ନୂଆଦିଲ୍ଲୀ:ଅଲିମ୍ପିକ ମଇଦାନରେ ପରାଜୟର ମୁହଁ ଦେଖିଥିବା କୁସ୍ତି ଯୋଦ୍ଧା ଭିନେଶ ଫୋଗାଟ୍ ନିର୍ବାଚନ ମଇଦାନ ବିଜୟର ସ୍ୱାଦ ଚାଖିଛନ୍ତି ।  ହରିୟାଣା ବିଧାନସଭା ନିର୍ବାଚନରେ ଜୁଲାନା ଆସନରେ ବିଜୟ ହାସଲ କରିଛନ୍ତି ଭିନେଶ । ଯାହା ଉପରେ ସାରା ଦେଶର ନଜର ରହିଥିଲା । କଂଗ୍ରେସ ପ୍ରାର୍ଥୀ ଭିନେଶ ଫୋଗାଟ୍ ତାଙ୍କର ବିଜେପି ପ୍ରତିନ୍ଦ୍ୱନ୍ଦୀ ଯୋଗେଶ ବୈରାଗୀଙ୍କୁ ୬,୦୧୫ ଖଣ୍ଡ ଭୋଟ ବ୍ୟବଧାନରେ ପରାସ୍ତ କରିଛନ୍ତି । ଭିନେଶଙ୍କ ଖାତାକୁ ୬୫,୦୦୦ ଭୋଟ୍ ଯାଇଥିବାବେଳେ ଯୋଗେଶ ବୈରାଗୀ ୫୯,୦୬୫ ଖଣ୍ଡ ଭୋଟ ପାଇଛନ୍ତି । 

ଭିନେଶଙ୍କ ବିଜୟରେ ଅଲିମ୍ପିକ ବିଜେତା ବଜରଙ୍ଗ ପୁନିଆ ଶୁଭେଚ୍ଛା ଜଣାଇଛନ୍ତି । ସେ କହିଛନ୍ତି ଯେ ଏହା କେବଳ ୩-୪ ଜଣ ମଧ୍ୟରେ ପ୍ରତିଯୋଗୀତା ନ ଥିଲା ବରଂ ଦେଶର ସବୁଠାରୁ ମଜବୁତ ଶକ୍ତି ବିରୋଧରେ ଏ ଲଢ଼େଇ ଥିଲା । ଯେଉଁଥିରେ ଆମ ଭିନେଶ ବିଜେତା ହୋଇଛନ୍ତି । 

ସୂଚନାଯୋଗ୍ୟ, ପ୍ୟାରିସ ଅଲିମ୍ପିକ୍ସରେ ମାତ୍ର ୧୦୦ ଗ୍ରାମ ଅଧିକ ଓଜନ କାରଣରୁ ଫାଇନାଲ ଖେଳିବାରୁ ବଞ୍ଚିତ ହେବା ସହ ପଦକ ହରାଇଥିବା ଭିନେଶ ଫୋଗାଟ୍ ରାଜନୀତିରେ ନୂତନ ଇନିଂସ ଆରମ୍ଭ କରିଥିଲେ । ସେ ସେପ୍ଟେମ୍ବରରେ କଂଗ୍ରେସରେ ଯୋଗ ଦେଇଥିଲେ ଏବଂ ଜୁଲାନା ଆସନରୁ ଟିକେଟ୍ ପାଇ ନିର୍ବାଚନ ରଣ କ୍ଷେତ୍ରକୁ ଓହ୍ଲାଇଥିଲେ ।