍ଦ୍ର ଦ୍ୱିବେଦୀ ବୁଧବାର ସନ୍ଧ୍ୟାରେ ଆସାମର ତେଜପୁରରେ ପହଞ୍ଚିଥିଲେ।  ଏଠାରେ ସେ ମେଘନା ଷ୍ଟାଡିୟମରେ ସେନା ଯବାନଙ୍କ ସହ ଦୀପାବଳି ପାଳନ କରିବା ସହ ସେମାନଙ୍କ ସହ ରାତ୍ରୀ ଭୋଜନ ମଧ୍ୟ କରିଥିଲେ।  

ଅଧିକ ପଢ଼ନ୍ତୁ: 'ଆଇରନ୍ ମ୍ୟାନ୍'ଙ୍କୁ ଶ୍ରଦ୍ଧାଞ୍ଜଳି ଜଣାଇ ଏକତାର ଶପଥ ଦେଲେ ପ୍ରଧାନମନ୍ତ୍ରୀ