ପହଲଗାମରେ ଆତଙ୍କବାଦୀ ଆକ୍ରମଣ ପରେ ଭାରତ-ପାକିସ୍ତାନରେ ବଢୁଥିବା ଉତ୍ତେଜନା ଏବଂ ସମ୍ବେଦନଶୀଳ ସୁରକ୍ଷା ପରିସ୍ଥିତି ମଧ୍ୟରେ ଜାତୀୟ ସାଇବର ଜରୁରୀକାଳୀନ ପ୍ରତିକ୍ରିୟା ଦଳ ବା ନ୍ୟାସନାଲ (ସିଇଆରଟି) ଏକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶାବଳୀ ଜାରି କରିଛି। ଏଥିରେ, ଜାତୀୟ ସୁରକ୍ଷା ସହ ଜଡିତ ଯେକୌଣସି ସୂଚନା ସେୟାର କରିବା ସମୟରେ ଅତ୍ୟନ୍ତ ସତର୍କତା ଅବଲମ୍ବନ କରିବାକୁ ଗଣମାଧ୍ୟମ ପ୍ରତିଷ୍ଠାନ, ସାମ୍ବାଦିକ, ଡିଜିଟାଲ୍ ବିଷୟବସ୍ତୁ ସୃଷ୍ଟିକାରୀ ଏବଂ ସାଧାରଣ ଲୋକଙ୍କୁ ନିବେଦନ କରାଯାଇଛି। 

ଏହି ଆଡଭାଇଜରୀରେ ସାମ୍ବାଦିକ, ଗଣମାଧ୍ୟମ ସଂଗଠନ, YouTubers, ବ୍ଲଗର ଏବଂ ସୋସିଆଲ ମିଡିଆ ଇନଫ୍ଲୁଏନ୍ସରଙ୍କ ପାଇଁ ଅନେକ ଗୁରୁତ୍ୱପୂର୍ଣ୍ଣ ପରାମର୍ଶ ରହିଛି:-

୧. ସାମରିକ କାର୍ଯ୍ୟକଳାପ କିମ୍ବା ରଣନୈତିକ ସ୍ଥାନର ଫଟୋ କିମ୍ବା ଭିଡିଓ ଉଠାନ୍ତୁ ନାହିଁ କିମ୍ବା ସେୟାର କରନ୍ତୁ ନାହିଁ ।

୨. ସମ୍ବେଦନଶୀଳ ସ୍ଥାନରୁ ଲାଇଭ୍ ଅପଡେଟ୍ କିମ୍ବା ସ୍ଥାନ-ଭିତ୍ତିକ ପୋଷ୍ଟ କରିବାରୁ ଦୂରେଇ ରୁହନ୍ତୁ ।

୩. ଯାଞ୍ଚ ନକରି କୌଣସି ବିଷୟବସ୍ତୁ ସେୟାର କରନ୍ତୁ ନାହିଁ ।

୪. ଡିପଫେକ୍ ଚିହ୍ନଟ କରିବା ପାଇଁ ଟୁଲ୍ସ ଏବଂ ରିଭର୍ସ ଇମେଜ୍ ସର୍ଚ୍ଚ ବ୍ୟବହାର କରନ୍ତୁ।

୫. ପ୍ରତ୍ୟେକ ଖବରରେ ନିର୍ଭରଯୋଗ୍ୟ ସୂତ୍ର ଉଲ୍ଲେଖ କରନ୍ତୁ ଏବଂ ଅସମର୍ଥିତ ଖବରକୁ ଅସମର୍ଥିତ ଭାବରେ ଚିହ୍ନିତ କରନ୍ତୁ।

ଜାତୀୟ ସୁରକ୍ଷା ସହ ଜଡିତ ଗୋପନୀୟ ସୂଚନାର ଅନଧିକୃତ ପ୍ରକାଶନ ପାଇଁ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ ବୋଲି CERT ସ୍ପଷ୍ଟ କରିଛି । ଏହା ଅଧୀନରେ, ଦଣ୍ଡ ଏବଂ ଜରିମାନା ଉଭୟ ହୋଇପାରେ । ଗଣମାଧ୍ୟମ ସଂଗଠନଗୁଡ଼ିକୁ ସେମାନଙ୍କର ଫ୍ରିଲାନ୍ସ ଏବଂ ଫିଲ୍ଡ ରିପୋର୍ଟରମାନଙ୍କୁ ଏହି ଆଇନଗୁଡ଼ିକ ବିଷୟରେ ଜଣାଇବାକୁ ଏବଂ ସେହି ଅନୁଯାୟୀ ତାଲିମ ଦେବାକୁ କୁହାଯାଇଛି ।

ନିର୍ଦ୍ଦେଶାବଳୀରେ କୁହାଯାଇଛି ଯେ ସାମ୍ପ୍ରତିକ ଦିନଗୁଡ଼ିକରେ ସାମାଜିକ ଗଣମାଧ୍ୟମ ଏବଂ ଅନ୍ୟାନ୍ୟ ସାର୍ବଜନୀନ ମଞ୍ଚରେ ସାମରିକ କାର୍ଯ୍ୟକଳାପ, ନିୟୋଜନ ଏବଂ ରଣନୈତିକ ସୂଚନା ସହିତ ଜଡିତ ଫଟୋଗ୍ରାଫ୍, ଭିଡିଓ ଏବଂ ବିଭିନ୍ନ ଟିପ୍ପଣୀ ଗୁଡ଼ିକ ଗତିରେ ବୃଦ୍ଧି ପାଇଛି। CERT କହିଛି ଯେ ଏପରି ସୂଚନା, ଜାଣିଶୁଣି ହେଉ କିମ୍ବା ଅଜାଣତରେ ସେୟାର କରାଯାଇଥାଉ, ଶତ୍ରୁକୁ  ଲାଭ ପହଞ୍ଚାଇପାରେ ଏବଂ ଦେଶର ସୁରକ୍ଷାକୁ ବିପଦରେ ପକାଇପାରେ ।ଏହି ଆଡଭାଇଜରୀ (ନିର୍ଦ୍ଦେଶାବଳୀ)ର ମୁଖ୍ୟ ଉଦ୍ଦେଶ୍ୟ କେବଳ ଗଣମାଧ୍ୟମକୁ ସତର୍କ କରାଇବା ନୁହେଁ ବରଂ ସାଧାରଣ ନାଗରିକଙ୍କୁ ସୋସିଆଲ ମିଡ଼ିଆରେ ସମ୍ବେଦନଶୀଳ ଘଟଣା ନିବୃତ ରଖିବାକୁ ମଧ୍ୟ କୁହାଯାଇଛି। CERT କହିଛି ଯେ ଦେଶର ଏହି ପରିସ୍ଥିତିରେ ପ୍ରତ୍ୟେକ ନାଗରିକଙ୍କ ଭୂମିକା ଗୁରୁତ୍ୱପୂର୍ଣ୍ଣ । ଯଦି ସମସ୍ତେ ସତର୍କ ରୁହନ୍ତି, ଗୁଜବକୁ ଏଡାଇବେ ଏବଂ ତଥ୍ୟ କିମ୍ବା ସୂଚନା ପ୍ରସାର କରିବା ପୂର୍ବରୁ ଯାଞ୍ଚ କରିବେ,ତେବେ ଆମେ ଏକତ୍ରିତ ହୋଇ ଜାତୀୟ ସୁରକ୍ଷାକୁ ସୁଦୃଢ କରିପାରିବା।