ନାଗାଲାଣ୍ଡର ମୋନ୍ ସହରର ଡିଫେନ୍ସ କଲୋନୀରେ କ୍ରମାଗତ ମୁଷଳଧାରା ବର୍ଷା ଯୋଗୁଁ ଭୀଷଣ ଭୂସ୍ଖଳନ (Landslide) ହୋଇ ବ୍ୟାପକ କ୍ଷୟକ୍ଷତି ଘଟିଛି। ଏହି ଦୁର୍ଘଟଣାରେ ଅନେକ ଘର ମାଟିତଳେ ଦବିଯାଇଛି। ବର୍ତ୍ତମାନ ସୁଦ୍ଧା ତିନୋଟି ମୃତଦେହ ଉଦ୍ଧାର କରାଯାଇଥିବା ବେଳେ ଏବେ ମଧ୍ୟ ଅନେକ ଲୋକ ମାଟିତଳେ ଫସି ରହିଥିବା ଆଶଙ୍କା କରାଯାଉଛି। SDRF, ପୋଲିସ ଏବଂ ଆସାମ ରାଇଫଲ୍ସର ଦଳ ଯୁଦ୍ଧକାଳୀନ ଭିତ୍ତିରେ ଜେରଦାର ରିଲିଫ୍ ଓ ଉଦ୍ଧାର କାର୍ଯ୍ୟରେ ଜୁଟିଛନ୍ତି।

ନାଗାଲାଣ୍ଡର ମୋନ୍ ସହରର ଡିଫେନ୍ସ କଲୋନୀରେ ରବିବାର ସକାଳେ ଲଗାତାର ପ୍ରବଳ ବର୍ଷା ଯୋଗୁଁ ଏହି ଭୀଷଣ ଭୂସ୍ଖଳନ ଘଟିଛି। ଏହି ପ୍ରାକୃତିକ ବିପର୍ଯ୍ୟୟ ସ୍ଥାନୀୟ ଅଞ୍ଚଳରେ ତାଣ୍ଡବ ରଚିଛି। ଭୂସ୍ଖଳନର ପ୍ରଭାବରେ ଦେଖୁଦେଖୁ ଅନେକ ପକ୍କା ଘର ଭାଙ୍ଗି ମାଟିରେ ମିଶିଯାଇଛି ଏବଂ ଅନ୍ୟ କେତେକ ଘର ଭାସିଯାଇଛି। ପ୍ରାଥମିକ ସୂଚନା ଅନୁଯାୟୀ, ପ୍ରାୟ ୧୦ ରୁ ୧୩ଟି ଘର ସମ୍ପୂର୍ଣ୍ଣ ଭାବେ ପ୍ରଭାବିତ ହୋଇଛି। ଏହି ଘଟଣା ପରେ ସମଗ୍ର ଅଞ୍ଚଳରେ ଆତଙ୍କର ମାହୋଲ ସୃଷ୍ଟି ହୋଇଛି। ପ୍ରଶାସନ ପକ୍ଷରୁ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଛି।

୩ ମୃତଦେହ ଉଦ୍ଧାର, ଅନେକ ଦବି ରହିଥିବା ଆଶଙ୍କା

ଦୁର୍ଘଟଣା ପରେ ପ୍ରାଥମିକ ରିପୋର୍ଟରେ ମାଟିତଳେ ଅନେକ ଲୋକ ଦବି ରହିଥିବା ଆଶଙ୍କା କରାଯାଇଥିଲା। ମୋନ୍ ଜିଲ୍ଲାର ଡେପୁଟି କମିଶନର ୱେନିୟେଇ କୋନ୍ୟାକ ଜଣାଇଛନ୍ତି ଯେ, ବର୍ତ୍ତମାନ ସୁଦ୍ଧା ମାଟିତଳୁ ୩ଟି ମୃତଦେହ ଉଦ୍ଧାର କରାଯାଇଛି। ଅନ୍ୟପକ୍ଷରେ, ଆଉ ୪ ଜଣ ବ୍ୟକ୍ତି ଏବେ ମଧ୍ୟ ମାଟିତଳେ ଫସି ରହିଥିବା ଆଶଙ୍କା ରହିଛି। ପ୍ରଶାସନ କହିଛି ଯେ ନିଖୋଜ ଲୋକଙ୍କ ସନ୍ଧାନ ପାଇଁ ଖୋଜାଖୋଜି ଜାରି ରହିଛି ଏବଂ ଉଦ୍ଧାରକାରୀ ଦଳ ସବୁ ପ୍ରକାର ଚେଷ୍ଟା ଚଳାଇଛନ୍ତି।

