ନୂଆଦିଲ୍ଲୀ: ସରକାରୀ ଚାକିରିରେ ସଂରକ୍ଷଣ ବ୍ୟବସ୍ଥାକୁ ନେଇ ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି। ସର୍ବୋଚ୍ଚ ଅଦାଲତ କହିଛନ୍ତି ଯେ, ଯଦି ଅନୁସୂଚିତ ଜାତି (SC), ଅନୁସୂଚିତ ଜନଜାତି (ST), ଅନ୍ୟାନ୍ୟ ପଛୁଆ ବର୍ଗ (OBC) ଏବଂ ଆର୍ଥିକ ଅନଗ୍ରସର ବର୍ଗ (EWS)ର ପ୍ରାର୍ଥୀମାନେ ସାଧାରଣ ବର୍ଗ (General Category) ର କଟ୍-ଅଫ୍‌ଠାରୁ ଅଧିକ ନମ୍ବର ରଖନ୍ତି, ତେବେ ସେମାନେ ସାଧାରଣ ବର୍ଗର ସିଟ୍‌ରେ ସରକାରୀ ଚାକିରି ପାଇବା ପାଇଁ ଯୋଗ୍ୟ ବିବେଚିତ ହେବେ। ଭାରତରେ ସରକାରୀ ଚାକିରି ଏବଂ ଶିକ୍ଷାନୁଷ୍ଠାନଗୁଡ଼ିକରେ ନାମଲେଖା କ୍ଷେତ୍ରରେ ଏହି ନିଷ୍ପତ୍ତିର ଦୂରଗାମୀ ପ୍ରଭାବ ପଡ଼ିବ। 

ସୁପ୍ରିମକୋର୍ଟଙ୍କ ଏହି ନିଷ୍ପତ୍ତିକୁ ସଂରକ୍ଷଣ ଶ୍ରେଣୀଭୁକ୍ତ ମେଧାବୀ ପ୍ରାର୍ଥୀଙ୍କ ପାଇଁ ଏକ ବଡ଼ ବିଜୟ ବୋଲି କୁହାଯାଉଛି। ଏହି ନିଷ୍ପତ୍ତି ସହିତ ସରକାରୀ ଚାକିରିରେ ସାଧାରଣ ବର୍ଗର ସିଟ୍‌ର ପରିଭାଷା ମଧ୍ୟ ନୂଆ ଭାବେ ନିର୍ଦ୍ଧାରିତ ହୋଇଛି। ରାଜସ୍ଥାନ ହାଇକୋର୍ଟଙ୍କ ଦ୍ୱାରା ଦାୟର ଏକ ମାମଲାରେ ସୁପ୍ରିମକୋର୍ଟ ଏହି ରାୟ ଶୁଣାଇଛନ୍ତି। ପୂର୍ବରୁ ଏକ ନିଯୁକ୍ତି ପ୍ରକ୍ରିୟାରେ ନିୟମ କରାଯାଇଥିଲା ଯେ, ସଂରକ୍ଷିତ ବର୍ଗର ପ୍ରାର୍ଥୀଙ୍କୁ ସାଧାରଣ ବର୍ଗର ସିଟ୍‌ରେ ନିଯୁକ୍ତି ଦିଆଯିବ ନାହିଁ, ସେମାନଙ୍କ ନମ୍ବର ସାଧାରଣ ବର୍ଗର କଟ୍-ଅଫ୍‌ଠାରୁ ଅଧିକ ଥିଲେ ମଧ୍ୟ। 

ରାଜସ୍ଥାନ ହାଇକୋର୍ଟଙ୍କ ପକ୍ଷରୁ ଯୁକ୍ତି କରାଯାଇଥିଲା ଯେ, ଯଦି ଏସସି, ଏସଟି, ଓବିସି ଏବଂ  ଇଡବ୍ଲୁଏସ ପ୍ରାର୍ଥୀମାନଙ୍କୁ ସାଧାରଣ ସିଟ୍ ନେବାକୁ ଅନୁମତି ଦିଆଯାଏ, ତେବେ ସେମାନଙ୍କୁ 'ଦ୍ୱିଗୁଣିତ ଲାଭ' ମିଳିଯିବ। ଏକ ସଂରକ୍ଷଣ ମାଧ୍ୟମରେ ଏବଂ ଅନ୍ୟଟି ସାଧାରଣ ବର୍ଗ ମାଧ୍ୟମରେ। କିନ୍ତୁ ସୁପ୍ରିମକୋର୍ଟ ଏହି ଯୁକ୍ତିକୁ ପ୍ରତ୍ୟାଖ୍ୟାନ କରିଛନ୍ତି। ଜଷ୍ଟିସ ଦୀପଙ୍କର ଦତ୍ତ ଏବଂ ଜଷ୍ଟିସ ଏଜି ମସିହଙ୍କ ବେଞ୍ଚ ରାଜସ୍ଥାନ ହାଇକୋର୍ଟ ପ୍ରଶାସନ ଓ ରେଜିଷ୍ଟ୍ରାରଙ୍କ ଆବେଦନକୁ ଖାରଜ କରି କହିଛନ୍ତି ଯେ, ଯୋଗ୍ୟତାକୁ ତାର ଉଚିତ୍ ସମ୍ମାନ ମିଳିବା ଆବଶ୍ୟକ।

ଓପନ କ୍ୟାଟେଗୋରୀ ସିଟ୍ ସମସ୍ତଙ୍କ ପାଇଁ 

ନିଜ ନିଷ୍ପତ୍ତିରେ ସୁପ୍ରିମକୋର୍ଟ ୧୯୯୨ ମସିହାର ଇନ୍ଦିରା ସାହାନୀ କେସ୍‌ର ଐତିହାସିକ ରାୟକୁ ମଧ୍ୟ ଉଦ୍ଧାର କରିଛନ୍ତି। ଜଷ୍ଟିସ ଦତ୍ତ କହିଛନ୍ତି, "ଆମେ ବିଶ୍ୱାସ କରୁ ଯେ 'ଓପନ' ଶବ୍ଦର ସିଧାସଳଖ ଅର୍ଥ ହେଉଛି ଖୋଲା। ଓପନ କ୍ୟାଟେଗୋରୀ ସିଟ୍ କୌଣସି ନିର୍ଦ୍ଦିଷ୍ଟ ଜାତି ବା ଗୋଷ୍ଠୀ ପାଇଁ ସଂରକ୍ଷିତ ନୁହେଁ। ଏହା ସମସ୍ତଙ୍କ ପାଇଁ।" ସର୍ବୋଚ୍ଚ ଅଦାଲତ ସ୍ପଷ୍ଟ କରିଛନ୍ତି ଯେ କେବଳ ସଂରକ୍ଷଣର ସୁବିଧା ଥିବାରୁ SC, ST, OBC କିମ୍ବା EWS ବର୍ଗର ଜଣେ ଯୋଗ୍ୟ ପ୍ରାର୍ଥୀଙ୍କୁ କେବଳ ମେଧା ଆଧାରରେ ଅଣ-ସଂରକ୍ଷିତ ସିଟ୍‌ରୁ ଚୟନ ହେବାରୁ ରୋକାଯାଇ ପାରିବ ନାହିଁ।

ଅଧିକ ପଢନ୍ତୁ: ଶରଜିଲ ଇମାମ, ଉମର ଖାଲିଦଙ୍କୁ ମିଳିଲାନି ଜାମିନ, ୫ ଅଭିଯୁକ୍ତଙ୍କ ବେଲ୍‌, ସୁପ୍ରିମକୋର୍ଟଙ୍କ ବଡ ନିଷ୍ପତ୍ତି