ମୁମ୍ବାଇ: ମହାରାଷ୍ଟ୍ରରେ ଠାକରେ ଭ୍ରାତାଙ୍କୁ ଏକ ଝଟକା ଲାଗିଛି । ପୂର୍ବତନ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଏବଂ ମହାରାଷ୍ଟ୍ର ନବନିର୍ମାଣ ସେନା (ଏମ୍ଏନ୍ଏସ୍) ରାଜ ଠାକରେଙ୍କ ସହିତ ମେଣ୍ଟ କରିବା ପରେ ମୁମ୍ବାଇରେ ଅନୁଷ୍ଠିତ ପ୍ରଥମ ନିର୍ବାଚନରେ ଠାକରେ ଭ୍ରାତା ନିରାଶ ହୋଇଛନ୍ତି । ବିଇଏସଟି (BEST) କ୍ରେଡିଟ୍ ସୋସାଇଟି ନିର୍ବାଚନରେ ଶିବସେନା (ୟୁବିଟି) ଏବଂ ଏମ୍ଏନ୍ଏସ୍ ମେଣ୍ଟ ଏକ ବଡ଼ ପରାଜୟର ସମ୍ମୁଖୀନ ହୋଇଛି। 

ମୋଟ ୨୧ ଟି ଆସନରୁ ମେଣ୍ଟ ଗୋଟିଏ ବି ଆସନ ଜିତିବାରେ ସକ୍ଷମ ହୋଇନାହିଁ ।  ବିଇଏସଟି କର୍ମଚାରୀ ସଂଘ (ଶଶାଙ୍କ ରାଓ ପ୍ୟାନେଲ) ୧୪ଟି ଆସନରେ ବିଜୟ ଲାଭ କରିଥିବାବେଳେ ବିଜେପି ସମର୍ଥିତ ପ୍ୟାନେଲକୁ ମଧ୍ୟ ମାତ୍ର ୭ଟି ଆସନରେ ସନ୍ତୁଷ୍ଟ ହେବାକୁ ପଡିଛି । କିନ୍ତୁ ଶିବସେନା (ୟୁବିଟି) ଏବଂ ଏମ୍ଏନ୍ଏସ୍ ମେଣ୍ଟ ଖାତା ମଧ୍ୟ ଖୋଲିପାରିଲା ନାହିଁ। 

ଏହି ନିର୍ବାଚନ ଟିକେ ସ୍ୱତନ୍ତ୍ର ଥିଲା, କାରଣ ଉଦ୍ଧବ ଠାକରେ ଏବଂ ରାଜ ଠାକରେଙ୍କ ମିଳିତ ମେଣ୍ଟ ପ୍ରଥମ ଥର ପାଇଁ ଏକାଠି ନିର୍ବାଚନ ଲଢ଼ିଥିଲେ। କିନ୍ତୁ ଏଥିରେ ତାଙ୍କୁ ପରାଜୟର ମୁହଁ ଦେଖିବାକୁ ମିଳିଛି । ବିଇଏସଟି ସୋସାଇଟି ନିର୍ବାଚନ ପାଇଁ, ଶିବସେନା ଏବଂ ଏମଏନଏସ ଏକ 'ଉତ୍କର୍ଷ ପ୍ୟାନେଲ' ଅଧୀନରେ ଏକ ମେଣ୍ଟ ଗଠନ କରିଥିଲେ ଏବଂ ୨୧ ସଦସ୍ୟ ବିଶିଷ୍ଟ ନିର୍ଦ୍ଦେଶକ ବୋର୍ଡ ପାଇଁ ମୋଟ ୨୧ ଜଣ ପ୍ରାର୍ଥୀଙ୍କୁ ପ୍ରାର୍ଥୀ କରିଥିଲେ । ଏମାନଙ୍କ ମଧ୍ୟରୁ  ୧୮ ଜଣ ଶିବସେନା (ୟୁବିଟି)ରୁ, ୨ ଜଣ ଏମଏନଏସରୁ ଏବଂ ଜଣେ ଅନୁସୂଚିତ ଜାତି ଏବଂ ଜନଜାତି ସଂଘର ପ୍ରତିନିଧିତ୍ୱ କରୁଥିଲେ, ଯାହା ମେଣ୍ଟ ସହିତ ଜଡିତ ଥିଲା।

ଏହି ପରିପ୍ରେକ୍ଷୀରେ ବିଜେପି ମୁଖ୍ୟ ମୁଖପାତ୍ର କେଶବ ଉପାଧ୍ୟାୟ ଠାକରେ ଭ୍ରାତାଙ୍କୁ କଟାକ୍ଷ କରିଛନ୍ତି । ସେ କହିଛନ୍ତି ଦୁଇଟି ଶୂନର ଯୋଗଫଳ ସର୍ବଦା ଶୂନ, ଏହା ଏକ ସରଳ ଗଣିତ । ଅନ୍ୟପକ୍ଷରେ ଶିବସେନା (ୟୁବିଟି) ସାଂସଦ ସଞ୍ଜୟ ରାଉତ ସ୍ଥାନୀୟ ନିର୍ବାଚନକୁ ଉଦ୍ଧୃତି ଦେଇ ମନ୍ତବ୍ୟ ଦେବାକୁ ମନା କରିଦେଇଛନ୍ତି।

ବିଇଏସଟି କର୍ମଚାରୀ ସଂଘର ନେତା ଶଶାଙ୍କ ରାଓ ଏହାକୁ କର୍ମଚାରୀଙ୍କ ବିଶ୍ୱାସର ବିଜୟ ବୋଲି କହିଛନ୍ତି। ସେହିପରି ବିଜେପି ସମର୍ଥିତ ପ୍ୟାନେଲ ମଧ୍ୟ ସାତଟି ଆସନ ଜିତି ନିଜର ଦୃଢ଼ ଉପସ୍ଥିତି ଜାହିର କରିଛି।