ବର୍ଷା ଓୁ ଧସୁଥିବା ମାଟି ଯୋଗୁଁ ଉଦ୍ଧାର କାର୍ଯ୍ୟରେ ବାଧା

ଲଗାତାର ବର୍ଷା ଏବଂ ପାର୍ବତ୍ୟ ଅଞ୍ଚଳର ଅସ୍ଥିର ମାଟି ଯୋଗୁଁ ରିଲିଫ୍ ଓ ଉଦ୍ଧାର କାର୍ଯ୍ୟ ବାଧାପ୍ରାପ୍ତ ହେଉଛି। ପ୍ରବଳ ପାଣିର ସ୍ରୋତ ଏବଂ କ୍ରମାଗତ ଭାବେ ଧସୁଥିବା ମାଟି ଯୋଗୁଁ ଭାରି ମେସିନାରୀ ଓ ଉଦ୍ଧାରକାରୀ ଦଳକୁ କାମ କରିବାରେ ବେଶ୍ ଅସୁବିଧାର ସାମ୍ନା କରିବାକୁ ପଡ଼ୁଛି। ଏହା ସତ୍ତ୍ୱେ ମଧ୍ୟ ଉଦ୍ଧାର ଅଭିଯାନ ବିନା ବିରତିରେ ଜାରି ରହିଛି।

ଘଟଣାସ୍ଥଳରେ SDRF, ପୋଲିସ ଓ ଆସାମ ରାଇଫଲ୍ସ

ଘଟଣା ଘଟିବା ମାତ୍ରେ ରାଜ୍ୟ ବିପର୍ଯ୍ୟୟ ପ୍ରଶମନ ବଳ (SDRF), ପୋଲିସ, ଆସାମ ରାଇଫଲ୍ସ ଏବଂ ସ୍ଥାନୀୟ ସ୍ୱେଚ୍ଛାସେବୀଙ୍କ ଦଳ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ମିଳିତ ଭାବେ ଚାଲିଥିବା ଏହି ରେସ୍କ୍ୟୁ ଅପରେସନରେ ମାଟି ଓ ଆବର୍ଜନା ହଟାଇ ନିଖୋଜ ଲୋକଙ୍କୁ ଖୋଜାଯାଉଛି। ପ୍ରଶାସନ ପ୍ରଭାବିତ ପରିବାରଗୁଡ଼ିକୁ ସମସ୍ତ ପ୍ରକାର ସହାୟତା ଯୋଗାଇଦେବାକୁ ପ୍ରତିଶ୍ରୁତି ଦେଇଛି।

ପ୍ରଶାସନ ପକ୍ଷରୁ ସତର୍କ ସୂଚନା ଜାରି

ପାଗର ଖରାପ ସ୍ଥିତିକୁ ଦେଖି ପ୍ରଶାସନ ପ୍ରଭାବିତ ଏବଂ ସମ୍ବେଦନଶୀଳ ଅଞ୍ଚଳରେ ରହୁଥିବା ଲୋକମାନଙ୍କୁ ସୁରକ୍ଷିତ ସ୍ଥାନକୁ ଚାଲିଯିବା ପାଇଁ ଅପିଲ୍ କରିଛି। ଅଧିକାରୀମାନେ କହିଛନ୍ତି ଯେ, କ୍ରମାଗତ ବର୍ଷା ହେତୁ ଏବେ ବି ଭୂସ୍ଖଳନର ବିପଦ ରହିଛି। ଏଭଳି ପରିସ୍ଥିତିରେ ଲୋକମାନଙ୍କୁ ସତର୍କ ରହିବାକୁ ଏବଂ ପ୍ରଶାସନ ଦ୍ୱାରା ଜାରି କରାଯାଇଥିବା ନିର୍ଦ୍ଦେଶାବଳୀ ପାଳନ କରିବାକୁ କୁହାଯାଇଛି। ବର୍ତ୍ତମାନ ଉଦ୍ଧାର କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଚାଲିଛି ଏବଂ ପ୍ରଶାସନ ସ୍ଥିତି ଉପରେ ତୀକ୍ଷ୍ଣ ନଜର ରଖିଛି।