ନୂଆଦିଲ୍ଲୀ: ୨୬/୧୧ ମୁମ୍ବାଇ ଆକ୍ରମଣର ମାଷ୍ଟରମାଇଣ୍ଡ୍ ତହବୁର ରାଣାକୁ ଆଉ ୧୨ ଦିନ ପାଇଁ ରିମାଣ୍ଡରେ ନେଇଛି ଏନ୍ଆଇଏ । ପଟିଆଲା ହାଉସ୍ କୋର୍ଟରେ  ଏନ୍ଆଇଏ ତହବୁର ରାଣାକୁ ସୋମବାର ହାଜର କରିଛି । ତେବେ ତହବୁର ତଦନ୍ତରେ ସହଯୋଗ କରୁ ନ ଥିବା ଏନ୍ଆଇଏ କୋର୍ଟକୁ ଅବଗତ କରାଇଛି । 

ଏନ୍ଆଇଏ ୧୨ ଦିନିଆ ରିମାଣ୍ଡ ପାଇଁ ପଟିଆଲା ହାଉସ୍ କୋର୍ଟରେ ଆବେଦନ କରିଥିଲା । ସ୍ୱତନ୍ତ୍ର ବିଚାରପତି ଚନ୍ଦ୍ରଜୀତ ସିଂହ ଆବେଦନର ଶୁଣାଣି କରି ରାୟକୁ ସଂରକ୍ଷିତ ରଖିଥିଲେ । ଆଜି ତହବୁରକୁ ରିମାଣ୍ଡରେ ନେବାକୁ ଅନୁମତି ପ୍ରଦାନ କରିଛନ୍ତି । ଏହା ପରେ ଏନ୍ଆଇଏ ଆକ୍ରମଣ ସମ୍ପର୍କରେ ତହବୁରଠାରୁ ସତ ଓଗାଳିବାକୁ ଚେଷ୍ଟା କରିବ । 

ସୂଚନାଯୋଗ୍ୟ, ୨୦୦୮ ନଭେମ୍ବର ୨୬ ତାରିଖରେ ମୁମ୍ବାଇର ତାଜ ହୋଟେଲ, ଓବରୟ ଟ୍ରାଇଡେଣ୍ଟ, ଛତ୍ରପତି ଶିବାଜୀ ଟର୍ମିନାଲ ଓ ନରିମମ ହାଉସ ସମେତ ଅନେକ ଜାଗାରେ ଆତଙ୍କବାଦୀ ଆକ୍ରମଣ କରିଥିଲେ । ଏହି ଆକ୍ରମଣ କେବଳ ଭାରତ ନୁହେଁ ପୂରା ଦୁନିଆକୁ ସ୍ତବ୍ଧ କରି ଦେଇଥିଲା । ଏଥିରେ ବିଦେଶୀ ନାଗରିକ ସମେତ ୧୬୬ ଜଣଙ୍କ ମୃତ୍ୟୁ ଘଟିଥିଲା । ଗତ ୧୦ ଏପ୍ରିଲରେ ତହବୁରକୁ ଆମେରିକାରୁ ଭାରତକୁ ଅଣାଯାଇଥିଲା ।